Read Biatah Bidayuh PINGANDAI 25 Bible Online

PINGANDAI 25 - Biatah Bidayuh bible

PINGANDAI 25

¹Taruh andu ripas Festus mbŭh ndŭg utung rais anŭ, ayŭh matak so Caesarea ka Jerusalem.

²Ka pingubak pingubak imam ngga bara pingibās bangsa Jahudi minyu ngga ayŭh ngadu Paul. Ngara mite Festus

³bada Paul di ka Jerusalem, amai mbŭh bipekat an tuman ka siŭ Paul di aran.

⁴Festus nam, “Paul agi di ramin jer di Caesarea, ka adŭp ku re rikas gŭh pari kamanŭ.

⁵Bada bara pinguru ngan mandŭg ka Caesarea ngga aku yŭn nyarah daya anŭ kambŭi ayŭh agi ndai sarah.”

⁶Festus babŭ rŭŭ ngga ngara kurang rabis mai ngga simŭng andu dinge, ka komŭnŭ ayŭh pari ka Caesarea. Andu anŭ ndi ayŭh guru nggen bisara, ka bada Paul dog taban mŭrŭt.

⁷Kan Paul mbŭh mŭrŭt, daya Jahudi adi mandŭg so Jerusalem mijog maning ayŭh, rasu minyu kidaan bagŭ masam pingandai sarah bās adi sŭn ngara nang ko Paul ndai, pak sopŭrŭg-i adi dŭh adŭp ngara tungang natu sawŭ ngga dŭh.

⁸Ka Paul, nyibandar adŭp-i, nang, “Aku mating ndai sarah rawan Ukum-adat Jahudi puan kah rawan Ramin Tuhan puan kah rawan Caesar.”

⁹Pak Festus, ngga-i an ndai kana di sirung jawin daya Jahudi, nang di Paul, “An kuu di ka Jerusalem, ka bisara pasar kayuh ati di sirung jawin ku diginŭ?”

¹⁰Paul nang, “Aku raan mijog di sirung jawin Caesar, di yŭn aku patut bisara. Aku mating ndai sarah di daya Jahudi, adŭp mai puan gŭh.

¹¹Kambŭi aku sawŭ agi miranggar ukum-adat ka agi ndai pingandai adi yŭn ku patut dog ukum kabŭs, aku dŭh abah trima-i. Pak kambŭi kayuh anŭ adi ngara ngadu pasar aku dŭh sawŭ, mating daya bisa nyerah aku ka tangan ngara. Aku mite adŭp ku bisara di tangan Caesar.”

¹²Jadi Festus, ripas ko birundeng ngga bara adi tukang pitayan ayŭh, nam, “Kuu mbŭh mite adŭp mu di ka Caesar, ka Caesar garang kuu di.”

¹³Dŭh tui ripas anŭ Raja Agrippa ngga Bernice mandŭg ka Caesarea an nggen tabi ngga kambat Festus.

¹⁴Kan ngara mbŭh rŭŭ diginŭ mua tian-i, Festus nyuse har Paul di Raja Agrippa: “Agi daya di ramin jer digiti adi Felix tingge;

¹⁵ka di andu aku agi di Jerusalem, pingubak pingubak imam Jahudi samŭn bara nyamba bangsa Jahudi ngadu ayŭh buang mite aku ngukum ayŭh.

¹⁶Pak aku kidaan di ngara nang daya Rome dŭh nyerah daya adi dog nyarah sibayuh-i bidapŭd situra jawin ngga bara adi nyarah ayŭh ka minyu nyibandar adŭp-i rawan kayuh adi ngara nang pasar ayŭh.

¹⁷Kan ngara mbŭh mandŭg kamati, aku dŭh taran masā; andu anŭ ndi aku rasu guru nggen bisara ka bada daya anŭ dog taban mŭrŭt.

¹⁸Bara adi nyarah ayŭh mijog, pak ngara mating nyarah ayŭh pasar sarah adi nanyam ka anŭ adi darŭm pikir ku.

¹⁹Anŭ adi ngara nang kaŭs-i pasar karit ngara ngga ayŭh tura ka adat ngara ka pasar ndi naan daya dŭn Jesus, adi mbŭh kabŭs; pak Paul nang Ayŭh udip.

²⁰Aku dŭh puan simuki re dapŭd ruru-i, jadi aku siken Paul an kah abah ayŭh di ka Jerusalem ka dog bisara diginŭ pasar kayuh adi ngara ko ngadu pasar ayŭh.

²¹Pak Paul ndai pimite-i. Ayŭh mite adŭp-i dog jaga yŭn bada Caesar ngatur har-i. Jadi aku nggen ukum bada ayŭh nakit dog nguan ndŭg ka aku mbŭh tungang pait ayŭh ka Caesar.”

²²Agrippa nang di Festus, “Aku gŭh raan dingah daya anŭ.” Festus nam, “Kaam bisa dingah ayŭh sipagi.”

²³Andu anŭ ndi Agrippa mandŭg, ngga Bernice, dog ngadā ngga sangŭn bās, ka mŭrŭt tarun yŭn bisara ngga bara pingibās soldadu samŭn daya adi bās darŭm kupo anŭ. Festus nggen pinganang-i, ka Paul dog taban ngga mŭrŭt.

²⁴Festus nang, “Raja Agrippa, samŭn sopŭrŭg adi agi digiti: Tingga daya ati! Barang naan daya Jahudi so Jerusalem ngga so Caesarea mbŭh mandŭg di ngadu daya ati ka aku, mite ayŭh dog ukum kabŭs.

²⁵Pak aku mating dapŭd pingandai sarah-i adi yŭn-i patut dog ukum kabŭs. Pak amai adŭp-i mbŭh mite adŭp-i dog bisara di tangan Caesar, aku mbŭh natu an pait ayŭh ka Rome.

²⁶Pak aku dŭh biyŭn kayuh adi tatu bisa ku nuris ka Caesar pasar ayŭh. Ngapŭi aku taban ayŭh ka sirung jawin ngan, rabis-i ka kaam, Raja Agrippa, isa ripas ata ko nakit nyiringa har-i, aku bisa biyŭn kayuh re ku nuris.

²⁷Amai di asŭng ku, dŭh inŭh patut pait daya adi dog jer ka Caesar dŭh kidaan sarah-i adi daya ko ngadu.”