Read Biatah Bidayuh PINGANDAI 26 Bible Online

PINGANDAI 26 - Biatah Bidayuh bible

PINGANDAI 26

¹Agrippa nang di Paul, “Kuu bisa minyu ngarun adŭp mu.” Paul pakat tangan-i, komŭnŭ ayŭh minyu nyibandar adŭp-i:

²“Raja Agrippa! Aku kinyam adŭp ku raru binasip andu ati minyu nyibandar adŭp ku di sirung jawin mai, pasar sopŭrŭg kayuh adi daya Jahudi nang pasar aku,

³rabis-i sabab kaam mbŭh mirati sopŭrŭg adat Jahudi samŭn kaii-i. Aku mite kaam dingah ngga atin sabar kayuh adi re ku nang.

⁴“Sopŭrŭg daya Jahudi puan pimudip ku so aku gi-sŭ. Ngara puan munki pimudip ku so sibungas-i di rais adŭp ku, ka komŭnŭ di Jerusalem.

⁵ Ngara taŭn mbŭh puan, kambŭi ngara an kidaan, so sibungas-i aku taŭn mbŭh daya Pharisee, tibaran adi mbit bat sopŭrŭg atur adat ami.

⁶Ka madin aku mijog digiti bisara sabab aku harap di janji anŭ adi Tapa mbŭh ndai ngga tayung-babuk ami,

⁷janji adi simŭng-duwŭh tibaran-asar ami harap adŭp-i re dapŭd, darŭm-i nyambah Tapa sandu singarŭm. Ka sitagar pingarap anŭ inŭh, Tuan-raja, aku dog nyarah daya Jahudi!

⁸Mani angān adi agi digiti kinyam-i mbar re sabah Tapa tungang pakat daya so kabŭs?

⁹ “Adŭp ku muko suba ngga situngang ku ndai barang masam kayuh ngga rawan Jesus so Nazareth.

¹⁰Anŭ inŭh adi ko ku ndai di Jerusalem. Ngga kuasa so pingubak pingubak imam aku nakap bagŭ daya adi Tapa mbŭh mien, ka na ngara darŭm jer. Ka kan ngara dog ukum kabŭs, aku gŭh adi sua situju an ndai simŭnŭ.

¹¹Siraru aku ngukum ngara di ramin simayang-Jahudi ka mbŭh suba bada ngara pasan pinyabah-i. Raru baji di ngara, aku di ka kupo kupo di rais tami di kisiis ngara.

¹²“Anŭ inŭh pinŭtŭn aku matak ka Damascus ngga kuasa ka ngga pinyibandar so bara pingubak imam.

¹³Ngga arong yun kumbeng, Tuan-raja, di pimanu ku aku kiris jawa adi jawa dŭ so batŭh andu mandŭg so rangit nyekar maning aku samŭn bara adi samah panu ngga aku.

¹⁴Sopŭrŭg kieh rabu ka tana, ka aku dingah sirŭŭn nang di aku darŭm piminyu Hebrew, ‘Saul, Saul! Mani kuu kisiis Aku? Kuu bada adŭp mu kinaman rawan Aku adi Tuan mu.’

¹⁵‘Asi Kaam, Tuhan?’ aku siken. Ka Tuhan nam, ‘Aku ati Jesus, adi kuu kisiis.

¹⁶Pak makat meh, mijog. Aku kiren adŭp Ku di kuu an tijuan kuu da jadi urun Ku. Aku bada kuu kidaan di sopŭrŭg daya kayuh adi kuu kiris pasar Aku[39] andu ati samŭn kayuh adi Aku re kiren di kuu sundis andu.

¹⁷Aku re nyiramat kuu so tangan daya Israel ka so tangan daya adi dŭh bangsa Jahudi, adi yŭn Ku re pait kuu.

¹⁸Kuu siŭn kuka batŭh ngara isa ngara pari so karŭm ka jawa, ka pari so kuasa Shetan di ka Tapa, isa ngara so ka pinyabah di Aku bisa dapŭd pingapun dosa samŭn pinyirŭŭ samah ngga bara daya adi Tapa mbŭh mien.’

¹⁹“Sabab anŭ meh, Raja Agrippa, aku dŭh nyibireu kayuh anŭ so shorga adi aku ko kiris keya ka darŭm pŭmŭh.

²⁰ Sibungas-i di Damascus ka di Jerusalem ka komŭnŭ di ndi tarun tana rais Israel samŭn di dupan daya adi dŭh bangsa Jahudi, aku ngajar siŭn daya dŭh tia bidosa pak marik pimudip ngara pari ka Tapa, ka ndai anŭ adi kiren adŭp-i mbŭh udip nanyam ka pinyiraan Tapa.

²¹Sitagar ati, bara daya Jahudi ati nakap aku di Ramin Tuhan, ka suba an siŭ aku.

²²Pak ndŭg andu ati aku agi dog turung Tapa, ka aku mijog digiti nggen taksi di sopŭrŭg ngan, sŭ bait bās-i angān. Kayuh adi aku kidaan inŭh kayuh adi muko adŭp bara nabi samŭn Moses kidaan nang re jadi:

²³ anŭ inŭh Kristus dŭh siŭn dŭh kinyam jera-birasa ka jadi sianŭ adi diŭ makat so kabŭs, yŭn kidaan jawa pinyiramat di daya bangsa Jahudi samŭn daya adi dŭh bangsa Jahudi.”

²⁴Darŭm Paul minyu nyibandar adŭp-i sakanŭ, Festus nyungak ayŭh, “Kuu mbŭh gira, Paul! Paŭh bandar birajar mbŭh bada kuu jadi gira!”

²⁵Paul nam, “Aku dŭh gira, Tuan-Raja! Aku kidaan kayuh adi sawŭ, adi biyŭn rati-i.

²⁶Raja Agrippa! Ngga sukup pus aku minyu ngga kaam, sabab kaam puan sopŭrŭg kayuh anŭ. Aku puan kaam muko nakit ngatin sopŭrŭg-i, amai kayuh anŭ dŭh-i kayuh adi bisukan jadi di sikuh tarun.

²⁷Raja Agrippa, sabah mai kah bara nabi? Aku puan kaam sabah!”

²⁸Agrippa nang di Paul, “Rikas raru kuu raan bada aku jadi daya Kristen!”

²⁹“Rikas bait dŭh rikas,” Paul nam, “taŭn-i mbŭh pimite ku di Tapa inŭh kaam samŭn sopŭrŭg adi dingah aku andu ati jadi mun aku. Adŭ-i, dŭh ngga parik basi ati!”

³⁰Komŭnŭ Raja Agrippa, Gabenor Festus, ngga Bernice, ka sopŭrŭg adi bŭkŭn makat,

³¹ka ripas ngara bu, ngara nang, “Daya ati dŭh biyŭn sarah. Ayŭh dŭh patut dog ukum kabŭs, ka dŭh gŭh patut dog jer.”

³²Agrippa kidaan di Festus, “Paul bisa dog pirupas, kambŭi ayŭh dŭh mite adŭp-i bisara di tangan Caesar.”