Read Biatah Bidayuh PINGANDAI 27 Bible Online

PINGANDAI 27 - Biatah Bidayuh bible

PINGANDAI 27

¹Kan-i mbŭh dog natu kieh re birayar ka Italy, ngara nyerah Paul ngga kada daya adi bŭkŭn adi so ramin jer ka tangan Julius, adi pingubak tibaran soldadu daya Rome adi dog kadŭn “Rejimen Caesar.”

²Kieh mŭrŭt kapar adi mandŭg so Adramyttium, adi mbŭh sidia re birayar ka pinyigŭn pinyigŭn kapar di utung rais Asia; kieh birayar. Aristarchus, daya Macedonia so Thessalonica, agi ngga kieh.

³Andu anŭ ndi kieh ndŭg Sidon. Julius kana ngga Paul; ayŭh tandah Paul bidapŭd ngga bara dingan-i, siŭn-i dog nggen kayuh adi-i biguna.

⁴Kieh pijuu birayar so nŭ, ka sabab sabak poh rawan kieh, kieh birayar nŭdŭs tibande purau Cyprus.

⁵Birayar mutas rawŭt murah Cilicia ngga Pamphylia kieh mandŭg ka Myra di Lycia.

⁶Diginŭ pingubak soldadu anŭ dapŭd kapar so Alexandria adi re birayar ka Italy; jadi ayŭh mindah kieh ka kapar anŭ.

⁷Kieh sitanah birayar agi kudu kudu andu ka ngga susah payah-i kieh mandŭg sindŭk kupo Cnidus. Kieh dŭh tungang birayar rabis jo so anŭ sabab sabak bana poh rawan kieh, jadi kieh birayar nŭdŭs purau Crete, murah Tanjung Salmone.

⁸Kieh nŭdŭs purau anŭ buang ngga susah payah kieh mandŭg ka tarun adi dog kadŭn Pinyigŭn Siramat, dŭh jo so kupo Lasea.

⁹Kieh tui rŭŭ diginŭ, ndŭg ka-i mbŭh raru mbar re pijuu birayar, amai nganŭ gŭh Andu Pingapun Dosa [40] mbŭh ripas. Jadi Paul pitayan ngara:

¹⁰“Bara dingan, kiris ku birayar ta so ti re susah; barang di kapar ngga adŭp kapar re rusak; daya re agi kabŭs.”

¹¹Pak pingubak soldadu anŭ sabah dŭ di pinganang pingubak kapar ngga daya adi dapu kapar, so di pinganang Paul.

¹²Ka sabab pinyigŭn kapar anŭ dŭh kana yŭn rŭŭ di tipuh madud, batang an sopŭrŭg ngara situju an suba birayar ka Phoenix kambŭi tungang, an rŭŭ diginŭ di tipuh madud. Phoenix inŭh pinyigŭn kapar di Crete adi nura siratan-barat ngga utara-barat.[41]

¹³Sabak adi dŭh paŭh daras agi poh so ka siratan, ka ngara pikir-i kana ngga birayar, ngara tarik sawŭh ka birayar nabing Crete.

¹⁴Pak dŭh tian-ki ki, sabak ribut adi dog kadŭn “Timor-Rawŭt”, poh so purau anŭ.

¹⁵Sabak anŭ maka kapar; ka sabab-i mbar re rawan-i, kieh tandah adŭ kapar anyut tunda sabak.

¹⁶Kieh nabing purau Cauda so parad adi dog grindung so sabak. Diginŭ, ngga susah payah gŭh kieh paad anak arud kapar.

¹⁷Ngara paad arud anŭ ka kapar, ka komŭnŭ ngara ngabŭt taris baga maring kapar. Sabab taru miradak sumat tabing Libya, ngara bisor rayar ka tandah kapar anyut tunda sabak.

¹⁸Sabak ribut anŭ mbŭh dŭh adŭ ko poh; ka andu anŭ ndi ngara taran ka rawŭt kada barang so kapar,

¹⁹ka andu anŭ ndi dinge ngara taran kada pingakas kapar.

²⁰Ka kan batŭh andu ngga bitang bitang mbŭh dŭh adŭ tatŭng darŭm kudu kudu andu, buang sabak ribut mbŭh dŭh adŭ masah bana poh, kieh mbŭh mating pingarap re tungang dog nyiramat.

²¹Kan barang naan ngara mbŭh tui dŭh man, Paul mijog di sirung jawin ngara ka nang, “Bah angān tunda pinganang ku dŭh birayar so Crete, dŭh kapar ta rusak ka dŭh gŭh ata dapŭd rugi mun ati.

²²Madin aku mite angān dŭhnyah taru! Angān dŭh re kabŭs, kaŭs-i kapar ati adŭ adi re dŭh tungang dog nyiramat.

²³Amai singumi malaikat Tapa ku adi aku nyambah agi mandŭg ka aku.

²⁴Ayŭh nang, ‘Dŭhnyah taruh, Paul! Kuu dŭh siŭn dŭh bisara di sirung jawin Caesar. Ka Tapa, sabab pinyikana-I di kuu, re bada siramat sopŭrŭg adi birayar ngga kuu.’

²⁵Ngapŭi dŭhnyah taru! Amai aku sabah Tapa re bada kayuh jadi nimun adi-I ko kidaan.

²⁶Kaŭs-i ata re agi dog poh miranggar tabing purau.”

²⁷Ngarŭm adi simŭng-pat, kieh mbŭh dog poh biranyut di rawŭt Mediterranean. Arong sitŭrŭp ngarŭm bara adi pimanu kapar pikir kieh mbŭh dŭh jo so deyŭh.

²⁸Ngara bisor anak taris ngga tanuh dog tangid dieh ka dapŭd piin agi pat puru mita tŭrŭp; dŭh tui ripas anŭ ngara bisor dinge ka dapŭd-i agi taruh puru mita tŭrŭp.

²⁹Taru kapar miranggar batuh, ngara bisor pat sawŭh so punok kapar, ka bidua mite jawa andu.

³⁰Bara adi pimanu kapar suba an bu tingge kapar; ngara bisor arud ka piin ka nadar bada adŭp-i mun adi bisor sawŭh so jawin kapar.

³¹Paul nang di pingubak soldadu samŭn di bara soldadu, “Kambŭi ngara dŭh rŭŭ di kapar, angān dŭh re siramat.”

³²Jadi bara soldadu kapŭg taris arud anŭ, ka tandah arud anŭ paman.

³³Kan-i mbŭh re siri jawa, Paul mite sopŭrŭg ngara man: “Simŭng-pat andu angān mbŭh kajŭn buang dŭh man ani ani.

³⁴Aku mite angān man. Dŭh angān tungang udip dŭh man; man meh isa ndi sirah ubok ngan dŭh gŭh re manyap.”

³⁵Ko nang sakanŭ, Paul mbit ruti, nggen trima kaseh di Tapa di sirung jawin sopŭrŭg ngara, ka rasu man.

³⁶Nganŭ gŭh yang ngara munos, ka barang naan ngara sua man.

³⁷Sopŭrŭg ami adi darŭm kapar agi 276 naan.[42]

³⁸Kan sopŭrŭg ngara mbŭh bisoh, ngara pijangan kapar, taran gandom gandom ka darŭm rawŭt.

³⁹Kan andu mbŭh jawa, bara adi pimanu kapar dŭh natŭng deyŭh, pak ngara kiris suak adi agi pantai-i. Kambŭi tungang, ngara an suba taban kapar rŭŭ diginŭ.

⁴⁰Jadi ngara kapŭg taris sawŭh, tandah-i timŭtŭm ka darŭm rawŭt, buang kuka taris kumudi kapar. Komŭnŭ ngara paad rayar adi tura ka jawin kapar, isa sabak poh taban kapar ka deyŭh.

⁴¹Pak kapar miranggar tabing sumat ka rasu dŭh biguyut. Diginŭ jawin-i rakat di sumat, ka parad ka kumudi-i pape ka randŭk da girumbang adi mbŭh raru daras.

⁴²Bara soldadu mbŭh kira an siŭ bara daya-takap, siŭn ngara dŭh biranang ka deyŭh ka bu.

⁴³Pak pingubak soldadu, ngga-i an nyiramat Paul, ayŭh dŭh bada bara soldadu ndai simŭnŭ; pak bada ngara adi pandai biranang sitabung diŭ ka biranang ka deyŭh.

⁴⁴Adi bŭkŭn tunda, bidigŭng di papan puan kah di rapuh rapuh pape kayuh so kapar. Simŭnŭ inŭh kieh tungang ndŭg deyŭh ngga siramat.