Read Biatah Bidayuh PINGANDAI 28 Bible Online

PINGANDAI 28 - Biatah Bidayuh bible

PINGANDAI 28

¹Kan kieh mbŭh siramat di deyŭh, nganŭ kieh puan nang purau anŭ dog kadŭn Malta.

²Daya adi rŭŭ di purau anŭ mbŭh raru kana ngga kieh. Nganŭ gŭh andu mbŭh piguru ujen ka mbŭh madud, jadi ngara ndai apui ka kambat kieh sopŭrŭg.

³Paul ndu uwang ka kan-i na-i di apui, jippŭh ruah so dieh da paras apui ka ngaring adŭp-i di tangan Paul.

⁴Daya purau anŭ kiris jippŭh anŭ bikideng di tangan Paul, minyu dupan adŭp ngara, “Manyah-i daya ati pinyiŭ. Sunggu ayŭh tungang rupas so pinyusah rawŭt, nasip-i taŭn ayŭh re kabŭs.”

⁵Pak Paul tapis jippŭh anŭ da rabu di apui buang adŭp-i dŭh mani mani.

⁶Ngara kajŭn, pikir ayŭh re bakak puan kah tumbang kabŭs. Pak ripas ngara tui kajŭn buang kiris ayŭh dŭh mani mani, ngara nukar pikir ka nang, “Ayŭh anŭ Tapa!”

⁷Dŭh jo so nŭ agi tana adi Publius dapu; ayŭh anŭ pinguru daya di purau anŭ. Ayŭh kambat kieh ngga sukup kana, ka agi taruh andu kieh nyandong di ramin-i.

⁸Sama Publius guring, sungoh buang naman taki bideya. Paul mŭrŭt birit-i, bidua, na tangan-i di tunduh ayŭh, ka pibua ayŭh.

⁹Ripas anŭ, sopŭrŭg daya adi birandam di purau anŭ mandŭg ka dog pibua.

¹⁰Ngara nggen di kieh bagŭ pinganggen, ka di andu kieh re birayar, ngara na di kapar kayuh adi kieh biguna yŭn pimanu ami.

¹¹Taruh buran ripas anŭ, kieh birayar pakai kapar adi so Alexandria, adi dog kadŭn “Tapa Gembar.” Kapar anŭ ko rŭŭ di purau anŭ di tika madud.

¹²Kieh nyasa di kupo Syracuse ka rŭŭ diginŭ taruh andu.

¹³So nŭ kieh birayar dinge ka mandŭg ka kupo Rhegium. Andu anŭ ndi, sabak poh so ka siratan, ka andu adi duwŭh kieh mandŭg ka kupo Puteoli.

¹⁴Diginŭ kieh bidapŭd ngga kada daya adi sabah di Jesus adi bada kieh rŭŭ ngga ngara ndi minggu. Ka ko anŭ, kieh mandŭg ka Rome.

¹⁵Daya adi sabah di Jesus di Rome agi dingah pasar kieh, ka mbŭh mandŭg ka Passar Appius samŭn ka ramin nupang adi dŭn Taruh Ramin Nupang an bidapŭd ngga kieh. Kan Paul kiris ngara, ayŭh nggen trima kaseh di Tapa amai kayuh adi mun anŭ taŭn-i ngatat ayŭh.

¹⁶Kan kieh mbŭh ndŭg Rome, Paul mbŭh dog nyibandar da rŭŭ sadi adŭp-i ngga ndi naan soldadu adi jaga ayŭh.

¹⁷Taruh andu ripas anŭ, Paul bagan bara pingibās bangsa Jahudi adi agi diginŭ ngga ngudung. Kan ngara mbŭh tikuruk, ayŭh nang di ngara, “Bara dingan ku daya Israel, sunggu aku mating ndai ani ani ngga rawan bangsa ta puan kah rawan adat adi ata trima so tayung-babuk ta, aku dog nakap di Jerusalem ka dog nyerah ka tangan daya Rome.

¹⁸Kan ngara muko nakit pirasa har ku, ngara suba an pirupas aku, sabab ngara mating dapŭd ani ani sarah ku adi yŭn ku patut dog ukum kabŭs.

¹⁹ Pak kan daya Jahudi matah, aku kinyam mating aran bŭkŭn adŭ-i aku mite bisara di tangan Caesar, sunggu mating kayuh re ku ngadu ngga nyarah bangsa adŭp ku.

²⁰Anŭ sabab aku an bidapŭd ka minyu ngga angān. Sibandar-i, aku dog muak ngga parik basi mun ati amai Ayŭh adi daya Israel harap.”

²¹Ngara nang di ayŭh, “Kieh mating trima surat so Judea pasar kuu, mating gŭh daya so nŭ mandŭg kamati taban agah puan kah minyu arap pasar kuu.

²²Pak kieh raan dingah piminyu adŭp mu, amai di barang yŭn daya agi minyu kinarap tibaran mu anŭ.”

²³Jadi ngara miratak andu adi ngga ngara bisa bidapŭd ngga Paul, ka bagŭ ngara mandŭg ka yŭn-i rŭŭ. So isan isan ndŭg singarŭm ayŭh nakit kidaan rati ajar-i pasar Pinyipritah Tapa,[43] ka ngga situngang-i an bada ngara sabah di Jesus, pakai ayat ayat so Ukum-adat Moses samŭn so surat surat bara nabi.

²⁴Agi so ngara sabah pinganang Paul, pak adi bŭkŭn dŭh.

²⁵Jadi ngara bu, dŭh situju dupan adŭp ngara ripas Paul ko nang sakati: “Taŭn sawŭ pinganang Roh Kudus kan-I minyu so baba nabi Isaiah di tayung-babuk ngan!

²⁶ Amai Ayŭh nang, ‘Panu di kidaan di bangsa ati: Angān re dingah ka dingah, pak dŭh mirati; Angān re tingga ka tingga, pak dŭh kiris,

²⁷sabab pikir bangsa ati taŭn madŭd, ka ngara mbŭh mapot kajit-i buang mbŭh nutu batŭh-i. Kambŭi dŭh simŭnŭ, batŭh ngara kiris, kajit ngara dingah, pikir ngara mirati, ka ngara an pari ka Aku, Tapa nang, ka Aku pibua ngara.’ ”

²⁸Ka ngga kubo pinganang-i, Paul nang: “Angān dŭh siŭn dŭh an puan nang agah pasar pinyiramat adi Tapa mbŭh nggen, madin mbŭh dog piagah di dupan daya adi dŭh bangsa Jahudi. Ngara re kambat-i.” [

²⁹Ripas Paul ko nang sakanŭ, daya Jahudi bu, bandar bandar bikarit dupan adŭp ngara.][44]

³⁰Duwŭh sawa Paul rŭŭ di ramin anŭ adi-i nyewa, ka diginŭ ayŭh kambat sopŭrŭg daya adi mandŭg tudu ayŭh.

³¹Ayŭh nyuse ajar-i pasar Pinyipritah Tapa buang ngajar pasar Tuhan Jesus Kristus ngga atin pagan, buang mating daya nagah ayŭh.