Read Biatah Bidayuh PINGANDAI 3 Bible Online

PINGANDAI 3 - Biatah Bidayuh bible

PINGANDAI 3

¹Ndi andu, Peter ngga John di ka Ramin Tuhan ngga arong pukor taruh ripas kumbeng, di tipuh simayang.

²Diginŭ, di tiban adi dog kadŭn Tiban Ramus, agi ndi naan daya bajang. Ayŭh mbŭh bajang so andu-i dog biranak. Barang andu ayŭh dog taban ka tiban anŭ, di yŭn-i mite sidakah so daya adi mandŭg ka Ramin Tuhan.

³Kan ayŭh kiris Peter ngga John mŭrŭt, ayŭh mite sidakah so ngara.

⁴Ngara tirek ayŭh, ka Peter nang, “Tingga kieh!”

⁵Ka ayŭh tingga ngara, pikir adŭp-i re dapŭd kayuh so ngara.

⁶Pak Peter nang di ayŭh, “Aku dŭh biyŭn duit, pak aku bisa nggen di kuu kayuh adi aku biyŭn: darŭm adŭn Jesus Kristus so Nazareth aku mritah kuu da makat ka panu!”

⁷Komŭnŭ ayŭh tambit tangan tauh-i ka turung ayŭh makat. Nganŭ gŭh kaja ka turang bukuh-siok daya anŭ jadi bake.

⁸Ayŭh mirupat ka mijog, ka rasu panu. Ayŭh sua mŭrŭt Ramin Tuhan ngga ngara, panu buang mirupat muji Tapa.

⁹Daya kiris ayŭh panu buang muji Tapa,

¹⁰pak kan natŭng ayŭh pigambis adi guru di Tiban Ramus, ngara gŭgŭh buang inga inga kiris kayuh adi mbŭh jadi di ayŭh.

¹¹Darŭm ayŭh babŭ tunda Peter ngga John di awah adi dog kadŭn Awah Solomon, bara daya mbŭh inga inga ka bikaduh tudu ngara.

¹²Kan Peter kiris bara daya anŭ, ayŭh nang, “Bara dingan ku daya Israel, mani angān gŭgŭh kiris kayuh adi mun ati, ka mani angān tirek kieh? Angān pikir kieh ndai kayuh ati ngga kuasa adŭp ami kah, puan kah sitagar ami ati raru kana di batŭh Tapa?

¹³ Tapa Abraham, Isaac, ka Jacob, adi Tapa tayung-babuk ta, mbŭh nggen bragah di Urun-I Jesus. Pak angān mbŭh nyerah Ayŭh ka darŭm tangan ngara adi bikuasa, ka tirawan Ayŭh di sirung jawin Pilate, kan ayŭh mbŭh natu an pirupas Ayŭh.

¹⁴ Ayŭh adi kudus buang tŭnggŭn, angān abah trima, pak gŭt-i angān mite Pilate pirupas yŭn ngan sianŭ adi pinyiŭ.

¹⁵Angān siŭ sianŭ adi nggen aran nuju udip adi sawŭ, pak Tapa mbŭh pakat Ayŭh so kabŭs, ka kieh ati mbŭh bara saksi di kayuh anŭ.

¹⁶Kuasa adŭn-I inŭh adi nggen pinyibake di daya bajang ati. Anŭ adi angān kiris ka puan mbŭh jadi so pinyabah di adŭn-I; pinyabah di Jesus inŭh adi bada ayŭh bua, nimun adi angān mbŭh kiris.

¹⁷“Ka madin meh, bara dingan ku, aku puan kayuh adi angān ngga pinguru ngan ndai di tunduh Jesus agi so atin budo bawa ngan.

¹⁸Tapa muko kidaan ndun jah so baba bara nabi nang Kristus-I dŭh siŭn dŭh re kinyam jera-birasa; ka Ayŭh mbŭh bada-i jadi bitŭtŭk.

¹⁹Marik pimudip ngan pari ka Tapa, isa Ayŭh apun dosa ngan. Kambŭi angān ndai simŭnŭ,

²⁰tipuh adi ngga angān dog nyibake darŭm Roh re mandŭg so Tuhan, ka Ayŭh re pait Jesus ka angān, Kristus anŭ adi-I ko mien yŭn ngan.

²¹Ayŭh dŭh siŭn dŭh an babŭ di shorga ndŭg andu anŭ adi ngga sopŭrŭg kayuh dog ndai da jadi bauh, nimun adi Tapa ko kidaan so baba bara nabi kudus-I ndun jah.

²² Amai Moses ko nang, ‘Tuhan adi Tapa ngan re pait ka angān ndi naan nabi, nimun Ayŭh ko pait aku,[4] ka Ayŭh inŭh re ndi naan so bangsa adŭp ngan. Angān dŭh siŭn dŭh dingah pinganang-I.

²³ Barang naan adi dŭh tunda pinganang nabi anŭ re dog nyidŭrŭ so bara daya adi Tapa mbŭh mien, ka re dog pirabur.’

²⁴Ka sopŭrŭg nabi adi ko minyu, samŭn Samuel ka ngara adi mandŭg ripas ayŭh, samah ko kidaan kayuh adi mbŭh jadi di tipuh ati.

²⁵ Janji Tapa so baba bara nabi-I mbŭh yŭn ngan, ka angān mbŭh sua dapu simanya adi Tapa ko ndai ngga tayung-babuk ngan. Nimun adi ko-I nang di Abraham, ‘So bara sesang ngan Aku re nyiberkat sopŭrŭg bangsa daya di ong.’

²⁶Ngapŭi Tapa mbŭh mien Urun-I ka pait Ayŭh ka angān diŭ, da nyiberkat angān darŭm-I bada barang naan angān marik so aran pimudip ngan adi ginaka.”