Read Biatah Bidayuh PINGANDAI 6 Bible Online

PINGANDAI 6 - Biatah Bidayuh bible

PINGANDAI 6

¹Dŭh tui ripas anŭ, darŭm bara murid makin bitambah bagŭ, bara daya Jahudi adi minyu greek mingungut pasar bara daya Jahudi adi dŭh minyu greek sabab dayung uban ngara dŭh dog nggen duit yŭn biranja-andu.

²Jadi ngara adi simŭng-duwŭh naan pinyuruh bagan da tikuruk sopŭrŭg bara adi sabah ka nang di ngara, “Mbŭh dŭh-i patut kieh tagan kraja Tapa, sitagar an ngatur duit biranja.

³Ngapŭi meh bara dingan, mien ju naan dari so dupan adŭp ngan aki adi angān puan nang mbŭh brisi ngga Roh Kudus ka ngga pinyibijak, siŭn kieh bisa tijuan ngara da nura kraja anŭ.

⁴Isa-i kieh bisa biyŭn puno masā ami di simayang ka di kraja pingandai adi piagah pinganang Tapa.”

⁵Ndi tibaran anŭ mbŭh situju ngga pinganang bara pinyuruh. Jadi ngara mien Stephen, daya adi tagap darŭm pinyabah ka brisi ngga Roh Kudus, ka Philip, Prochorus, Nicanor, Timon, Parmenas, ka Nicolaus adi dŭh daya Jahudi pak mbŭh mŭrŭt adat Jahudi.

⁶Bara murid taban ngara anŭ ka bara pinyuruh. Bara pinyuruh bidua ka na tangan di tunduh ngara.

⁷Ka pinganang Tapa makin kambang di barang yŭn. Ka bara murid di Jerusalem makin bitambah, ka mbŭh agi gŭh tibaran imam adi mbŭh sabah.

⁸Stephen, adi mbŭh sukup puno ngga berkat Tapa buang puno ngga kuasa, ndai pingandai-nginga ngga pingandai-saruh di ruang daya bagŭ.

⁹Pak agi kada daya nyakar ayŭh, tibaran so ramin simayang-Jahudi adi dog kadŭn daya-bebas[6] (mbŭh dog kadŭn sakanŭ). Agi kada ngara mbŭh daya Jahudi so Cyrene ngga Alexandria. Ngara ngga kada daya Jahudi so utung rais Cilicia ngga Asia bikarit ngga Stephen.

¹⁰Pak Roh Kudus mbŭh nggen di Stephen pinyibijak isa kan-i minyu, ngara dŭh tungang rawan ayŭh.

¹¹Jadi ngara ngupah kada daya da nang, “Kieh agi dingah ayŭh minyu rawan Moses ka rawan Tapa!”

¹²Simŭnŭ ngara ngasut daya, bara nyamba bangsa Jahudi, ka bara gurū Ukum-adat Jahudi. Ngara nakap Stephen ka taban ayŭh ka sirung jawin Kunsil.

¹³Komŭnŭ ngara taban ngga mŭrŭt kada daya da nggen taksi kadong pasar ayŭh. “Daya ati,” ngara nang, “siraru minyu rawan Ramin Tuhan adi kudus ati samŭn Ukum-adat Moses.

¹⁴Kieh agi dingah ayŭh nang Jesus so Nazareth anŭ re nyirubuh Ramin Tuhan ati ka nukar adat adi mbŭh dog nggen di ata so Moses!”

¹⁵Sopŭrŭg adi guru di Kunsil tirek Stephen ka kiris jawin-i mun jawin malaikat.