Read Biatah Bidayuh PINGANDAI 8 Bible Online

PINGANDAI 8 - Biatah Bidayuh bible

PINGANDAI 8

¹Ka Saul mbŭh situju di pinyikabŭs-i. Di andu anŭ gŭh eklisia di Jerusalem piguru dog kisiis. Sopŭrŭg adi sabah di Jesus, adŭ-i bara pinyuruh, mbŭh papar sasah di ndi tarun tana darŭm utung utung rais Judea ngga Samaria.

²Ngara adi taru di Tapa kubur tadang Stephen, buang bana muās ayŭh.

³ Pak Saul suba an nyirubuh eklisia; so ramin ndi ndŭg ramin andi ayŭh nakap daya adi sabah di Jesus, dari bait dayung ka na ngara darŭm jer.

⁴Ngara adi sabah di Jesus adi mbŭh papar sasah, piagah Agah Kana so Tapa di barang yŭn-i.

⁵Philip di ka sindŭ kupo[8] di Samaria ka ngajar pasar Kristus di daya diginŭ.

⁶Kan bara daya bagŭ dingah Philip minyu ka ndai pingandai-nginga, ngara nakit dingah kayuh adi nang-i.

⁷Roh arap ruah so bagŭ daya buang-i nyirais ngga sirŭŭn bana, ka bagŭ daya adi naman andam ruku ngga adi bajang dog pibua.

⁸Sabab anŭ bara daya di Samaria mbŭh raru gaŭn.

⁹Ndi naan daya dŭn Simon agi rŭŭ diginŭ, adi tian ti ko bada daya Samaria tiyur da pingandai biruri-i. Ayŭh agi nang adŭp-i daya bās,

¹⁰ka sopŭrŭg daya di kupo anŭ, baga bait siit pangkat-i, sopŭrŭg dingah pinganang-i. “Daya ati inŭh kuasa Tapa adi dog kadŭn ‘Kuasa Bās,’ ” ngara nang.

¹¹Ngara dingah pinganang-i, sabab mbŭh tui ngara tiyur da pingandai biruri-i.

¹²Pak kan ngara sabah ajar Philip pasar Agah Kana Pinyipritah Tapa[9] ka pasar Jesus Kristus, ngara dog baptisa, dari dayung.

¹³Adŭp Simon sua gŭh sabah; ka ripas-i ko dog baptisa ayŭh tunda Philip. Kan-i kiris pingandai-nginga ngga pingandai-saruh dog ndai Philip, ayŭh inga inga.

¹⁴Bara pinyuruh di Jerusalem dingah daya Samaria mbŭh kambat pinganang Tapa, jadi ngara pait ka ngara Peter ngga John.

¹⁵Ngara mandŭg ka simayang yŭn ngara adi mbŭh sabah di Jesus siŭn ngara kambat Roh Kudus;

¹⁶amai Roh Kudus gibayuh mūn di tunduh ngara; kaŭs-i ngara muko dog baptisa ngga adŭn Tuhan Jesus.

¹⁷Ka Peter ngga John na tangan ngara di tunduh ngara, ka ngara kambat Roh Kudus.

¹⁸Simon kiris Roh Kudus dog nggen di ngara adi sabah di Jesus kan pinyuruh pinyuruh anŭ na tangan-i di tunduh ngara. Jadi ayŭh nggen duit di Peter ngga John,

¹⁹nang-i, “Nggen di aku gŭh kuasa anŭ, isa kan aku na tangan ku di tunduh daya, daya bisa kambat Roh Kudus.”

²⁰Pak Peter nam, “Kuu ngga duit mu di ka apui neraka, amai kuu pikir kuu bisa miris pinganggen Tapa ngga duit!

²¹Kuu dŭh bisa sua ndai kraja ati, sabab atin mu dŭh batur di batŭh Tapa.

²²Taran akar arap mu anŭ ka bidua ka Tapa mite Ayŭh apun kuu so pikir-kira adi sarah anŭ.

²³Amai aku kiris kuu mbŭh raru sina buang mbŭh dog buak dosa.”

²⁴Simon nang di Peter ngga John, “Turung bidua ka Tuhan yŭn ku, isa kayuh anŭ adi kuu nang dŭh dog aku.”

²⁵Ripas ngara ko bisaksi pasar Jesus Kristus ka piagah pinganang-I, ngara pari ka Jerusalem. Darŭm ngara pari, ngara nyasa ka nyuse Agah Kana di barang anak kupo di Samaria.

²⁶Malaikat Tuhan nang di Philip, “Sidia meh adŭp mu ka matak ka siratan[10] ka aran anŭ adi nuju Gaza so Jerusalem.” (Aran anŭ dŭh dog pakai madin.)

²⁷Jadi Philip makat ka rasu matak. Ka agi ndi naan eunuch so Ethiopia, daya adi tukang jaga buat-rata rani Ethiopia, adi mbŭh pari ko simayang di Jerusalem. Darŭm-i guru di krita kuda-i, ayŭh basa surat nabi Isaiah.

²⁹Roh Kudus nang di Philip, “Panu di nyindŭk krita kuda anŭ.”

³⁰Jadi Philip bikaduh tudu krita kuda anŭ, ka dingah ayŭh basa surat nabi Isaiah. Ayŭh siken, “Mirati mu kah kayuh adi kuu basa?”

³¹Ayŭh nam, “Simuki aku re mirati kambŭi daya mating turung kidaan rati-i di aku?” Ka ayŭh bada Philip maad krita kuda ka guru sindŭk adŭp-i.

³² Jadi pinganang Surat-kudus anŭ adi-i basa agi sakati: “Ayŭh agi keya ka biri adi dog taban yŭn dog simareh, keya ka biri dŭh bidudu darŭm buruh-i dog gumbak Ayŭh dŭh nang ani ani.

³³Ayŭh dog pimangŭh, ka mating daya nyibandar Ayŭh. Mating daya re tungang kidaan pasar sesang-i, sabab pimudip-i darŭm ong mbŭh mungan.”

³⁴Daya anŭ nang di Philip, “Kidaan di aku, pasar asi nabi anŭ minyu sakanŭ, pasar adŭp-i kah pasar daya bŭkŭn?”

³⁵Jadi Philip piguru minyu; piguru so pinganang Surat-kudus anŭ, ayŭh kidaan di ayŭh Agah Kana pasar Jesus.

³⁶Darŭm ngara panu, ngara ndŭg ndi tarun adi yŭn agi piin ka daya anŭ nang, “Tingga, agi piin digiti! Ani re bisa bitan aku so dog baptisa?”

³⁷Philip nang di ayŭh, “Kuu bisa dog baptisa, kambŭi kuu sabah ngga siabo atin mu.” Daya anŭ nam, “Aku sabah Jesus Kristus Anak Tapa.”

³⁸Daya anŭ bada krita kuda-i rŭŭ; ka ngara mūn ka piin, Philip ngga daya anŭ, ka Philip baptisa ayŭh.

³⁹Kan ngara bu so piin, Roh Tuhan tambit Philip ngga bu. Daya anŭ dŭh tia kiris ayŭh, pak pijuu pimanu-i ngga atin gaŭn.

⁴⁰Philip rada adŭp-i mbŭh di Azotus; ayŭh di ka Caesarea, ka di barang kupo adi-i so ayŭh nyuse Agah Kana.