Read Biatah Bidayuh PINGANDAI 9 Bible Online

PINGANDAI 9 - Biatah Bidayuh bible

PINGANDAI 9

¹Di tika anŭ Saul, babŭ kisiis bara pinunda Tuhan, di ka Imam Bās

²ka mite surat pingatŭn an-i taban ka yŭn bara pingibās di barang ramin simayang-Jahudi di Damascus, isa kambŭi ayŭh agi dapŭd daya diginŭ adi tunda Aran Tuhan, dari bait dayung, ayŭh bisa nakap ngara ka taban ngara ka Jerusalem.

³Saul matak ka Damascus. Ka darŭm-i mbŭh re ndŭg kupo anŭ, jawa so rangit agi tapŭ nyekar maning ayŭh.

⁴Ayŭh rabu ka tana ka dingah sirŭŭn nang di adŭp-i, “Saul, Saul! Mani kuu kisiis Aku?”

⁵“Asi Kaam Tuhan?” ayŭh siken. “Aku Jesus, adi kuu kisiis,” sirŭŭn anŭ nang.

⁶“Pak makat ka nŭh di mŭrŭt kupo, di yŭn mu re dog kidaan kayuh adi dŭh siŭn dŭh kuu ndai.”

⁷Bara adi samah panu ngga ayŭh rŭŭ buang dŭh nang ani ani; dingah sirŭŭn anŭ pak dŭh kiris asi asi.

⁸Saul makat, bidarang, pak dŭh tungang kiris tarun. Jadi ngara kayak ayŭh ngga mŭrŭt Damascus.

⁹Agi taruh andu ayŭh dŭh tungang kiris tarun, ka di tipuh anŭ ayŭh dŭh man nok.

¹⁰Agi ndi naan daya adi sabah di Jesus di Damascus dŭn Ananias. Ayŭh kiris keya ka darŭm pŭmŭh Tuhan nang di ayŭh, “Ananias!” “Ta aku, Tuhan,” ayŭh nam.

¹¹Tuhan nang di ayŭh, “Sidia adŭp mu, ka nŭh di ka aran adi dog kadŭn Aran Tŭnggŭn, ka di ramin Judas siken daya adi dŭn Saul adi mandŭg so Tarsus. Ayŭh aŭn simayang,

¹²ka keya ka darŭm pŭmŭh ayŭh kiris ndi naan daya dŭn Ananias mandŭg ka na tangan-i di tunduh ayŭh isa ayŭh dapŭd kiris dinge.”

¹³Ananias nam, “Tuhan, bagŭ daya mbŭh kidaan di aku pasar daya ati samŭn pingandai arap-i di tunduh daya Mai di Jerusalem.

¹⁴Ayŭh mbŭh mandŭg ka Damascus ngga kuasa so pingubak pingubak imam di nakap sopŭrŭg daya adi nyambah Kaam.”

¹⁵Tuhan nang di ayŭh, “Panu gŭh nŭh, sabab Aku mbŭh mien ayŭh da taban adŭn Ku ka daya adi dŭh bangsa Jahudi samŭn raja raja ka daya Israel.

¹⁶Ka Aku re kiren di ayŭh munki masam ayŭh re jera sabab adŭn Ku.”

¹⁷Jadi Ananias panu, ka di mŭrŭt ramin anŭ adi yŭn Saul, ka na tangan-i di tunduh ayŭh. “Dingan ku Saul,” ayŭh nang, “Tuhan mbŭh pait aku, Jesus adi ko kiren adŭp-I di kuu di aran darŭm kuu mandŭg kamati, bada aku mandŭg tudu kuu isa kuu dapŭd kiris dinge ka isa kuu brisi ngga Roh Kudus.”

¹⁸Ka jam anŭ gŭh kayuh mun sisik rabu so batŭh Saul, ka ayŭh rasu dapŭd kiris dinge. Ayŭh makat ka rasu dog baptisa;

¹⁹ka ripas-i ko man, ayŭh pari bake dinge. Agi duwŭh taruh andu ayŭh rŭŭ ngga bara adi sabah, di Damascus.

²⁰Ka di ramin simayang-Jahudi ayŭh rasu ngajar pasar Jesus sawŭ Anak Tapa.

²¹Sopŭrŭg adi dingah ayŭh mbŭh inga inga ka nang, “Dŭh kah siati adi, di Jerusalem, ko siŭ ngara adi nyambah Jesus? Dŭh kah ayŭh mandŭg kamati re di nakap ngara adi sabah ka taban ngara ka yŭn bara pingubak imam?”

²²Pak ajar Saul mbŭh jadi rabis bikuasa, ka pinganang adi ngga-I ngajar pasar Jesus adi Kristus mbŭh tatŭng sawŭ ndŭg ka bara daya Jahudi adi rŭŭ di Damascus dŭh tungang nam ayŭh.

²³ Kan kudu kudu andu mbŭh ripuan, bara daya Jahudi tikuruk ka bipekat an siŭ ayŭh,

²⁴pak ayŭh agi dog kidaan pasar pekat ngara. Sandu singarŭm ngara kajŭn di tiban kuta kupo an siŭ ayŭh.

²⁵Pak di ndi ngarŭm bara pinunda Saul tambit ayŭh ka bisor ayŭh darŭm bakur so rubang sindung kuta kupo.

²⁶Saul di ka Jerusalem ka suba an bigaur ngga bara murid Jesus diginŭ. Pak sopŭrŭg ngara taru ayŭh, amai ngara dŭh sabah ayŭh sawŭ mbŭh jadi murid.

²⁷Pak Barnabas turung ayŭh ka taban ayŭh ka yŭn bara pinyuruh. Ayŭh kidaan di ngara munki Saul kiris Tuhan di aran ka pasar Tuhan mbŭh minyu ngga ayŭh. Ayŭh kidaan gŭh di ngara nang Saul agi ngajar ngga atin pus pagan ngga adŭn Jesus di Damascus.

²⁸Jadi Saul rŭŭ ngga ngara ka panu di barang yŭn di Jerusalem, ngajar ngga atin pus ngga adŭn Tuhan.

²⁹Ayŭh agi gŭh minyu ka bikarit ngga bara daya Jahudi adi minyu greek, pak ngara suba an siŭ ayŭh.

³⁰Kan bara adi sabah dingah, ngara taban Saul ka Caesarea ka bada ayŭh bu ka Tarsus.

³¹Simŭnŭ meh eklisia di tarun tana Judea, Galilee, ka Samaria, mbŭh darŭm tipuh bamai. Ngga pinurung Roh Kudus eklisia anŭ dog nyibake buang daya-i mbŭh dŭ dŭ bitambah, darŭm-i udip buang stabi di Tuhan.

³²Peter panu ka barang yŭn, ka agi ndi sidah ayŭh di munan bara daya adi Tapa mbŭh mien adi rŭŭ di Lydda.

³³Diginŭ ayŭh bidapŭd ngga ndi naan daya dŭn Aeneas, adi naman andam ruku ka taŭn bŭn tungang makat so ambok-i sitŭkŭd mai sawa.

³⁴“Aeneas,” Peter nang di ayŭh, “Jesus Kristus pibua kuu. Makat ka marun ambok mu.” Aeneas rasu makat.

³⁵Sopŭrŭg daya adi rŭŭ di Lydda ka di Sharon kiris ayŭh, ka ngara sabah di Tuhan.

³⁶Di Joppa agi ndi naan dayung dŭn Tabitha, adi sabah di Jesus. (Dŭn-i darŭm piminyu Greek inŭh Dorcas, rati “Peyu.”) Ayŭh taŭn dŭh masah ndai pingandai kana buang turung daya sirata.

³⁷Di tika anŭ, ayŭh birandam ka rasu kabŭs. Tadang-i dog mamuh ka dog piguring di birit di sambu.

³⁸Joppa dŭh jo so Lydda, ka kan bara adi sabah di Jesus di Joppa dingah Peter agi di Lydda, ngara pait duwŭh naan daya ka ayŭh ngga pinganang, “Rikas mandŭg tudu kieh.”

³⁹Jadi Peter makat ka di ngga ngara. Ka kan ayŭh mbŭh ndŭg, ngara taban ayŭh ka birit di sambu, di yŭn bara dayung uban tikuruk maning ayŭh, sien buang kiren di ayŭh sopŭrŭg jipo samŭn jipo-tabar adi Dorcas ko ndai sitadŭn ayŭh babŭ udip.

⁴⁰Pak Peter bada ngara ruah ka sapa, ka adŭp-i sidikang simayang; komŭnŭ ayŭh nyindŭk tadang anŭ ka nang, “Tabitha, makat!” Tabitha bidarang, ka kan-i kiris Peter, ayŭh guru.

⁴¹Peter ton tangan-i ka turung ayŭh mijog. Komŭnŭ ayŭh bagan sopŭrŭg daya adi sabah, samŭn bara dayung uban, ka kiren ayŭh mbŭh pari udip di ngara.

⁴²Agah anŭ kambang di ndi tarun tana Joppa, ka bagŭ daya mbŭh sabah di Tuhan.

⁴³Ka Peter rŭŭ di Joppa agi mua tian-i ngga ndi naan daya adi tukang nyamŭk anyit, dŭn Simon.