Read Biatah Bidayuh ROME 10 Bible Online

ROME 10 - Biatah Bidayuh bible

ROME 10

¹Bara dingan ku, aku gruwŭn ngga siabo asŭng ku daya adŭp ku dog nyiramat! Munki masam aku mbŭh bidua ka Tapa yŭn ngara!

²Aku puan ngara rindu Tapa, pak ngara gibayuh biyŭn pinyipuan adi sawŭ.

³Ngara gibayuh puan munki gaya Tapa bada daya bamai ngga adŭp-I, pak gŭt-i ngara mbŭh pakai aran adi adŭp ngara ndai; ka mbŭh dŭh na adŭp ngara ka darŭm aran anŭ adi ngga Tapa bada daya bamai.

⁴Amai Kristus mbŭh bada Ukum-adat dŭh tia biguna, isa barang naan adi sabah dapŭd bamai ngga Tapa.

⁵ Moses nuris sakati pasar daya jadi bamai ngga Tapa so ka pinyita Ukum-adat: “Asi asi adi sita pinyipesan Ukum-adat re udip.”

⁶ Pak kayuh adi Surat-kudus nang pasar daya jadi bamai ngga Tapa so ka pinyabah inŭh sakati: “Angān dŭh bisa siken, Asi re di ka shorga di bada Kristus mūn?”

⁷“Dŭh gŭh angān bisa siken, Asi re mūn ka ong di sagān di pakat Kristus so kabŭs?”

⁸Kayuh adi-i nang inŭh sakati: “Agah so Tapa agi sindŭk angān, di baba ngan ka di atin ngan.” Anŭ inŭh, agah pasar daya patut sabah di Tapa.

⁹Kambŭi angān ngaku Jesus sawŭ Tuhan ka sabah Tapa pakat Ayŭh so kabŭs, angān re dog nyiramat.

¹⁰Amai so ka pinyabah ta inŭh ata dapŭd bamai ngga Tapa; darŭm ata ngaku ka kidaan di daya bŭkŭn ata mbŭh dog nyiramat.

¹¹ Surat-kudus nang, “Asi asi adi sabah di Ayŭh dŭh re asa.”

¹²Pinganang anŭ yŭn sopŭrŭg daya, adi bangsa Jahudi ngga adi dŭh bangsa Jahudi, sabab sopŭrŭg ngara brimun; Tapa inŭh ndi Tuhan yŭn sopŭrŭg daya ka nyiberkat sopŭrŭg daya adi mite turung so Ayŭh.

¹³ Sak adi nang Surat-kudus, “Barang naan adi bagan Tuhan yŭn mite turung re dog nyiramat.”

¹⁴Pak simuki ngara re bisa bagan Ayŭh yŭn mite turung kambŭi ngara dŭh sabah? Ka simuki ngara re bisa sabah kambŭi ngara gibayuh dingah agah anŭ? Ka simuki ngara re dingah agah anŭ kambŭi-i dŭh dog piagah?

¹⁵ Ka simuki agah dog piagah kambŭi daya tukang piagah mating dog pait? Sak adi nang Surat-kudus, “Munki masam sangŭn-i pimandŭg ngara adi taban Agah Kana!”

¹⁶ Pak dŭh sopŭrŭg daya ngaku Agah Kana anŭ. Adŭp Isaiah agi nang, “Tuhan, asi re sabah agah adi kieh taban?”

¹⁷Jadi meh, pinyabah mandŭg so dingah agah anŭ, ka agah anŭ mandŭg darŭm kieh nyuse Kristus.

¹⁸ Pak aku siken: Sawŭ kah ngara gibayuh dingah agah anŭ? Mbŭh ngara dingah, amai sak adi dog nang darŭm Surat-kudus: “Jawŭn sirŭŭn ngara mbŭh tambus ka barang yŭn di ong; pinganang ngara mbŭh ndŭg bŭngŭn ong.”

¹⁹ Pari aku siken: Dŭh kah daya Israel mirati? Adŭp Moses inŭh adi diŭ nam: “Aku re pakai daya adi dŭh dog nyirundeng jadi bangsa ngga bada daya Ku sina; ka ngga bangsa daya budo Aku re bada daya Ku baji.”

²⁰ Ka Isaiah rabis pus kan ayŭh nang, “Aku dog dapŭd daya adi dŭh jiroh aku; aku tatŭng di batŭh daya adi dŭh siken pasar aku.”

²¹ Pak pasar Israel ayŭh nang, “Ndi andu andu Aku mbŭh ton tangan Ku an kambat daya adi tangek ka adi gagā birawan.”