Read Biatah Bidayuh ROME 12 Bible Online

ROME 12 - Biatah Bidayuh bible

ROME 12

¹Bara dingan ku, sabab masi bās Tapa aku mite angān jugan adŭp ngan ka Tapa nimun sadis adi udip, bisig buang munos-I kiris. Anŭ inŭh aran adi batur ngga ta bituan di Ayŭh.

²Dŭhnyah bada adŭp ngan mun daya di ong ati, pak bada Tapa ngubah aran pikir ngan. Mun anŭ angān re tungang puan pinyiraan Tapa, anŭ inŭh kayuh adi kana, adi sukup batur ka adi pimunos asŭng-I.

³Ka sabab pinganggen-I adi sukup mandis di aku, aku nang di barang naan angān: Dŭhnyah nyikatuh adŭp ngan. Bada adŭp ngan sadang sadang di aran pikir-kira ngan, ka pirasa adŭp ngan nanyam ka pinyabah adi Tapa mbŭh nggen di angān.

⁴ Ata biyŭn bagŭ sakap di ndi pŭrŭng ganan ta, ka barang sakap anŭ agi guna adŭp-i.

⁵Simŭnŭ gŭh, sunggu ata bagŭ, ata mbŭh ndi pŭrŭng amai ata mbŭh ndi ngga Kristus, dog tubu ngga barang sakap so ndi pŭrŭng.

⁶ Jadi ata patut pakai barang masam pinganggen ta anŭ nanyam ka pinyirasi-mandis adi Tapa mbŭh nggen di ata. Kambŭi pinganggen ta inŭh kidaan agah so Tapa, ata patut kidaan-i nanyam ka pinyabah ta;

⁷Kambŭi-i bituan, ata patut bituan; kambŭi-i ngajar, ata patut ngajar;

⁸Kambŭi-i ngatat daya, ata patut ngatat daya. Asi asi adi samah kayuh-i ngga daya bŭkŭn patut samah-i ngga siabo asŭng-i; asi asi adi jadi pinguru isa-i ayŭh bandar nyiraja; asi asi adi mandis ngga daya patut ndai simŭnŭ ngga atin gaŭn.

⁹Pinyirindu dŭh siŭn dŭh an so atin tŭnggŭn. Tiru di kayuh adi arap, ka bidigŭng tagap di kayuh adi kana.

¹⁰Rindu di dingan ngan nimun daya Kristen, ka gruwŭn adŭp ngan stabi di dingan ngan.

¹¹Bandar nyiraja ka dŭhnyah tibanga. Ndai kraja Tuhan ngga siabo atin ngan.

¹²Bada pingarap ngan taban pinyigaŭn. Sabar di tika angān dog pinyusah ka ari simayang.

¹³Samah kayuh ngan ngga daya adi sirata ka kambat pinami ka darŭm arŭn ngan.

¹⁴ Mite Tapa nyiberkat ngara adi kisiis angān; sawŭ, mite Tapa nyiberkat ngara ka dŭh mangu ngara.

¹⁵Gaŭn ngga ngara adi gaŭn, muās ngga ngara adi muās.

¹⁶ Udip darŭm ndi itong dupan adŭp ngan. Dŭhnyah sambuh, pak pirapat adŭp ngan ndai kraja adi biasa.[16] Dŭhnyah pikir adŭp ngan bijak.

¹⁷Kambŭi agi daya ndai sarah di angān, dŭhnyah gŭh ndai sarah ngga maras ayŭh. Suba ndai kayuh adi sopŭrŭg daya puan nang kana.

¹⁸Ngga situngang ngan udip bamai ngga sopŭrŭg daya.

¹⁹ Dŭhnyah maras dendam, bara dingan ku, pak nyerah-i ka darŭm tangan Tapa. Amai Surat-kudus nang, “Aku re maras arap ngara, Aku re ngukum arap ngara, Tuhan nang.”

²⁰ Pak, sak adi nang Surat-kudus: “Kambŭi pinganyu ngan sibŭrŭk, paan ngara; kambŭi asŭng ngara badŭh, nggen di ngara nok; amai darŭm ndai simŭnŭ angān re bada ngara mangŭh.”

²¹Dŭhnyah bada arap ngarah angān, pak ngarah arap ngga kana.