Read Biatah Bidayuh ROME 14 Bible Online

ROME 14 - Biatah Bidayuh bible

ROME 14

¹ Kambat daya adi gayo pinyabah-i, pak dŭhnyah bikarit ngga ayŭh pasar kayuh adi-i nang batur di adŭp-i.

²Agi daya biyŭn pinyabah adi bada ayŭh man tadŭ kayuh, pak sianŭ adi ramah darŭm pinyabah kaŭs-i man dawŭn kudos.

³Sianŭ adi man tadŭ tadŭ kayuh dŭh siŭn ngamun sianŭ adi dŭh; ka sianŭ adi man kaŭs-i dawŭn kudos dŭh siŭn nyarah sianŭ adi man tadŭ tadŭ kayuh; amai Tapa mbŭh trima daya anŭ gŭh.

⁴Asi meh kuu adi an nyarah daya-gaji adi daya bŭkŭn dapu? Adŭp Tuan ngara inŭh adi bisa natu batur bait dŭh pingandai ngara, ka Tuhan inŭh adi bada ngara ndai kayuh adi batur.

⁵Kada daya agi nang agi andu adi rabis biguna so andu adi bŭkŭn; ka adi bŭkŭn nang sopŭrŭg andu agi samah. Barang naan ata patut bandar ndai pikir adŭp ta.

⁶Ngara adi nang taŭn agi andu adi rabis biguna so adi bŭkŭn patut ndai simŭnŭ darŭm stabi di Tuhan; ngara adi man tadŭ tadŭ kayuh patut ndai simŭnŭ darŭm stabi di Tuhan, sabab ngara nggen trima kaseh di Tapa yŭn pinguman anŭ. Ngara adi man kada kayuh adŭ patut ndai simŭnŭ darŭm stabi di Tuhan; ka ngara gŭh nggen trima kaseh di Tapa.

⁷Ata dŭh udip yŭn adŭp ta adŭ, ka ata dŭh kabŭs yŭn adŭp ta adŭ.

⁸Kambŭi ata udip, anŭ mbŭh yŭn Tuhan, ka kambŭi ata kabŭs, anŭ mbŭh yŭn Tuhan. Jadi bait-i ata udip puan kah kabŭs, ata mbŭh daya Tuhan.

⁹Amai Kristus kabŭs ka mbŭh makat udip bauh siŭn-I jadi Tuhan daya adi udip ngga adi kabŭs.

¹⁰ Ka angān meh, adi man dawŭn kudos adŭ, mani angān nyarah daya bŭkŭn? Ka angān adi man tadŭ tadŭ kayuh, mani angān ngamun dingan ngan adi samah sabah? Sopŭrŭg ta re bisara di sirung jawin Tapa.

¹¹ Amai Surat-kudus nang, “Siragi Aku ati Tapa adi udip, nang Tuhan, barang naan re sidikang nyambah Aku, ka barang naan re ngaku Aku Tapa.”

¹²Barang naan ata meh re tanggong pingandai adŭp ta di sirung jawin Tapa.

¹³Ngapŭi meh, ja ata dŭh tia nyarah dingan ta. Sipatut-i angān natu adŭp ngan dŭh ndai kayuh adi bada dingan ngan sikak puan kah rabu darŭm dosa.

¹⁴Sabab aku mbŭh ndi ngga Tuhan Jesus, aku tatu puan nang mating pinguman sawŭ kais; pak kambŭi angān sabah nang agi pinguman kais, pinguman anŭ taŭn-i mbŭh kais di angān.

¹⁵Kambŭi angān kandam atin dingan ngan sabab kayuh adi angān man, pingandai adi mun anŭ taŭn-i dŭh so pinyirindu. Dŭhnyah bada pinguman adi angān man pirusak sianŭ adi Kristus ko nubos!

¹⁶Dŭhnyah bada kayuh adi angān nyirundeng kana dapŭd dŭn adi arap.

¹⁷Amai Pinyipritah Tapa dŭh inŭh pasar kayuh adi ata man puan kah kayuh adi ata nok, pak pasar pinŭnggŭn, damai, ka pinyigaŭn so Roh Kudus.

¹⁸Ka kambŭi simŭnŭ angān bituan di Kristus, angān pimunos asŭng Tapa ka dog muji daya.

¹⁹Ngapŭi meh, dŭh siŭn dŭh pinŭtŭn ta di[17] kayuh adi taban damai ka adi nagap dingan.

²⁰Dŭhnyah sitagar pinguman ngan, angān pirusak kayuh adi Tapa ko ndai. Sopŭrŭg pinguman bisa dog man, pak-i sarah inŭh nŭŭh man kayuh adi bada daya bŭkŭn rabu darŭm dosa.

²¹Kayuh adi batur ndai ngan inŭh dŭhnyah man dagin, dŭhnyah nok wain, ka dŭhnyah ndai kayuh adi bada dingan ngan adi samah sabah rabu.

²²Anŭ adi kuu sabah pasar kayuh anŭ, isa-i kuu ngga Tapa adŭ puan. Sanang inŭh ngara adi dŭh kinyam sarah kan ngara ndai kayuh adi ngara puan nang batur!

²³Pak kambŭi ngara dŭh paŭh puan re ngara man kah dŭh pinguman anŭ, Tapa nunggu ngara kambŭi ngara man-i, sabab pingandai ngara dŭh bisangan di pinyabah. Ka tadŭ kayuh adi dŭh bisangan di pinyabah taŭn-i dosa.