Read Biatah Bidayuh ROME 15 Bible Online

ROME 15 - Biatah Bidayuh bible

ROME 15

¹Ata adi tagap darŭm pinyabah patut turung dingan ta adi ramah gŭrŭng pinyusah-i. Ata patut dŭh pimunos asŭng adŭp ta,

²pak patut pimunos asŭng dingan ta adi samah sabah yŭn kana adŭp ngara, ngga pijog ngara darŭm pinyabah.

³ Amai Kristus dŭh-I pimunos asŭng adŭp-I. Pak sak adi nang Surat-kudus, “Pinganang arap adi daya nang maka angān mbŭh nyatŭk Aku.”

⁴Sopŭrŭg kayuh adi dog nuris darŭm Surat-kudus mbŭh dog nuris ngga ngajar ata, siŭn ata bisa biyŭn pingarap so ka atin sabar ngga pingatat adi Surat-kudus nggen di ata.

⁵Ka isa-i Tapa, adi ngatat ka adi bada ata sabar, turung angān udip ngga ndi atin dupan adŭp ngan darŭm angān tunda suto danding Kristus Jesus,

⁶isa sopŭrŭg ngan samah samah ngga ndi sirŭŭn muji Tapa adi Sama Tuhan ta Jesus Kristus.

⁷Trima dingan ngan, yŭn bragah Tapa, nimun Kristus mbŭh trima angān.

⁸Amai aku kidaan di angān, Kristus mandŭg siŭn jadi keya ka urun yŭn daya Jahudi, ngga kiren Tapa sawŭ tŭtŭd, darŭm-I an pijadi janji-I adi-I ko ndai ngga tayung-babuk ngara,

⁹ buang ngga turung daya adi dŭh bangsa Jahudi muji Tapa amai masi-I. Sak adi nang Surat-kudus, “Ngapŭi aku re muji Kaam di dupan daya adi dŭh bangsa Jahudi; Aku re nang ragu puji ka Kaam.”

¹⁰ Agi gŭh dog nang, “Gaŭn meh angān, daya adi dŭh bangsa Jahudi, ngga bara daya adi Tapa mbŭh mien!”

¹¹ Agi gŭh-i nang, “Muji Tuhan, sopŭrŭg ngan daya adi dŭh bangsa Jahudi; muji Ayŭh, sopŭrŭg daya!”

¹² Ka Isaiah gŭh nang, “Ndi naan so sesang Jesse re mandŭg; Ayŭh re mandŭg di mritah daya adi dŭh bangsa Jahudi, ka ngara na pingarap ngara di Ayŭh.”

¹³Isa-i Tapa, adi nggen pingarap di angān, ngisi atin ngan ngga pinyigaŭn ka damai sabab angān sabah di Ayŭh, isa ngga kuasa Roh Kudus pingarap ngan rabis jadi.

¹⁴Bara dingan ku: Aku taŭn puan angān mbŭh raru kana, puan sopŭrŭg kayuh adi angān patut ngajar di dingan ngan.

¹⁵Pak darŭm surat ati aku nyabŭt ngga timatŭk kayuh adi aku ko pari kidaan di angān isa angān dŭh kambŭt. Aku bada-i timatŭk sabab Tapa mbŭh raru kana ngga aku,

¹⁶an bada aku jadi urun Kristus Jesus yŭn daya adi dŭh bangsa Jahudi. Aku kraja keya ka imam nyuse Agah Kana so Tapa, siŭn Roh Kudus bisa bada daya adi dŭh bangsa Jahudi jadi keya ka pinganggen adi tungang dog trima Tapa.

¹⁷Amai aku mbŭh ndi ngga Kristus Jesus, meh, aku bisa mingangŭn di kraja ku yŭn Tapa.

¹⁸Aku re ngga atin pagan minyu kaŭs pasar kayuh adi Kristus mbŭh ndai so aku ngga nyiruton daya adi dŭh bangsa Jahudi da tunda pinganang Tapa. Ayŭh mbŭh ndai simŭnŭ so ka piminyu ngga pingandai,

¹⁹so kuasa pingandai-nginga ngga pingandai-saruh, ka so kuasa Roh Kudus. Ngapŭi meh, darŭm panu bijaruh so Jerusalem ndŭg Illyricum, aku agi piagah Agah Kana pasar Kristus.

²⁰Kayuh adi aku raru raan inŭh piagah Agah Kana di barang yŭn di yŭn Kristus gibayuh dog dingah, sabab aku dŭh an pijog kraja ku di tunduh pinagap-rasan adi daya bŭkŭn ko na.

²¹ Sak adi nang Surat-kudus, “Daya adi bŭn dog kidaan pasar Ayŭh re kiris, ka daya adi gibayuh dingah re mirati.”

²² Aku siraru batŭn, dŭh tungang munan angān.

²³Pak amai madin aku mbŭh kubo kraja ku di tarun tana tura kamati ka amai aku taŭn mbŭh bisawa sawa an bidapŭd ngga angān,

²⁴aku harap aku tungang bidapŭd ngga angān kari ati. Aku an bidapŭd ngga angān buang dog turung ngan di pimanu ku ka Spain, ripas aku ko nyikasap pimunos adŭp ku bigaur ngga angān.

²⁵ Madin tong-i, sunggu mŭnŭ, aku di ka Jerusalem taban pinurung ka bara daya adi Tapa mbŭh mien diginŭ.

²⁶Amai eklisia di Macedonia ngga di Achaia mbŭh ngga siabo asŭng-i natu an nggen pinganggen ngga turung bara adi sirata di dupan bara daya adi Tapa mbŭh mien di Jerusalem.

²⁷ Pingatur anŭ mbŭh so adŭp ngara, amai sibatur-i ngara rada adŭp-i patut ndai simŭnŭ yŭn ngara. Amai daya Jahudi mbŭh samah berkat roh ngara ngga daya adi dŭh bangsa Jahudi, daya adi dŭh bangsa Jahudi patut pakai kayuh adi ngara biyŭn ngga turung daya Jahudi.

²⁸Kan aku muko ndai simŭnŭ, nyerah sopŭrŭg duit anŭ adi ko dog nguruk yŭn ngara, aku re matak ka Spain ka nyasa angān di pimanu ku.

²⁹Kan aku mandŭg ka angān, aku puan aku re mandŭg ngga berkat Kristus ngga sipuno-i.

³⁰Aku ngasu angān, adi bara dingan ku, sabab Tuhan ta Jesus Kristus ka sabab pinyirindu adi Roh Kudus nggen: sua ngga aku bidua ka Tapa yŭn ku.

³¹Simayang mite aku dog tak so bara daya adi dŭh sabah di Jesus di Judea, ka isa pinurung adi aku taban ka Jerusalem dog trima bara daya adi Tapa mbŭh mien.

³²Komŭnŭ kambŭi so pinyiraan Tapa, aku re mandŭg ka angān ngga atin adi sukup gaŭn buang ku rŭŭ nyitiro ngga angān.

³³Isa-i Tapa, adi atak damai, agi ngga sopŭrŭg ngan. Amen.