Read Biatah Bidayuh ROME 16 Bible Online

ROME 16 - Biatah Bidayuh bible

ROME 16

¹Aku raan angān puan Phoebe dingan ta adi turung eklisia di Cenchreae.

²Kambat ayŭh ngga adŭn Tapa, nimun patut angān daya adi ko dog mien, ka turung ayŭh kambŭi ayŭh biguna di pinurung so angān; amai ayŭh adi mbŭh turung bagŭ daya samŭn adŭp ku.

³ Aku pait tabi ka Priscilla ngga Aquila, adi samah nyiraja yŭn Kristus Jesus ngga aku;

⁴ngara ko birani ton apŭg asŭng-i yŭn ku. Aku biyŭn atin trima kaseh di ngara; dŭh-i aku adŭ pak sopŭrŭg daya eklisia adi dŭh bangsa Jahudi ani.

⁵Tabi gŭh ka daya eklisia adi siraru tikuruk di ramin ngara. Tabi ka dingan ku Epaenetus, adi mbŭh sibungas daya darŭm utung rais Asia adi sabah di Kristus.

⁶Tabi ka Mary, adi ko bandar nyiraja yŭn ngan.

⁷Tabi gŭh ka Andronicus ngga Junia,[18] ngara adi samah daya Jahudi adi ko agi ngga aku darŭm jer; ngara mbŭh dog puan bara pinyuruh, ka mbŭh jadi Kristen diŭ so aku.

⁸Tabi ku ka Ampliatus, dingan adi aku rindu adi sabah di Tuhan.

⁹Tabi gŭh ka Urbanus, adi samah nyiraja yŭn Kristus ngga ata, ka Stachys ani, dingan adi aku rindu.

¹⁰Tabi ka Apelles, urun Kristus adi tŭtŭd. Tabi ka ngara adi so rawang Aristobulus.

¹¹Tabi ka Herodion, adi samah daya Jahudi; tabi ka bara Kristen darŭm rawang Narcissus.

¹²Tabi ku ka Tryphaena ngga Tryphosa, adi nyiraja yŭn Tuhan, ka dingan ku Persis adi aku rindu, adi ko ndai bagŭ kraja yŭn Tuhan.

¹³ Aku pait tabi ka Rufus, sianŭ adi traŭn darŭm kraja Tuhan, ka di sindŭ-i, adi ko nakit ngga aku keya ka ngga anak adŭp-i.

¹⁴Tabi ku ka Asyncritus, Phlegon, Hermes, Patrobas, Hermas, ka sopŭrŭg daya Kristen adi agi ngga ngara.

¹⁵Tabi ka Philologus ngga Julia, ka Nereus ngga sude dayung-i, ka Olympas samŭn sopŭrŭg daya adi Tapa mbŭh mien adi agi ngga ngara.

¹⁶Tabi dingan ngan ngga tabi tandā damai. Sopŭrŭg daya eklisia Kristus pait tabi ka angān.

¹⁷Aku ngasu angān adi bara dingan ku: nakit jaga adŭp ngan so ngara adi kiruyok nyibarai daya ka adi ngaso pinyabah daya, buang rawan ajar adi angān ko trima. Pijo adŭp ngan so ngara!

¹⁸Amai ngara adi ndai kayuh adi mun anŭ dŭh-i bituan di Kristus Tuhan ta, pak ndai kana yŭn adŭp-i. Ngga bang bang piminyu adi mandis ka ngga pinganang adi nganju katuh daya ngara nipu daya adi dŭh puan ani ani.

¹⁹Sopŭrŭg daya mbŭh dingah pasar angān adi mbŭh tŭtŭd di Agah Kana anŭ, ka sabab anŭ aku mbŭh sanang asŭng di angān. Aku raan angān bijak jeja ka kayuh adi kana, pak bawa jeja ka kayuh adi arap.

²⁰Ka Tapa, adi atak damai, re rikas pirandŭk Shetan di ribo kaja ngan. Pinyirasi-mandis Tuhan ta Jesus, agi ngga angān.

²¹ Timothy, adi samah nyiraja ngga aku, pait tabi ka angān; simŭnŭ gŭh Lucius, Jason, ka Sosipater, adi samah daya Jahudi.

²²Aku, Tertius, pinuris surat ati, pait tabi Kristen ka angān.

²³ Gaius adi kambat aku samŭn daya eklisia ka ramin-i, pait tabi ka angān; Erastus, tukang digŭng duit kupo, ngga dingan ta Quartus pait tabi ka angān. [

²⁴Pinyirasi-mandis Tuhan ta Jesus Kristus agi ngga sopŭrŭg ngan. Amen.]

²⁵Ja ata nggen bragah ka Tapa! Ayŭh tungang bada angān mijog tagap darŭm pinyabah ngan, nanyam ka Agah Kana adi aku nyuse pasar Jesus Kristus, ka nanyam ka pinandŭng atur-pinyiraan Tapa adi ko dog sukan bisawa sawa adi mbŭh ripas.

²⁶Pak madin atur-pinyiraan Tapa mbŭh dog kiren so surat bara nabi; buang so pinyipesan Tapa adi udip adu adu ayŭh mbŭh dog kidaan di sopŭrŭg bangsa, isa sopŭrŭg bisa sabah ka tunda pinganang Tapa.

²⁷Bragah ka Tapa, Ayŭh adi sadi adŭp-I Tapa ka adi sadi adŭp-I bijak. Bragah ka Ayŭh ndŭg situi tui sabab kayuh adi Jesus Kristus ko ndai! Amen.