Read Biatah Bidayuh ROME 3 Bible Online

ROME 3 - Biatah Bidayuh bible

ROME 3

¹Ani kana-i nŭŭh jadi daya Jahudi? Ani kana-i nŭŭh bisunat?

²Taŭn-i kana darŭm bagŭ yŭn-i! Sibungas-i Tapa nggen pinganang-I ka daya bangsa Jahudi.

³Pak munki meh kambŭi agi so ngara dŭh sabah, agi kah sirati-i Tapa dŭh bisa dog sabah?

⁴ Manŭn dŭh! Tapa kidaan kayuh adi sawŭ, sunggu sopŭrŭg manusia pingadong. Sak adi nang Surat-kudus, “Kaam dŭh bisa dŭh batur kan Kaam minyu; Kaam dŭh bisa dŭh manang kan Kaam bisara.”

⁵Pak munki kambŭi pingandai sarah ta granan kiren nang Tapa agi batur? Bisa kah ata nang Tapa sarah kan Ayŭh ngukum ata? (Ati taŭn mbŭh biasa daya nang.)

⁶Mating aran-i! Kambŭi Tapa dŭh tŭnggŭn simuki meh Ayŭh re bisa nggen bisara di tunduh ong?

⁷Pak kambŭi sabab pingandai kadong, kayuh adi sawŭ pasar Tapa jadi granan tatŭng ndŭg ka dog muji, mani meh garang aku dog nunggu mun daya bidosa?

⁸Mani dŭh nang, “Ja ata ndai arap isa kayuh kana timbur”? Agi daya, taŭn mbŭh pimangŭh aku darŭm-i nyarah aku nang aku agi minyu sakanŭ! Ngara re dog nunggu, nimun patut.

⁹Munki meh, agi kah ata daya Jahudi kana dŭ so daya adi dŭh bangsa Jahudi? Mating aran-i![2] Muko aku kiren nang daya Jahudi ngga daya adi dŭh bangsa Jahudi agi samah di ribo kuasa dosa.

¹⁰ Sak adi nang Surat-kudus: “Mating daya adi sawŭ tŭnggŭn,

¹¹mating daya adi sawŭ bijak puan kah adi nyambah Tapa.

¹²Sopŭrŭg ngara mbŭh bu mangān Tapa; sopŭrŭg ngara mbŭh sarah; mating daya ndai kayuh adi batur, ndi naan mating gŭh.

¹³ Pinganang ngara mbŭh keya ka puno ngga rubang pinyikabŭs; ngara mbŭh raru pandai kadong, Bang piminyu ngara mbŭh keya ka rasun jippŭh ruah so baba ngara;

¹⁴ piminyu ngara taŭn-i pangu adi bisā adŭ.

¹⁵ Ngara rikas kandam ka siŭ daya;

¹⁶Diki ngara panu ngara taban pinyirusag ngga pinyirubuh.

¹⁷Ngara dŭh puan aran pinyidamai,

¹⁸ ka bŭn adŭ birajar taru di Tapa.”

¹⁹Madin ata puan nang sopŭrŭg kayuh darŭm Ukum-adat taŭn mbŭh yŭn daya adi udip di ribo Ukum-adat, siŭn sopŭrŭg daya dŭh bisa nang ani ani ngga nutu sarah-i, ka yŭn sopŭrŭg daya dog taban bisara di sirung jawin Tapa.

²⁰ Amai mating inŭh daya bamai ngga Tapa so ndai kayuh adi Ukum-adat bada; Ukum-adat batur-i bada ata puan kambŭi ata bidosa.

²¹Gaya Tapa bada ata bamai ngga adŭp-I mbŭh dog pinandŭng madin. Anŭ mating gagit-i ngga ukum-adat, sunggu Ukum-adat Moses ngga bara nabi agi nang sakanŭ.

²² Tapa bada daya bamai ngga adŭp-I so ka pinyabah ngara di Jesus Kristus. Tapa ndai simŭnŭ di sopŭrŭg daya adi sabah di Kristus, sabab sopŭrŭg mbŭh brimun di batŭh Tapa:

²³barang naan mbŭh bidosa ka mbŭh jo so Tapa adi nyiramat ngara.

²⁴Pak sabab pinyirasi-mandis Tapa adi pinganggen bās-I sopŭrŭg mbŭh dog bada bamai ngga adŭp-I so Kristus Jesus, adi pirupas ngara.

²⁵Tapa mbŭh jugan Ayŭh, isa ngga deya-I[3] Ayŭh jadi aran adi ngga dosa daya dog apun so ka pinyabah ngara di Ayŭh. Tapa ndai simŭnŭ ngga kiren pinŭnggŭn-I. Jah-i Ayŭh sabar ka kambŭt dosa ngara; pak di jaman ati Ayŭh nura dosa ngara, ngga kiren pinyitŭnggŭn-I. Simŭnŭ Tapa kiren adŭp-I tŭnggŭn, buang-I bada bamai barang naan daya adi sabah di Jesus.

²⁷Ani meh garang bisa ta yŭn mingangŭn? Mating! Ka ani meh sitagar-i? Agi kah-i sabab ata sita Ukum-adat? Dŭh, pak sabab ata sabah.

²⁸Ata mbŭh puan nang daya bamai ngga Tapa adŭ-i so ka pinyabah, ka dŭh-i so ndai kayuh adi Ukum-adat pesan.

²⁹Agi kah Tapa anŭ Tapa daya Jahudi adŭ? Dŭh kah Ayŭh Tapa daya adi dŭh bangsa Jahudi ani? Ayŭh taŭn-I sawŭ Tapa daya adi dŭh bangsa daya Jahudi ani.

³⁰ Tapa inŭh ndi, ka Ayŭh bada daya Jahudi bamai ngga adŭp-I sabab pinyabah ngara, ka re bada daya adi dŭh bangsa Jahudi bamai ngga adŭp-I so ka pinyabah ngara.

³¹Agi kah sirati-i ngga pinyabah ati ata mbŭh kinating Ukum-adat? Dŭh, manŭn dŭh; ata bidigŭng tagap dieh kidŭ-i.