Read Biatah Bidayuh ROME 5 Bible Online

ROME 5 - Biatah Bidayuh bible

ROME 5

¹Amai madin ata mbŭh bamai ngga Tapa so ka pinyabah, ata biyŭn[4] damai ngga Tapa so ka Tuhan ta Jesus Kristus.

²Ayŭh mbŭh taban ata so ka pinyabah da kinyam pinyirasi-mandis Tapa, di yŭn ata madin udip. Ngapŭi ata mingangŭn[5] di pingarap ta adi re samah dapu bragah Tapa!

³Ata gŭh mingangŭn[6] di pinyusah ta, sabab ata puan nang pinyusah pijadi pinyitŭtŭd atin,

⁴ka pinyitŭtŭd atin inŭh adi Tapa raan, adi bada ata dapŭd pingarap.

⁵Pingarap anŭ dŭh re bada ata asa, amai Tapa, ngga Roh Kudus adi pinganggen-I di ata, mbŭh ren darŭm atin ta pinyirindu-I.

⁶Amai di tika ata dŭh dapŭd ndai ani ani, Kristus kabŭs yŭn bara adi ginaka di tika adi adŭp Tapa mbŭh mien.

⁷Dŭh-i udah daya re kabŭs yŭn daya adi tŭnggŭn, sunggu agi daya birani kabŭs yŭn daya adi kana.

⁸Pak Tapa mbŭh kiren munki masam bās pinyirindu-I di ata, ka sitadŭn ata gibabŭ bidosa Kristus mbŭh kabŭs yŭn ta.

⁹Ngga deya-I[7] ata madin mbŭh bamai ngga Tapa; jung rabis-i meh ngga adŭp-I ata re dog nyiramat so baji Tapa!

¹⁰Ata ko jadi pinganyu Tapa, pak Ayŭh mbŭh ndai ata da jadi dingan-I so ka pinyikabŭs Anak-I. Amai madin ata mbŭh dingan Tapa, jung rabis-i meh ata re dog nyiramat amai Jesus ko kabŭs yŭn ta!

¹¹Pak dŭh-i anŭ adŭ; ata gaŭn sabab kayuh adi Tapa mbŭh ndai so Tuhan ta Jesus Kristus, adi madin mbŭh ndai ata da jadi dingan Tapa.

¹² Dosa mandŭg ka ong so ka ndi naan daya, ka dosa-i taban pinyikabŭs. Sitagar anŭ, pinyikabŭs mbŭh sawit ka sopŭrŭg bangsa manusia sabab barang naan daya mbŭh bidosa.

¹³Dosa mbŭh agi darŭm ong diŭ so Ukum-adat dog nggen; pak di yŭn ukum-adat mating, dosa mating gŭh dog ngitong.

¹⁴Pak so jaman Adam ndŭg jaman Moses, pinyikabŭs nguasa sopŭrŭg bangsa manusia, samŭn ngara adi dŭh bidosa mun gaya Adam darŭm-i nyibireu pinganang Tapa. Adam inŭh suto sianŭ adi re mandŭg.

¹⁵Pak ngara duwŭh dŭh samah, sabab pinganggen bās Tapa agi bŭkŭn so dosa Adam. Mbŭh sawŭ inŭh daya bagŭ kabŭs sabab dosa ndi naan daya anŭ. Pak pinyirasi-mandis Tapa agi rabis bās, ka mbŭh pinganggen bās-I di bara daya so ka pinyirasi-mandis ndi naan Daya, Jesus Kristus.

¹⁶Ka agi bŭkŭn-i pinganggen Tapa so dosa ndi naan daya anŭ. Ripas ndi naan anŭ ndai dosa, Tapa nang “Sarah”; pak ripas sopŭrŭg mbŭh bidosa, pinganggen adi raru kana-i mandŭg adi nang “Dŭh sarah!”

¹⁷Mbŭh sawŭ, so dosa ndi naan daya, pinyikabŭs mbŭh piguru nguasa sabab ndi naan daya anŭ. Pak jung rabis bās-i kayuh adi jadi so pingandai ndi naan daya, Jesus Kristus! Sopŭrŭg adi kambat pinyirasi-mandis Tapa ka mbŭh bamai ngga Tapa re nguasa darŭm pimudip so ka Kristus.

¹⁸Ngapŭi, darŭm ndi naan bidosa sopŭrŭg daya dog nunggu, simŭnŭ gŭh pingandai tŭnggŭn so ndi naan daya pirupas ka nggen udip di sopŭrŭg daya.

¹⁹Ka nimun sopŭrŭg daya jadi daya bidosa so ndi naan daya adi tirawan pinganang Tapa, simŭnŭ gŭh sopŭrŭg daya re bamai ngga Tapa sabab ndi naan daya tunda pinganang Tapa.

²⁰Ukum-adat dog nggen siŭn-i nambah kraja sarah; pak di yŭn dosa bitambah, pinyirasi-mandis Tapa rabis bitambah.

²¹Ngapŭi meh, nimun dosa taban pinyikabŭs ka daya adi bidosa, simŭnŭ gŭh pinyirasi-mandis Tapa biyŭn kuasa bada daya bamai ngga Tapa, ndŭg ka taban ata ka udip adi sawŭ adi tan adu adu so ka Jesus Kristus adi Tuhan ta.