Read Biatah Bidayuh ROME 6 Bible Online

ROME 6 - Biatah Bidayuh bible

ROME 6

¹Ani re ta nang, garang? Patut kah ata pijuu udip darŭm dosa isa pinyirasi-mandis Tapa bitambah?

²Manŭn dŭh! Ata mbŭh kabŭs yŭn dosa, ka simuki ata re babŭ udip darŭm dosa?

³Amai ata mbŭh tatu puan nang kan ata dog baptisa ka darŭm Kristus Jesus, ata dog baptisa ka darŭm pinyikabŭs-I.

⁴ Ngga baptisa ta ata dog kubur ngga Ayŭh ka samah ngga Ayŭh darŭm pinyikabŭs-I, siŭn nimun Kristus mbŭh dog pakat so kabŭs ngga kuasa Sama adi bragah, simŭnŭ gŭh ata bisa dapŭd udip adi bauh.

⁵Amai sabab ata mbŭh jadi ndi ngga Ayŭh darŭm ata kabŭs mun Ayŭh, simŭnŭ gŭh ata re jadi ndi ngga Ayŭh darŭm ata dog pakat udip bauh mun Ayŭh.

⁶Ka ata puan nang pimudip amba ta mbŭh dog siŭ ngga Kristus di atuh rigang, siŭn kuasa pŭrŭng adi bidosa bisa dog pirabur, isa ata dŭh tia jadi urun dosa.

⁷Amai kan ata kabŭs, ata dog pirupas so kuasa dosa.

⁸Amai ata mbŭh kabŭs ngga Kristus, ata sabah nang ata re udip gŭh ngga Ayŭh.

⁹Amai ata puan nang Kristus mbŭh dog pakat so kabŭs ka dŭh re tia kabŭs; pinyikabŭs dŭh re tia nguasa Ayŭh.

¹⁰Ngapŭi meh, sabab Ayŭh kabŭs, dosa dŭh biyŭn kuasa di tunduh Ayŭh; ka madin Ayŭh udip, ka udip yŭn Tapa.

¹¹Simŭnŭ gŭh angān patut kira adŭp ngan mbŭh kabŭs, kambŭi jeja ka dosa, pak mbŭh udip yŭn Tapa darŭm Kristus Jesus.

¹²Dosa dŭh siŭn nguasa pŭrŭng ngan, te-i angān tunda pinyiripong pŭrŭng ngan rai-i.

¹³Dŭh gŭh angān siŭn bada tadŭ sakap pŭrŭng ngan bidosa ngga ndai tadŭ mun pingandai ginaka. Pak, nggen adŭp ngan di Tapa, nimun daya adi mbŭh dog pakat so kabŭs, ka nyerah abo abo adŭp ngan di Ayŭh yŭn pingandai tŭnggŭn.

¹⁴Dosa dŭh siŭn jadi tuan ngan; amai angān dŭh udip di ribo ukum-adat pak di ribo pinyirasi-mandis Tapa.

¹⁵Ani, meh? Patut kah ata ndai dosa, sabab ata dŭh di ribo ukum-adat pak di ribo pinyirasi-mandis Tapa? Mating aran-i re patut!

¹⁶Tatu angān puan nang kambŭi angān bituan di daya, angān mbŭh jadi urun-i; kambŭi angān bituan di dosa, angān mbŭh urun-i ka angān re kabŭs; kambŭi angān bituan di Tapa, angān re bamai ngga Tapa.

¹⁷Pak trima kaseh di Tapa! Amai sunggu angān ko jadi urun dosa, angān mbŭh tunda ngga siabo atin ngan ajar adi sawŭ adi mbŭh dog nggen di angān.

¹⁸Angān mbŭh dŭh tia urun dosa ka mbŭh jadi urun pinŭnggŭn.

¹⁹(Aku minyu pakai piminyu adi biasa sabab angān kurang mirati.) Dawŭ-i angān ko nyerah adŭp ngan abo abo jadi urun pimudip adi kais ngga pinŭtŭn adi ginaka. Ka simŭnŭ gŭh angān dŭh siŭn dŭh an nyerah adŭp ngan abo abo jadi urun pinŭnggŭn yŭn pinŭtŭn adi kudus.

²⁰Di andu angān jadi urun dosa, angān rupas so pinŭnggŭn.

²¹Ani utung ngan so pingandai ngan anŭ adi angān mangŭh ngarun madin? Pinŭbŭn kayuh adi mun anŭ inŭh pinyikabŭs!

²²Pak madin angān mbŭh dog pirupas so dosa ka mbŭh jadi urun Tapa. Utung ngan inŭh pimudip adi dog jugan ka Tapa, ka pinŭbŭn-i inŭh udip adi sawŭ adi tan adu adu.

²³Dosa nggen pinyikabŭs ndu upah; pak pinganggen bās Tapa inŭh udip adi sawŭ adi tan adu adu ngga Kristus Jesus Tuhan ta.