Read Biatah Bidayuh ROME 7 Bible Online

ROME 7 - Biatah Bidayuh bible

ROME 7

¹Angān mbŭh tatu puan kayuh adi re ku nang, bara dingan ku, sabab sopŭrŭg ngan puan pasar ukum-adat. Ukum-adat nguasa daya, siragi-i ngara udip.

²Dayung adi banan, ndu ta suto, dog ngabŭt ukum-adat di banŭh-i; anŭ inŭh sawŭ di ayŭh siragi banŭh-i udip. Kambŭi banŭh-i kabŭs, ayŭh rupas so ukum adi ngabŭt ayŭh di banŭh-i.

³Ngapŭi meh, kambŭi ayŭh nyiramin ngga dari bŭkŭn darŭm banŭh-i babŭ udip, ayŭh tanggah; pak kambŭi banŭh-i kabŭs, ayŭh dŭh dog ngabŭt tia ka dŭh-i tanggah kambŭi ayŭh banan bauh.

⁴Simŭnŭ inŭh-i di angān, bara dingan ku. Kambŭi tura ka Ukum-adat, angān gŭh mbŭh kabŭs sabab angān mbŭh ndi so pŭrŭng Kristus; ka madin angān dog dapu-I adi mbŭh dog pakat so kabŭs siŭn ata bisa jadi biguna yŭn ndai kraja Tapa.

⁵Amai kan ata udip nimun ka tibiat adŭp ta manusia, Ukum-adat mirasang pinyiripong adi sarah darŭm pŭrŭng ta, ka pinŭbŭn sopŭrŭg kayuh adi ata ndai inŭh pinyikabŭs.

⁶Madin ata mbŭh rupas so Ukum-adat, sabab ata mbŭh kabŭs yŭn kayuh adi ko nguasa ata. Ata mbŭh dŭh tia bituan pakai aran adi amba, anŭ inŭh aran ukum-adat adi dog nuris, pak pakai aran adi bauh so Roh Kudus.

⁷ Bisa kah ata nang garang, Ukum-adat kayuh adi bidosa? Manŭn dŭh! Pak Ukum-adat inŭh adi bada aku puan ani dosa. Kambŭi Ukum-adat mating nang, “Dŭhnyah ripong di kayuh adi daya dapu,” aku taŭn dŭh re puan pinyiripong adi mun anŭ.

⁸Pak ngga pinyipesan anŭ dosa mbŭh dapŭd aran-i pijadi barang masam pinyiripong darŭm aku. Kambŭi ukum-adat mating, dosa mbŭh keya ka mating gŭh.

⁹Adŭp ku dawŭ-i udip dŭh di ribo ukum-adat; pak kan pinyipesan anŭ mandŭg, dosa piguru nguasa,

¹⁰ka aku kabŭs. Ka pinyipesan anŭ adi patut taban udip, di aku ayŭh taban pinyikabŭs.

¹¹ Dosa mbŭh dapŭd pluang-i, ka ngga pinyipesan anŭ dosa mbŭh nipu aku ka siŭ aku.

¹²Ngapŭi meh, adŭp Ukum-adat anŭ kudus, ka Pinyipesan anŭ kudus, batur, ka kana.

¹³Pak agi kah sirati-i kayuh adi kana mbŭh bada aku kabŭs? Dŭh! Dosa inŭh adi bada aku kabŭs; pakai kayuh adi kana, dosa taban pinyikabŭs ka aku, siŭn ani sibandar dosa bisa dog pinandŭng. Jadi meh, ngga Pinyipesan anŭ dosa dog kiren munki masam sipŭ-i.

¹⁴Ata puan nang Ukum-adat kayuh roh; pak aku ati manusia, dog jua keya ka urun yŭn dosa.

¹⁵ Aku dŭh mirati kayuh adi ndai ku; amai aku dŭh ndai kayuh adi aku raan, pak kayuh adi aku tiru.

¹⁶Amai kayuh adi aku ndai inŭh kayuh adi aku dŭh raan ndai, sirati-i aku situju nang Ukum-adat agi batur.

¹⁷Jadi sibatur-i aku dŭh inŭh adi ndai kayuh anŭ; dosa adi rŭŭ darŭm aku inŭh adi ndai-i.

¹⁸Aku puan nang pinyikana mating darŭm aku, anŭ inŭh di darŭm tibiat manusia ku. Amai sunggu pinyiraan an ndai kayuh kana agi darŭm aku, aku dŭh tungang ndai-i.

¹⁹Aku dŭh ndai kayuh kana adi aku raan, pak ndai kayuh arap adi aku dŭh raan ndai.

²⁰Kambŭi aku ndai kayuh adi aku dŭh raan ndai, sirati-i aku dŭh inŭh sianŭ adi ndai-i; dosa adi rŭŭ darŭm aku inŭh adi ndai-i.

²¹Ukum-adat ati mbŭh kiren di aku nang kayuh agi matŭn aku ndai kayuh adi aku puan nang kana.

²²Ngga siabo asŭng ku aku situju di ukum-adat Tapa.

²³Pak aku kinyam agi ukum-adat adi bŭkŭn darŭm pŭrŭng ku, adi birawan ngga ukum-adat adi aku situju; anŭ bada aku jadi urun ukum-adat dosa adi nguasa pŭrŭng ku.

²⁴Mbŭh raru susah inŭh aku! Asi meh re nyiramat aku so pŭrŭng ku ati adi taban aku ka pinyikabŭs?

²⁵Aku nggen trima kaseh di Tapa, adi nyiramat aku so ka Jesus Kristus Tuhan ta! Simuti inŭh pimudip ku: ngga pikir ku aku sita ukum-adat Tapa, ngga tibiat manusia ku aku sita ukum-adat dosa.