Read Biatah Bidayuh ROME 8 Bible Online

ROME 8 - Biatah Bidayuh bible

ROME 8

¹Madin daya adi udip ndi ngga Kristus Jesus dŭh re dog nunggu.

²Amai ukum-adat Roh Kudus, adi bada ata udip ndi ngga Kristus Jesus, inŭh adi pirupas aku[8] so ukum-adat dosa ngga pinyikabŭs.

³Kayuh adi Ukum-adat dŭh tungang ndai, sabab manusia ramah darŭm tibiat-i, Tapa mbŭh ndai. Ayŭh nunggu dosa darŭm tibiat manusia darŭm-I pait Anak adŭp-I, adi mandŭg ngga tibiat adi brimun ngga tibiat ta adi bidosa, yŭn ngarah dosa.

⁴Tapa ndai simŭnŭ isa ata ndai kayuh adi Ukum-adat pesan ata ndai darŭm ata nurut pinyiraan Roh Kudus, ka dŭh nurut tibiat manusia.

⁵Daya adi udip nanyam ka pinyiraan tibiat pŭrŭng-i, mbŭh dog nguasa pinyiraan tibiat manusia di pikir-i. Daya adi udip nanyam ka pinyiraan Roh Kudus, mbŭh dog nguasa pinyiraan Roh Kudus di pikir-i.

⁶Dog nguasa tibiat manusia, pinŭbŭn-i inŭh pinyikabŭs; dog nguasa Roh Kudus, pinŭbŭn-i inŭh udip ngga damai.

⁷Jadi daya jadi pinganyu Tapa kan ngara dog nguasa tibiat manusia; amai ngara dŭh sita ukum-adat Tapa, buang sibandar-i ngara dŭh tungang sita-i.

⁸Daya adi tunda pinyiraan tibiat manusia dŭh tungang pimunos asŭng Tapa.

⁹Pak angān dŭh udip tunda pinyiraan tibiat manusia, pak udip tunda pinyiraan Roh Kudus, kambŭi Roh Tapa sawŭ agi darŭm angān. Asi asi adi dŭh biyŭn Roh Kristus dŭh dog dapu Kristus.

¹⁰Pak kambŭi Kristus agi darŭm angān, Roh Kudus nggen udip di angān sabab angān mbŭh bamai ngga Tapa, sunggu pŭrŭng ngan re kabŭs sabab dosa.

¹¹ Kambŭi Roh Kudus, adi pakat Jesus so kabŭs, agi darŭm angān, Ayŭh adi pakat Kristus so kabŭs gŭh re nggen udip di pŭrŭng ngan adi bisa kabŭs, da Roh Kudus adi agi darŭm angān.

¹²Ngapŭi inŭh meh, bara dingan ku, ati inŭh kayuh adi dŭh siŭn ata ndai: ata dŭh siŭn udip nunda ka pinyiraan tibiat manusia.

¹³Amai kambŭi angān udip nunda ka pinyiraan tibiat manusia, angān re kabŭs; pak kambŭi ngga Roh Kudus angān siŭ pingandai ngan adi bidosa, angān re udip.

¹⁴Ngara adi dog kayak Roh Tapa inŭh bara anak Tapa.

¹⁵ Amai Roh adi Tapa nggen di angān dŭh-I bada angān jadi urun ka bada angān taru; Roh Kudus bada angān jadi bara anak Tapa kidŭ-i, ka sabab Roh Kudus ata bagan Tapa, “Sama! Sama ku!”

¹⁶Roh Tapa tubu adŭp-I ngga roh ta ngga kiren ata mbŭh bara anak Tapa.

¹⁷Amai ata bara anak-I, ata re dapu berkat adi-I sidia yŭn daya-I, ka ata re dapu gŭh ngga Kristus kayuh adi Tapa mbŭh sidia yŭn-I; amai kambŭi ata sua dapu jera-birasa Kristus, ata gŭh re sua dapu bragah-I.

¹⁸Di rundeng ku kayuh adi ata naman di tipuh ati manŭn dŭh tungang dog danding ngga bragah adi re dog pinandŭng di ata.

¹⁹Sopŭrŭg kayuh adi ko dog napa mbŭh graŭh kajŭn Tapa kiren asi bara anak-I.

²⁰ Amai sopŭrŭg kayuh adi ko dog napa mbŭh dog sān bada manyap tujuan-i, dŭh so pinyiraan adŭp-i, pak sabab Tapa raan-i simŭnŭ. Pak mbŭh dog harap nang

²¹sopŭrŭg kayuh adi ko dog napa re ndi andu dog pirupas so madam ka re samah dapu pinyirupas bara anak Tapa, adi bragah.

²²Amai ata puan nang ndŭg tipuh ati sopŭrŭg kayuh adi ko dog napa mbŭh nyidaing naman sarang andam, nimun sarang andam re biranak.

²³ Pak dŭh-i kayuh adi ko dog napa adŭ adi nyidaing; ata adi biyŭn Roh Kudus adi sibungas pinganggen Tapa nyidaing gŭh darŭm asŭng ta darŭm ata kajŭn Tapa ndai ata da jadi bara anak-I[9] ka pirupas ata so pŭrŭng ta adi pandai kabŭs ani.

²⁴Amai so ka pingarap inŭh ata dog nyiramat; pak kambŭi ata kiris kayuh adi ata harap, kayuh anŭ dŭh-i sawŭ pingarap. Amai asi so ata harap kayuh adi ata tungang kiris?

²⁵Pak kambŭi ata harap kayuh adi ata dŭh tungang kiris, ata kajŭn ngga atin sabar.

²⁶Simŭnŭ gŭh Roh Kudus agi digiti turung ata adi ramah. Amai ata dŭh puan munki ata patut simayang; adŭp Roh Kudus bidua yŭn ta ka Tapa ngga sidaing adi dŭh manusia tungang kira.

²⁷Ka Tapa meh, adi puan isi atin manusia, puan ani adi nang Roh anŭ; sabab Roh anŭ bidua ka Tapa ngarun daya-I buang nanyam ka pinyiraan-I.

²⁸Ata puan nang Tapa ngatur sopŭrŭg kayuh yŭn kana sopŭrŭg daya adi rindu Ayŭh,[10] daya adi-I ko bagan nimun ka tujuan-I.

²⁹Bara daya adi Tapa mbŭh mien dog nyidŭrŭ-I gŭh da jadi brimun ngga Anak-I, isa Anak jadi diŭ di dupan bara adi sabah.

³⁰Ka ngara adi Tapa ko nyidŭrŭ, Ayŭh bagan; ka ngara adi-I bagan, Ayŭh bada bamai ngga adŭp-I, ka samah bragah-I ngga ngara.

³¹Darŭm ko dingah sopŭrŭg anŭ, ani re ta bisa nang? Kambŭi Tapa agi ngga ata, asi re tungang rawan ata?

³²Tapa dŭh bitan Anak-I, pak mbŭh jugan Ayŭh yŭn sopŭrŭg ta. Kambŭi Tapa mbŭh ndai simŭnŭ, dŭh kah Ayŭh rabis an nggen di ata sopŭrŭg kayuh adi bŭkŭn?

³³Asi re nyarah bara daya adi Tapa mbŭh mien? Adŭp Tapa nang ngara dŭh sarah!

³⁴Asi garang, re nunggu ngara? Dŭh-i Kristus Jesus, adi kabŭs, ka sibandar-i adi dog pakat udip bauh ka adi mbŭh tura ka tauh Tapa, bidua yŭn ta ka Tapa!

³⁵Asi garang, tungang nyibarai ata so pinyirindu Kristus? Tungang kah pito nyibarai ata, puan kah pimudip jera, puan kah pinyikisiis, puan kah sikirau, puan kah sirata, puan kah pinyusah, puan kah pinyikabŭs?

³⁶ Sak adi nang Surat-kudus, “Sabab Kaam, di tadŭ nga-i kieh ari re ruban asŭng ami. Daya ndai di tunduh kieh keya ka kieh ati biri adi re dog simareh.”

³⁷Dŭh, di sopŭrŭg kayuh anŭ ata biyŭn sukup pimanang so ka Ayŭh adi rindu ata.

³⁸Amai aku taŭn mbŭh tatu puan nang mating kayuh tungang nyibarai ata so pinyirindu-I: bait darŭm kabŭs puan kah darŭm udip, bait malaikat malaikat puan kah pinguasa adi bŭkŭn di rangit, bait jaman ati puan kah jaman adi re,

³⁹bait ong di sambu puan kah ong di sagān; so sinadan anŭ adi ko dog napa mating re tungang nyibarai ata so pinyirindu Tapa adi mbŭh jata darŭm Kristus Jesus Tuhan ta.