Read Biatah Bidayuh ROME 9 Bible Online

ROME 9 - Biatah Bidayuh bible

ROME 9

¹Aku minyu kayuh adi sawŭ; aku mbŭh tung Kristus ka aku dŭh kadong. Pikir-kira atin ku, adi dog nguasa Roh Kudus, gŭh kiren nang aku dŭh kadong

²kan aku nang munki masam bat-i pinyusah ku, munki masam ibŭn-i atin ku

³yŭn daya ku, adi pŭrŭng ngga deya adŭp ku! Sitagar ngara aku mbŭh raan dŭ dog pangu Tapa ka dog nyidŭrŭ so Kristus.

⁴ Ngara inŭh bara daya adi Tapa mbŭh mien; Ayŭh ndai ngara da jadi bara anak-I ka pinandŭng bragah-I di ngara; Ayŭh ndai simanya simanya-I[11] ngga ngara ka nggen di ngara Ukum-adat; ngara mbŭh biyŭn simayang adi sawŭ; ngara mbŭh trima janji Tapa;

⁵ngara sesang so tayung-babuk daya Hebrew adi timagah; ka Kristus, darŭm gayŭn manusia, mbŭh so bangsa ngara. Isa-i Tapa, adi mritah sopŭrŭg, dog muji ndŭg situi tui![12] Amen.

⁶Aku dŭh nang Tapa mbŭh kambŭt janji-I; amai dŭh sopŭrŭg daya Israel daya adi dog mien Tapa.

⁷ Dŭh gŭh sopŭrŭg sesang Abraham bara anak Tapa. Tapa mbŭh nang di Abraham, “So Isaac inŭh kuu re biyŭn sesang adi Aku bijanji re nggen di kuu.”

⁸Sirati-i bara anak adi dog biranak so ka gaya adi biasa[13] dŭh-i bara anak Tapa; pak bara anak adi dog biranak so janji Tapa dog nyirundeng bara sesang adi sawŭ.

⁹ Amai janji Tapa dog ndai ngga pinganang sakati: “Kan tika-i mbŭh ndŭg[14] aku re pari, ka Sarah re biyŭn ndi anak dari.”

¹⁰Dŭh anŭ adŭ. Duwŭh madis anak Rebecca dapu ndi sama, babuk ta Isaac.

¹¹ Pak ngga kiren ndi naan so ngara duwŭh mbŭh pimien Tapa, Tapa nang di Rebecca, “Anak pinuai re bituan di sude.” Ayŭh nang sakanŭ diŭ so ngara dog biranak, diŭ so ngara ndai kayuh adi kana puan kah kayuh adi arap. Jadi pingatur Tapa inŭh bisangan di pinyibagan-I, dŭh so tadŭ kayuh adi ngara ko ndai.

¹³ Sak adi nang Surat-kudus, “Aku rindu Jacob, pak aku tiru di Esau.”

¹⁴Bisa kah ata nang Tapa dŭh tŭnggŭn? Manŭn dŭh.

¹⁵ Amai Ayŭh nang di Moses, “Aku re kiren pingapun di tadŭ daya Aku raan; Aku re masi di tadŭ daya Aku raan.”

¹⁶Jadi meh, sopŭrŭg kayuh dŭh bisangan di pinyiraan puan kah di pingandai manusia, pak di masi Tapa.

¹⁷ Amai di Surat-kudus Tapa nang di raja Egypt, “Aku mbŭh pakat kuu da jadi raja siŭn Aku bisa pakai kuu ngga kiren kuasa Ku ka ngga bada adŭn Ku timagah di ndi ong ong.”

¹⁸Jadi meh, Tapa kiren masi di tadŭ daya Ayŭh raan, ka Ayŭh bada baking tadŭ daya Ayŭh raan.

¹⁹Pak agi so angān re nang di aku, “Kambŭi anŭ sawŭ, mani Tapa nyarah daya? Asi tungang rawan pinyiraan Tapa?”

²⁰ Pak bara dingan ku, asi meh angān nak birani nam Tapa? Priok tana dŭh siken daya adi ndai-i, “Mani aku dog ndai mun ati?”

²¹Amai sawŭ, daya adi ndai priok biyŭn hak pakai tana-riyat nimun sŭn adŭp-i nang, ka ndai duwŭh priok so ndi takang tana-riyat anŭ, ndi yŭn guna di tipuh gawai ka anŭ ndi yŭn guna di tipuh biasa.

²²Ka sawŭ mun anŭ gŭh Tapa ngga kayuh adi-I ko ndai. Ayŭh raan kiren baji-I ka raan kuasa-I dog puan. Pak Ayŭh ruai nang sabar ngga ngara adi yŭn-I baji, ngara adi taŭn mbŭh re dog pirabur.

²³Ka Ayŭh raan gŭh kiren kaya bragah-I, adi dog ren di tunduh ta adi mbŭh tibaran yŭn-I masi, sinadan ata adi-I mbŭh sidia da kambat bragah-I.

²⁴Amai ata inŭh daya adi-I bagan, dŭh daya Jahudi adŭ, pak daya adi dŭh bangsa Jahudi ani.

²⁵ Ati inŭh kayuh adi-I nang di surat Hosea: “Daya adi dŭh daya Ku Aku re kadŭn ‘Daya Ku.’ Bangsa adi Aku dŭh rindu Aku re kadŭn ‘Bangsa adi Aku rindu.’

²⁶ Ka di tarun yŭn ngara dog kidaan, ‘Angān dŭh daya Ku,’ diginŭ ngara re dog kadŭn bara anak Tapa adi udip.”

²⁷ Ka Isaiah minyu pasar Israel: “Sunggu bagŭ mun sirah sumat di bŭngŭn rawŭt bait kani daya Israel, nisŭ adŭ so ngara re dog nyiramat;

²⁸amai Tuhan re rikas ndai di tunduh ong kayuh adi-I ko bakan Ayŭh re ndai.”

²⁹ Nimun adi Isaiah ko nang dawŭ-i, “Kambŭi Tuhan adi Bisa-pŭrŭg dŭh nggen di ata bara sesang, ata mbŭh keya ka Sodom ngga Gomorrah.”

³⁰Jadi ata nang daya adi dŭh bangsa Jahudi, adi dŭh suba bada adŭp ngara bamai ngga Tapa, mbŭh bamai ngga Ayŭh so ka pinyabah;

³¹anŭ inŭh darŭm bara daya adi Tapa mbŭh mien, adi jiroh ukum-adat adi bisa bada adŭp ngara bamai ngga Tapa, dŭh dapŭd.

³²Amai mani? Sabab ngara dŭh bisangan di pinyabah pak bisangan di pingandai adŭp ngara. Ka ngara meh sikak “batuh anŭ adi bisa bada daya sikak”

³³ sak adi ko dog nyabŭt darŭm Surat-kudus: “Tingga, Aku na di Zion batuh adi re bada daya sikak, batuh adi re bada ngara rabu. Pak asi asi adi sabah di Ayŭh dŭh re asa.”