Read Biatah Bidayuh 1 CORINTH 1 Bible Online

1 CORINTH 1 - Biatah Bidayuh bible

1 CORINTH 1

¹So Paul, adi mbŭh dog bagan nanyam ka pinyiraan Tapa da jadi pinyuruh Kristus Jesus, ka gŭh so dingan ta Sosthenes

² nuju eklisia Tapa adi di Corinth, nuju sopŭrŭg adi dog bagan da jadi daya kudus yŭn Tapa, adi mbŭh jangi darŭm udip ndi ngga Kristus Jesus, samŭn sopŭrŭg daya bŭkŭn di barang yŭn adi nyambah Tuhan ta Jesus Kristus, anŭ inŭh Tuhan ngara ngga Tuhan ta:

³Isa-i Tapa adi Sama ngga Tuhan Jesus Kristus nggen di angān pinyirasi-mandis ngga damai.

⁴Aku siraru nggen trima kaseh di Tapa ku yŭn ngan sabab pinyirasi-mandis adi-I mbŭh nggen di angān so Kristus Jesus.

⁵Amai so udip ndi ngga Kristus angān mbŭh jadi kaya darŭm sopŭrŭg kayuh, samŭn darŭm sopŭrŭg piminyu ngga sopŭrŭg pinyipuan.

⁶Agah pasar Kristus mbŭh jadi isin ngga kurit ngan

⁷adi bada angān biar dŭh kurang ndi berkat, darŭm angān kajŭn Tuhan ta Jesus Kristus dog pinandŭng.

⁸Ayŭh re bada angān tagap ndŭg sikasŭn-i, isa angān dŭh biyŭn takar sarah di Andu anŭ kan Tuhan ta Jesus Kristus dog pinandŭng.

⁹Ayŭh bisa dog sabah, Tapa adi bagan angān da jadi ndi ngga Anak-I Jesus Kristus, Tuhan ta.

¹⁰Ngga kuasa Tuhan ta Jesus Kristus aku mite sopŭrŭg ngan, adi bara dingan ku, situju di ani ani adi angān nang, isa angān dŭh bikaii dupan adŭp ngan ka pape. Angān an ndi atin darŭm pikir-kira ka darŭm pinŭtŭn.

¹¹Aku nang sakanŭ di angān adi bara dingan ku, amai agi daya so rawang Chloe kidaan di aku nang kaii agi timbur di dupan ngan.

¹² Simuti inŭh ayŭh: kayuh adi angān nang dŭh brisak. Agi adi nang, “Aku tunda Paul”; agi adi nang, “Aku tunda Apollos”; agi adi nang, “Aku tunda Peter”; adi bŭkŭn nang, “Aku tunda Kristus.”

¹³Kristus mbŭh dog kutung[1] jadi bagŭ tibaran! Paul kah anŭ adi kabŭs di atuh rigang yŭn ngan? Agi kah angān dog baptisa jadi murid Paul?

¹⁴ Aku nggen trima kaseh di Tapa aku mating baptisa angān, adŭ-i Crispus ngga Gaius.

¹⁵Mating daya bisa nang angān dog baptisa jadi murid ku. (

¹⁶ Sawŭ dian-i, aku agi gŭh baptisa Stephanas ngga rawang-i; pak mating nyam aku baptisa daya bŭkŭn.)

¹⁷Kristus dŭh pait aku da baptisa daya. Ayŭh pait aku da kidaan Agah Kana, ka kidaan-i dŭh ngga piminyu pinyibijak manusia, siŭn kuasa pinyikabŭs Kristus di atuh rigang dŭh manyap.

¹⁸Amai agah pasar pinyikabŭs Kristus di atuh rigang inŭh au-tarun di ngara adi mbŭh manyap; pak di ata adi mbŭh dog nyiramat agah anŭ inŭh kuasa Tapa.

¹⁹ Surat-kudus nang, “Aku re pirusak pinyibijak daya adi bijak ka re kinating pimandai bara adi pitar-pandai.”

²⁰ Ngapŭi meh, ani pinyadi ngara adi bijak? Ani pinyadi ngara adi pitar-pandai? Ani pinyadi ngara adi pandai sitama pinyipuan di ong ati? Tapa mbŭh kiren nang pinyibijak ong ati agi sipadin!

²¹Amai Tapa darŭm pinyibijak-I dŭh bada daya puan adŭp-I so ka pinyibijak adŭp ngara. Pak, so agah adi ata nyuse adi “sipadin” sŭn ngara nang, Tapa mbŭh natu an nyiramat ngara adi sabah.

²²Daya Jahudi biguna di pingandai-nginga ngga kiren kayuh adi sawŭ, ka daya Greek jiroh pinyibijak.

²³Mun kieh, kieh piagah Kristus dog masak di rigang, agah adi arap di daya Jahudi ka au-tarun di daya adi dŭh bangsa Jahudi;

²⁴pak di ngara adi dog bagan Tapa, bait-i daya Jahudi puan kah daya adi dŭh bangsa Jahudi, agah anŭ inŭh Kristus, adi kuasa ngga pinyibijak Tapa.

²⁵Amai kayuh adi nang nŭh budo-bawa Tapa, agi rabis bijak so pinyibijak manusia, ka kayuh adi nang nŭh pinyiramah Tapa agi rabis bake so pinyibake manusia.

²⁶Bara dingan ku! Ingat munki pimudip ngan adi mbŭh di andu Tapa bagan angān. So tura ka piningga manusia mbŭh agi nisŭ so angān adi bijak, adi bikuasa, ka adi bās pangkat.

²⁷Tapa saji-I mbŭh mien kayuh adi ong nyirundeng au-tarun ngga pimangŭh ngara adi bijak, ka kayuh adi ong nyirundeng ramah ngga pimangŭh ngara adi bikuasa.

²⁸Ayŭh mbŭh mien kayuh adi ong dŭh biguna ka ngamun ka adi au-tarun ngga pirabur kayuh adi ong nang biguna.

²⁹Sirati-i mating daya bisa mingangŭn di sirung jawin Tapa.

³⁰Pak Tapa mbŭh tambit angān bada udip ndi ngga Kristus Jesus; ka adŭp Kristus, Tapa mbŭh bada jadi pinyibijak ta. So Ayŭh ata mbŭh dapŭd bamai ngga Tapa; ata jadi daya Tapa adi kudus adi mbŭh dog pirupas.

³¹ Ngapŭi, sak adi nang Surat-kudus, “Asi asi adi raan mingangŭn dŭh siŭn dŭh an mingangŭn pasar kayuh adi Tuhan mbŭh ndai.”