Read Biatah Bidayuh 1 CORINTH 10 Bible Online

1 CORINTH 10 - Biatah Bidayuh bible

1 CORINTH 10

¹ Aku raan angān ingat, bara dingan ku, kayuh adi jadi di tayung-babuk ta adi tunda Moses. Sopŭrŭg ngara dog grindung abun, ka sopŭrŭg mbŭh mutas Rawŭt Bireh ngga siramat.

²Di abun ngga di rawŭt sopŭrŭg ngara dog baptisa jadi pinunda Moses.

³ Sopŭrŭg ngara man ndi masam ruti roh,

⁴ ka nok ndi masam piin roh. Ngara nok so batuh roh anŭ adi tunda ngara; ka batuh anŭ inŭh adŭp Kristus.

⁵ Pak sunggu mŭnŭ bagŭ ngara Tapa dŭh munos asŭng-I dieh, ngapŭi bagŭ tadang ngara mingare di tarun tana-pajam.

⁶ Jadi meh sopŭrŭg kayuh anŭ mbŭh jadi suto danding yŭn ta, ngga bakan ata da dŭh ripong mun ngara di kayuh adi arap,

⁷ dŭh nyambah tibudo, mun ngara. Sak adi nang Surat-kudus, “Bara daya anŭ guru man ngga nok, ka komŭnŭ makat bitanda.”

⁸ Ata dŭh siŭn udip darŭm pimudip adi dŭh tatu darŭm pingandai kais, mun ngara; darŭm ndi andu duwŭh puru-taruh ribu naan ngara kabŭs.

⁹ Ata dŭh siŭn suba Tuhan,[15] mun kada so ngara ko suba Ayŭh; ngara kabŭs dog kuut jippŭh.

¹⁰ Ata dŭh siŭn mingungut, mun kada so ngara ko mingungut; ngara dog siŭ Malaikat Pinyikabŭs.

¹¹Sopŭrŭg anŭ jadi di ngara ndu suto di daya bŭkŭn, ka sopŭrŭg-i mbŭh dog nuris ndu pinyibakan di ata. Amai ata inŭh udip di tipuh adi re rikas mungan.

¹²Kambŭi angān pikir adŭp ngan mbŭh mijog tagap, jaga adŭp ngan ka dŭhnyah rabu.

¹³Angān dog suba mun daya bŭkŭn gŭh. Pak Tapa ingat janji-I, ka dŭh-I re bada angān dog suba rabis so tungang angān trima. Di tika angān dog suba, Ayŭh re nggen di angān pinyibake ngga rawan-i, buang ngga pirupas adŭp ngan.

¹⁴Jadi meh, angān adi aku rindu, dŭhnyah nyambah tibudo.

¹⁵Aku minyu ngga angān mun minyu ngga daya adi mirati; ngatin meh kayuh adi aku nang.

¹⁶ Makuk adi ata pakai di tika Biruman Tuhan ka adi ata nggen trima kaseh di Tapa yŭn-i: kan ata nok so dieh, ata mbŭh jadi ndi ngga Kristus darŭm pinyikabŭs-I. Ka ruti adi ata mire: kan ata man-i, ata mbŭh jadi ndi ngga pŭrŭng Kristus.

¹⁷Sabab agi ndi ruti, sopŭrŭg ta, sunggu bagŭ, mbŭh ndi pŭrŭng, amai ata samah man ndi ruti anŭ.

¹⁸ Suba kira bara daya bangsa Israel; ngara adi man kayuh adi mbŭh dog nyadis, mbŭh samah darŭm simayang nyambah Tapa.

¹⁹Agi kah aku nang tibudo puan kah pinguman adi dog jugan dieh biyŭn rati?

²⁰ Dŭh! Kayuh adi aku nang inŭh, kayuh adi dog nyadis di mija-sambah daya adi dŭh puan Tapa inŭh dog jugan ka umot, dŭh ka Tapa. Ka aku dŭh raan angān bidingan ngga umot.

²¹Angān dŭh bisa nok so makuk Tuhan buang nok so makuk umot; angān dŭh bisa man di mija Tuhan buang man di mija umot.

²² Ata raan bada Tuhan sina kah? Ata pikir adŭp ta bikuasa so Ayŭh kah?

²³ “Ata bisa ndai tadŭ tadŭ kayuh,” sakanŭ ngara. Anŭ sawŭ, pak dŭh sopŭrŭg kayuh kana. “Ata bisa ndai tadŭ tadŭ kayuh”, pak dŭh sopŭrŭg kayuh biguna.

²⁴Dŭhnyah ndai kayuh yŭn kana adŭp ngan, pak ndai yŭn kana daya bŭkŭn.

²⁵Angān bisa man tadŭ dagin adi dog jua di passar, pak dŭh ngga pinyiken adi mandŭg so pikir-kira atin ngan.

²⁶ Amai, sak adi nang Surat-kudus, “Ong ngga sopŭrŭg kayuh adi agi dieh mbŭh tung Tapa.”

²⁷Kambŭi daya adi dŭh Kristen bagan angān ngga man di arŭn-i ka angān sawŭ di, man kayuh adi ngara ngidang yŭn ngan, dŭh ngga pinyiken adi mandŭg so pikir-kira atin ngan.

²⁸Pak kambŭi agi daya nang di angān, “Pinguman ati ko dog jugan ka tibudo,” dŭhnyah man-i, yŭn kana daya anŭ adi kidaan sakanŭ di angān buang yŭn pikir-kira atin,

²⁹anŭ inŭh, pikir-kira atin daya anŭ, dŭh pikir-kira atin ngan. Agi daya re nang, “Mani meh, aku adi bebas ndai pinyiraan adŭp ku, dog ngŭtŭ pikir-kira atin daya bŭkŭn?

³⁰Kambŭi aku nggen trima kaseh di Tapa yŭn pinguman ku, ngga mani daya ngamun aku jeja ka pinguman adi aku ko kambat ngga atin trima kaseh?”

³¹Ani ani adi angān ndai, bait-i man puan kah nok, ndai-i yŭn bragah Tapa.

³²Dŭhnyah ndai pinyusah di daya bŭkŭn, bait-i daya Jahudi puan kah daya adi dŭh bangsa Jahudi puan kah eklisia Tapa.

³³Ndai anŭ adi aku ndai; aku suba pimunos asŭng sopŭrŭg daya darŭm sopŭrŭg pingandai ku, dŭh kira yŭn kana adŭp ku, pak yŭn kana sopŭrŭg daya, isa ngara dapŭd dog nyiramat.