Read Biatah Bidayuh 1 CORINTH 12 Bible Online

1 CORINTH 12 - Biatah Bidayuh bible

1 CORINTH 12

¹Bara dingan ku, angān agi siken aku pasar pinganggen so Roh Kudus. Aku taŭn raan angān puan ani sibandar-i pinganggen anŭ.

²Angān puan nang di andu angān babŭ dŭh puan Tapa, angān mbŭh manyap darŭm barang ka mun aran pimudip adi nyambah tibudo.

³Aku raan angān puan mating daya adi dog nyiruton Roh Tapa bisa nang “Jesus turah!” ka mating daya bisa ngaku “Jesus inŭh Tuhan,” kambŭi dŭh dog ngajar Roh Kudus.

⁴ Agi bagŭ masam pinganggen roh, pak babŭ ndi Roh anŭ adi nggen-i.

⁵Agi bagŭ masam aran ngga bituan, pak babŭ ndi Tuhan anŭ yŭn nŭŭh bituan.

⁶Barang naan ata tungang ndai bagŭ masam kraja, pak ndi Tapa anŭ adi nyiraja darŭm ata ka turung ata di sopŭrŭg pingandai ta.

⁷Yŭn kana sopŭrŭg ta Tapa mbŭh nggen tandā ngga kiren Roh Kudus agi di barang naan ata.

⁸Di ndi naan, Roh Kudus nggen ajar puno ngga pinyibijak, di adi bŭkŭn Ayŭh nggen ajar puno ngga pinyipuan.

⁹Roh anŭ gŭh adi nggen di ndi naan pinyabah, di adi bŭkŭn Ayŭh nggen kuasa ngga pibua daya adi birandam.

¹⁰Roh anŭ nggen di ndi naan kuasa ngga ndai pingandai-nginga; di adi bŭkŭn, pinganggen ngga piagah agah so Tapa; ka di adi bŭkŭn dinge, pimandai ngga ngatŭn pinganggen adi mandŭg so Roh Kudus ngga adi dŭh mandŭg so Roh Kudus. Di ndi naan Ayŭh nggen pimandai ngga minyu piminyu saruh, ka di adi bŭkŭn Ayŭh nggen pimandai ngga kidaan rati kayuh adi dog nang.

¹¹Pak-i ndi Roh Kudus anŭ adi ndai sopŭrŭg-i; Ayŭh natu aki ndi pinganggen an-I nggen di barang naan ata, bŭkŭn daya bŭkŭn pinganggen, nanyam pinyiraan-I.

¹² Kristus mbŭh keya ka ndi pŭrŭng ganan ngga bagŭ sakap-i; ayŭh babŭ ndi pŭrŭng, sunggu-i biyŭn bagŭ sakap.

¹³Simŭnŭ gŭh sopŭrŭg ta, bait-i ata daya Jahudi puan kah adi dŭh bangsa Jahudi, bait-i daya urun puan kah daya bebas, mbŭh dog baptisa Roh ndi anŭ ka darŭm ndi pŭrŭng anŭ. Tapa mbŭh nggen ndi Roh anŭ di ata da nok.

¹⁴Amai adŭp pŭrŭng dŭh-i dog ndai so ndi sakap adŭ, pak so bagŭ sakap.

¹⁵Kambŭi kaja bisa nang, “Sabab aku ati dŭh tangan, aku dŭh tung pŭrŭng,” anŭ dŭh re nyidŭrŭ-i so pŭrŭng.

¹⁶Ka kambŭi kajit bisa nang, “Sabab aku dŭh batŭh, aku dŭh tung pŭrŭng,” anŭ dŭh re nyidŭrŭ-i so pŭrŭng.

¹⁷Kambŭi ndi pŭrŭng mbŭh batŭh adŭ, simuki-i re dingah? Ka kambŭi-i kajit adŭ, simuki-i re kadŭk?

¹⁸Tapa mbŭh na barang sakap di ndi pŭrŭng nunda ka pingatur adŭp-I.

¹⁹Ayŭh dŭh bisa jadi ndi pŭrŭng kambŭi-i ndi sakap adŭ.

²⁰Ayŭh taŭn-i bagŭ sakap pak ndi pŭrŭng.

²¹Ngapŭi batŭh dŭh bisa nang di tangan, “Aku dŭh biguna di kuu!” Dŭh gŭh ubak bisa nang di kaja, “Aku dŭh biguna di kuu!”

²²Sibandar-i ramah bait kani sakap anŭ pak kambŭi ata dŭh biyŭn-i ata dŭh tungang ndai ani ani;

²³ka sakap anŭ adi ata pikir dŭh biguna mbŭh anŭ adi ata nakit jaga; ka anŭ adi dasa ata nyabŭt mbŭh ata nakit nutu,

²⁴adi dŭh dog biguna sakap adi rabis ramus. Adŭp Tapa mbŭh ndai ka ngatur pŭrŭng ta isa sirabi ka anŭ adi dŭh biguna jadi biguna.

²⁵Ngga simŭnŭ meh sopŭrŭg sakap bisa samah nyiraja darŭm-i biturung ngga sakap adi bŭkŭn.

²⁶Kambŭi ndi sakap di pŭrŭng ta mandam, sopŭrŭg sakap adi bŭkŭn sua mandam; kambŭi ndi sakap dog stabi, sopŭrŭg sakap adi bŭkŭn sua gaŭn.

²⁷Sopŭrŭg ngan mbŭh pŭrŭng Kristus, ka barang naan angān mbŭh darŭm ndi pŭrŭng-I anŭ.

²⁸ Di eklisia Tapa mbŭh ngatur sopŭrŭg da biyŭn pinura-i: adi numbor ndi bara pinyuruh, adi numbor duwŭh bara nabi, adi numbor taruh bara gurū; adi bŭkŭn inŭh ngara adi ndai pingandai-nginga, ka ngara adi mbŭh dog nggen kuasa ngga pibua puan kah turung daya, puan kah nyiruton daya puan kah minyu darŭm piminyu saruh.

²⁹Dŭh sopŭrŭg daya jadi pinyuruh, dŭh sopŭrŭg nabi, dŭh sopŭrŭg gurū; dŭh sopŭrŭg daya biyŭn kuasa ngga ndai pingandai-nginga,

³⁰puan kah ngga pibua daya adi birandam, puan kah ngga minyu piminyu saruh, puan kah ngga kidaan rati piminyu saruh anŭ adi ko dog nang.

³¹Na atin ngan di pinganggen pinganggen adi biguna dŭ. Ka aku re kidaan gŭh di angān aran adi rabis biguna.