Read Biatah Bidayuh 1 CORINTH 5 Bible Online

1 CORINTH 5 - Biatah Bidayuh bible

1 CORINTH 5

¹ Mbŭh agi dog kidaan nang pingandai kais agi timbur di ruang ngan, adi rabis arap so adi daya adi dŭh puan Tapa ko ndai. Aku dog kidaan nang ndi naan daya agi bŭŭs ngga sindŭ tiri-i!

²Simuki meh garang angān re mingangŭn? Angān, sipatut-i puno ngga atin susah, ka sianŭ adi ndai urah adi mun anŭ patut dog kadi so tibaran ngan.

³Ka sunggu aku jo so angān darŭm pŭrŭng, aku babŭ gŭh agi ngga angān darŭm roh; ka keya ka aku agi diginŭ ngga angān, aku muko ngga adŭn Tuhan Jesus natu daya anŭ sawŭ sarah adi ndai kraja adi raru arap anŭ. Jadi darŭm angān agi tikuruk, ka aku agi ngga angān darŭm roh, ngga kuasa Tuhan ta Jesus adi agi ngga ata,

⁵angān nyerah daya anŭ ka Shetan siŭn pŭrŭng-i dog pirabur isa roh-i bisa dog nyiramat di Andu Tuhan.

⁶ Dŭh inŭh angān patut mingangŭn! Angān puan pinganang ati, “Nisit dang gŭh ragi ngga bada tibaduk kambang.”

⁷ Angān dŭh siŭn dŭh an taran ragi adi amba, anŭ inŭh ragi dosa, isa angān bisa jadi sukup bisig. Mun anŭ angān re jadi keya ka tibaduk adi bauh adi dŭh biragi, amai taŭn angān mbŭh mun anŭ. Amai Gawai Paska ta mbŭh dog sidia, sabab anŭ meh madin Kristus, adi anak biri Paska ta, mbŭh dog nyadis.

⁸ Ja ata sita Gawai Paska ta, dŭh ngga ruti adi biragi ngga ragi dosa ka ngga pimudip adi ginaka, pak ngga ruti adi dŭh biragi, anŭ inŭh ruti atin bisig ngga atin jujur.

⁹Darŭm surat adi aku ko nuris ka angān aku agi kidaan di angān da dŭh bigaur ngga daya adi dŭh tatu pimudip-i darŭm pingandai kais.

¹⁰Aku dŭh minyu pasar daya adi dŭh puan Tapa adi dŭh tatu pimudip-i darŭm pingandai kais, puan kah adi tama, puan kah adi pinaku, puan kah adi nyambah tibudo. So ngara angān patut pijo adŭp ngan, buang pati ka bu so ong ati.

¹¹Kayuh adi aku nang inŭh angān patut dŭhnyah bigaur ngga daya adi nang adŭp-i daya adi sabah pak sibandar-i ayŭh daya adi dŭh tatu pimudip-i darŭm pingandai kais, puan kah adi tama, puan kah adi nyambah tibudo, puan kah adi pinapŭ, puan kah adi pimabuk, puan kah adi pinaku. Dŭhnyah guru man ngga daya adi mun anŭ.

¹² Dŭh-i kraja ku re kidaan arap kana daya adi dŭh Kristen. Tapa inŭh adi bisa kidaan arap kana ngara. Pak dŭh kah angān patut nyara sarah dingan ngan adi so tibaran adŭp ngan? Sak adi nang Surat-kudus, “Kadi sianŭ adi arap so tibaran ngan.”