Read Biatah Bidayuh 1 CORINTH 7 Bible Online

1 CORINTH 7 - Biatah Bidayuh bible

1 CORINTH 7

¹Jadi madin, pasar kayuh anŭ adi angān nuris ka aku. Kana dŭ inŭh dari dŭh sawan.[6]

²Pak ngga pijo adŭp ngan so pimudip adi dŭh tatu darŭm pingandai kais, barang naan dari patut biyŭn sawŭn adŭp-i, ka barang naan dayung patut biyŭn banŭh adŭp-i.

³Banŭh patut rada adŭp-i yŭn kingat pinyiraan sawŭn-i, ka sawŭn patut rada adŭp-i yŭn kingat pinyiraan banŭh-i, ka samah samah pimunos pinyiraan dingan-i.

⁴Sawŭn dŭh-i tuan di pŭrŭng adŭp-i, pak banŭh inŭh; simŭnŭ gŭh banŭh dŭh-i tuan di pŭrŭng adŭp-i, pak sawŭn inŭh.

⁵Dŭhnyah abah pimunos dingan ngan, adŭ-i kambŭi so-duwŭh ngan ko samah situju an mbit pluang nyitiro yŭn simayang; pak ripas anŭ angān an pari mun adi mbŭh ngga dingan ngan. Simŭnŭ angān re bisa pijo adŭp ngan so pinyisuba Shetan adi an dog angān sitagar kurang jaga adŭp so pinyiripong adi sarah.

⁶Aku nang kayuh ati dŭh keya ka mritah, pak keya ka nyibandar.

⁷Sibandar-i aku raan dŭ angān udip mun aku ati; pak barang naan ata biyŭn ndi masam pinganggen so Tapa, ndi naan pinganggen ati, ndi naan pinganggen anŭ.

⁸Ka di ngara adi dŭh banan sawan ka di bara dayung uban aku nang kana dŭ inŭh angān babŭ udip sadi mun aku ati.

⁹Pak kambŭi angān dŭh tungang ngarah pinyiripong pŭrŭng ngan, angān patut banan sawan; mbŭh kana dŭ inŭh angān banan sawan so angān ripong darŭm sarah.

¹⁰ Di daya adi mbŭh banan puan kah sawan agi pinyipesan, dŭh so aku pak so Tuhan: sawŭn dŭh siŭn tagan banŭh-i;

¹¹kambŭi ayŭh tagan banŭh-i, ayŭh dŭh siŭn banan dinge adŭ-i ayŭh pari ka banŭh adŭp-i; ka banŭh dŭh siŭn taran sawŭn-i.

¹²Di ngara adi bŭkŭn aku nang (adŭp ku, dŭh Tuhan): kambŭi dari Kristen biyŭn sawŭn adi dŭh Kristen ka sawŭn-i anŭ mbŭh situju an udip samah ngga ayŭh, ayŭh dŭh siŭn taran sawŭn-i anŭ.

¹³Ka kambŭi agi dayung Kristen banan ngga dari adi dŭh Kristen ka dari anŭ mbŭh situju an udip samah ngga ayŭh, ayŭh dŭh siŭn taran banŭh-i anŭ.

¹⁴Amai banŭh adi dŭh Kristen mbŭh dog trima Tapa darŭm-i bisindi ngga sawŭn-i, ka sawŭn adi dŭh Kristen mbŭh dog trima Tapa darŭm-i bisindi ngga banŭh-i adi Kristen. Kambŭi dŭh simŭnŭ, anak ngara re jadi keya ka anak daya adi dŭh puan Tapa; pak darŭm-i simŭnŭ, ngara mbŭh dog trima Tapa.

¹⁵Sunggu mŭnŭ, kambŭi sianŭ adi dŭh Kristen raan tingge apid-i adi Kristen, awang adŭp-i. Darŭm simŭnŭ meh apid adi Kristen, bait-i banŭh puan kah sawŭn, bisa ndai nanyam pinyiraan adŭp-i. Amai sawŭ, Tapa mbŭh bagan angān da udip darŭm damai.

¹⁶Simuki angān re tatu puan, angān sawŭn adi Kristen, re dŭh nyiramat[7] banŭh ngan? Simŭnŭ gŭh angān, banŭh adi Kristen, simuki angān re tatu puan angān dŭh re nyiramat[8] sawŭn ngan?

¹⁷Barang naan angān patut udip nanyam ka pinganggen Tuhan di angān, ka nimun adi mbŭh di andu Tapa bagan angān. Ati inŭh atur adi aku ngajar di sopŭrŭg eklisia.

¹⁸Kambŭi daya mbŭh bisunat di tika ayŭh dog bagan Tapa, ayŭh patut dŭhsah suba kadi tandā sunat anŭ; kambŭi daya bayuh bisunat di tika ayŭh dog bagan Tapa, ayŭh patut dŭhsah bisunat.

¹⁹Amai bait-i ko puan kah bayuh bisunat daya anŭ, kayuh anŭ dŭh mani; kayuh adi biguna inŭh tunda Pinyipesan Tapa.

²⁰Barang naan angān patut mun adŭp ngan di andu angān dog bagan Tapa.

²¹Urun kah angān di andu Tapa bagan angān? Dŭh mani; pak kambŭi angān biyŭn aran ngga pirupas adŭp ngan, pakai meh aran anŭ.[9]

²²Amai daya urun adi mbŭh dog bagan Tuhan inŭh daya Tuhan adi mbŭh dog pirupas; simŭnŭ gŭh daya adi dŭh urun adi dog bagan Kristus mbŭh jadi urun Kristus.

²³Tapa ko miris angān ngga rega bās; jadi dŭhnyah angān jadi urun daya.

²⁴Bara dingan ku, barang naan angān patut bijijŭ ngga Tapa mun mun adŭp ngan di andu angān dog bagan-I.

²⁵Jadi tura ka kayuh adi angān nuris pasar daya adi dŭh banan puan kah sawan: aku dŭh biyŭn pinyipesan so Tuhan, pak aku bisa nggen pikir-kira ku so ka masi Tuhan nimun daya adi bisa dog sabah.

²⁶Di tika ati ata darŭm susah, jadi aku pikir kana dŭ inŭh angān adi dari udip babŭ mun adŭp ngan adi madin tong-i.

²⁷Kambŭi mbŭh sawan, awang adŭp-i angān sawan. Kambŭi bayuh sawan, dŭhnyah sawan.

²⁸Pak kambŭi angān sawan, angān dŭh bidosa; ka kambŭi dayung bujang banan, ayŭh dŭh gŭh bidosa. Pak abah aku kiris angān dog pinyusah adi daya adi mbŭh banan sawan kinyam.

²⁹Sirati-i, bara dingan ku, inŭh ati: tipuh mbŭh sutok, ka so madin daya adi mbŭh banan sawan patut udip mun adi dŭh banan sawan;

³⁰ngara adi muās, re mun adi dŭh susah; ngara adi tawŭh, re mun adi dŭh gaŭn; ngara adi miris, re mun adi dŭh dapu kayuh adi-i miris;

³¹ngara adi bidagang kayuh, re mun adi dŭh batur bidagang. Amai ong ati, mun adi madin tong-i, dŭh re tan tui.

³²Aku raan dŭ angān dŭh gapang. Dari adi dŭh sawan, pikir-i re di kraja Tuhan, sabab ayŭh suba an pimunos asŭng Tuhan.

³³Pak dari adi mbŭh sawan, pikir-i re di kayuh ong, sabab ayŭh raan pimunos asŭng sawŭn-i;

³⁴jadi mun anŭ ayŭh dog tarik ka duwŭh parad. Dayung adi dŭh banan puan kah adi tibŭn, pikir-i re di kraja Tuhan, sabab-i an bada pikir ngga pŭrŭng-i bisig; pak dayung adi mbŭh banan, pikir-i di kayuh ong, sabab ayŭh an pimunos asŭng banŭh-i.

³⁵Aku nang sakanŭ sabab aku raan turung angān. Aku dŭh suba an bada kayuh mbar di angān. Sibandar-i, aku raan angān ndai kayuh adi batur buang adi patut, ka nyerah adŭp ngan di kraja Tuhan ngga siabo asŭng ngan.

³⁶Mun ngara adi mbŭh bitunang pak mbŭh matŭd pikir-i dŭh re sawan nyamtadar-i: kambŭi dari kinyam adŭp-i dŭh batur di tunduh tunang-i anŭ buang pinyiripong pŭrŭng-i dŭh tungang dog ngarah, ka kinyam adŭp-i patut sawan, ngara duwŭh patut sawan.[10] Nŭŭh dŭh bidosa darŭm ndai simŭnŭ.

³⁷Pak kambŭi dari, dŭh so pinyibada daya, mbŭh batur batur ndai pikir-i nang adŭp-i dŭh re sawan,[11] ka kambŭi ayŭh mbŭh batur sawŭ tungang ngarah pinyiripong pŭrŭng-i buang mbŭh natu ani re-i ndai, kana dŭ inŭh ayŭh dŭh sawan ngga dayung anŭ.[12]

³⁸Jadi dari adi sawan[13] mbŭh ndai kayuh adi batur, pak sianŭ adi dŭh sawan[14] mbŭh ndai kayuh adi rabis batur.

³⁹Dayung adi banan taŭn-i darŭm abŭt sawan siragi banŭh-i udip; pak kambŭi banŭh-i kabŭs, ayŭh bisa banan ngga tadŭ dari ayŭh raan, atas dari anŭ Kristen.

⁴⁰Ayŭh re rabis sanang, kambŭi ayŭh dŭh banan. Ati inŭh pikir-kira ku; aku pikir aku dog nyiruton Roh Tapa.