Read Biatah Bidayuh 1 CORINTH 9 Bible Online

1 CORINTH 9 - Biatah Bidayuh bible

1 CORINTH 9

¹Dŭh kah aku ati daya bebas? Dŭh kah aku ati pinyuruh? Gi-bŭn kah aku kiris Jesus adi Tuhan ta? Dŭh kah aku adi ngajar angān da sabah di Tuhan?

²Sunggu daya dŭh trima bait kani aku ati pinyuruh, angān tatu trima aku ati keya ka pinyuruh! Sabab angān adi mbŭh udip ndi ngga Tuhan, adŭp ngan mbŭh jadi tandā-i aku ati pinyuruh.

³Kan daya ngamun aku, simuti inŭh aku nyibandar adŭp ku:

⁴Dŭh kah aku biyŭn hak dog nggen pinguman ngga nok yŭn kraja ku?

⁵Dŭh kah kieh biyŭn hak taban sawŭn ami adi Kristen darŭm pimanu ami, tunda suto danding bara pinyuruh adi bŭkŭn ngga bara jurud adŭp Kristus ka Peter?

⁶Puan kah aku ngga Barnabas adŭ kani adi dŭh siŭn dŭh nyiraja ngga nyiran adŭp ami.

⁷Asi soldadu adi re biranja adŭp-i darŭm jadi soldadu? Asi tukang-teya adi dŭh re man buwa anggor so teya adŭp-i? Asi pingingat-biri adi dŭh re pakai sisuh so biri adŭp-i?

⁸Aku dŭh re ngŭtŭ adŭp ku darŭm suto suto adi mun anŭ, sabab Ukum-adat nang sakanŭ gŭh.

⁹ Ata basa darŭm Ukum-adat Moses, “Dŭhnyah na kayuh di baba sapi ngga bada-i dŭh bisa man kan kuu pakai-i da ngiik.” Agi kah Tapa mbit bat pasar sapi adŭ?

¹⁰Dŭh kah Ayŭh minyu pasar ata darŭm-I nang sakanŭ? Taŭn-i dog nuris yŭn ta. Daya adi majak ka adi ngatŭm patut nyiraja darŭm harap adŭp-i sua dapŭd utung so buwa pingatŭm.

¹¹ Kieh mbŭh purun bine roh di dupan ngan. Sungak kah-i kambŭi kieh ngatŭm kayuh ong so angān?

¹²Kambŭi daya bŭkŭn biyŭn hak mite so angān, dŭh kah kieh rabis biyŭn hak? Kieh gibayuh pakai hak ami anŭ, pak mbŭh nan sopŭrŭg kayuh ramŭn kieh abah ndai baka di aran Agah Kana pasar Kristus.

¹³ Tatu angān mbŭh puan nang daya adi nyiraja darŭm Ramin Tuhan dapŭd pinguman-i so Ramin Tuhan ka ngara adi jugan sadis di mija-sambah dapŭd jangi utung so sadis anŭ.

¹⁴ Simŭnŭ gŭh, Tuhan mbŭh pesan nang ngara adi nyuse Agah Kana patut dapŭd utung so kraja ngara anŭ ngga nyiran adŭp ngara.

¹⁵Pak aku gibayuh bisangan di hak anŭ, ka dŭh gŭh aku nuris surat ati madin amai an nyibandar adŭp ku dieh. Mbŭh kana dŭ aku kabŭs so hak ku mingangŭn pasar kayuh anŭ dog tambit so aku.

¹⁶Aku dŭh biyŭn hak re mingangŭn batur sabab aku nyuse Agah Kana. Aku nyuse Agah Kana so ka pinyibada Tapa. Ka munki masam payah-i di aku kambŭi aku dŭh nyuse-i!

¹⁷Kambŭi aku ndai kraja ku so ka pinyiraan adŭp ku, aku bisa mite gaji; pak aku ndai-i amai-i mbŭh kraja adi Tapa tijuan aku da ndai.

¹⁸Ani meh gaji ku, garang? Pluang nyuse Agah Kana ngga dŭh bigaji inŭh jaku, dŭh kira dapŭd utung so hak ku anŭ adi nyiraja yŭn Agah Kana.

¹⁹Aku ati daya bebas, dŭh urun daya; pak aku bada adŭp ku jadi urun daya ramŭn ku an nyiruton bagŭ daya da jadi pinunda Kristus.

²⁰Darŭm aku nyiraja di ruang daya Jahudi, aku bada adŭp ku jadi daya Jahudi siŭn aku dapŭd nyiruton ngara da jadi pinunda Kristus; ka sunggu aku dŭh di ribo Ukum-adat Moses, aku bada adŭp ku mun adi udip di ribo-i, siŭn aku dapŭd nyiruton ngara adi udip di ribo-i da jadi pinunda Kristus.

²¹Simŭnŭ gŭh darŭm aku nyiraja di ruang daya adi dŭh bangsa Jahudi, aku bada adŭp ku mun daya adi dŭh bangsa Jahudi, di sapa Ukum-adat Jahudi, siŭn aku dapŭd nyiruton ngara da jadi pinunda Kristus. Ati, dŭh sirati-i aku dŭh sita ukum-adat Tapa; sibatur-i aku ati di ribo ukum-adat Kristus.

²²Di dupan ngara adi ramah darŭm pinyabah aku bada adŭp ku ramah mun ngara, siŭn aku dapŭd nyiruton ngara da jadi pinunda Kristus. Jadi aku jadi sopŭrŭg kayuh yŭn sopŭrŭg bangsa daya, isa-i aku bisa nyiramat ngara ngga sibisa bisa ku ngga tadŭ masam aran.

²³Sopŭrŭg anŭ aku ndai yŭn Agah Kana, siŭn aku sua dapu berkat-i.

²⁴Angān mbŭh tatu puan nang bagŭ daya sua birumba, pak ndi naan adŭ adi re manang ka dapŭd upah. Bikaduh meh, birumba yŭn dapŭd upah anŭ.

²⁵Barang naan daya adi tukang birumba, darŭm pirates adŭp-i, taŭn-i an biyŭn sukup disiplin. Ayŭh ndai simŭnŭ siŭn-i dapŭd upah manang birumba, sunggu upah anŭ dŭh tan tui. Ata mun anŭ gŭh, an biyŭn sukup disiplin siŭn ata dapŭd upah manang birumba anŭ adi tan adu adu.

²⁶Anŭ meh sabab aku bikaduh birumba an manang; anŭ meh sabab aku keya ka daya adi tukang bipukut adi dŭh mukut au-tarun.

²⁷Aku pirates adŭp ku isa aku tungang nguasa adŭp ku. Aku ndai simŭnŭ siŭn aku dŭh dog kinabah kan aku ko piagah Agah Kana di daya bŭkŭn.