Read Biatah Bidayuh 2 CORINTH 1 Bible Online

2 CORINTH 1 - Biatah Bidayuh bible

2 CORINTH 1

¹ So Paul, adi pinyuruh Kristus so ka pinyiraan Tapa, samŭn so dingan ta Timothy. Surat ati dog nuris nuju eklisia Tapa di Corinth, ka sopŭrŭg daya adi Tapa mbŭh mien di ndi tarun tana Achaia:

²Isa-i Tapa adi Sama ta ngga Tuhan Jesus Kristus nggen di angān pinyirasi-mandis ngga damai.

³Ja ata nggen trima kaseh di Tapa, Sama adi raru masi, adi Sama Tuhan ta Jesus Kristus, Tapa adi so sopŭrŭg pinurung mandŭg!

⁴Ayŭh turung ata di barang masam pinyusah ta, isa ata bisa turung daya bŭkŭn adi biyŭn barang masam pinyusah, pakai pinurung anŭ adi ata dapŭd so Ayŭh.

⁵Nimun ata biyŭn utung darŭm bagŭ pinyusah Kristus, simŭnŭ gŭh ata so Kristus samah dapu pinurung bās so Tapa.

⁶Kambŭi kieh dog pinyusah, anŭ mbŭh yŭn pinurung ka pinyiramat ngan; kambŭi kieh dog turung, angān dog turung gŭh ka dog nggen pinyibake anŭ ngga nyijŭn darŭm sabar pinyusah anŭ adi kieh gŭh kinyam.

⁷Jadi pingarap ami di angān dŭh re kurang; kieh puan, nimun angān sua kinyam pinyusah ami, angān re sua gŭh kinyam pinurung adi kieh kambat.

⁸ Bara dingan, kieh raan angān puan pinyusah adi dog kieh di utung rais Asia. Pinyusah ami anŭ mbŭh raru bat, batang re dŭh udip nyam kieh da-i.

⁹Kieh nyam adi mbŭh dog nggen ukum kabŭs. Pak-i mbŭh simŭnŭ isa kieh tanŭ ka bisangan, dŭh di adŭp ami, pak di Tapa adŭ, adi bisa pakat daya so kabŭs.

¹⁰Tapa mbŭh nyiramat kieh so pinyibisā pinyikabŭs[1] ka kieh puan Ayŭh re nyiramat kieh dinge,

¹¹darŭm angān turung kieh ngga dua ngan. Ka sopŭrŭg dua ngan yŭn ami re dog nam ngga berkat Tapa di tunduh kieh; ka bagŭ re nggen, ngga sirŭŭn bana, trima kaseh di Tapa yŭn ami.

¹²Kieh ngangŭn pikir-kira atin ami mbŭh kiren nang pimudip ami di ong ati, ka rabis-i gaya pimudip ami ngga angān, mbŭh dog nguasa atin adi dŭh an miman kayuh ngga atin bisig so Tapa[2] buang ngga atin tŭnggŭn, so ka kuasa pinyirasi-mandis Tapa ka dŭh so ka pinyibijak manusia.

¹³Kieh nuris ka angān kaŭs-i kayuh adi angān bisa basa ka mirati. Pak sunggu angān mirati kieh dŭh ngga sipuno-i madin, aku harap angān re dŭ dŭ mirati kieh, isa di Andu Tuhan Jesus mandŭg angān bisa mingangŭn pasar kieh nimun kieh re mingangŭn pasar angān.

¹⁵Anŭ kayuh adi taŭn aku puan adi ko sibungas-i bada aku ndai pikir ku an munan angān, siŭn angān utung da pimandŭg ku adi piduwŭh kari.

¹⁶ Amai aku an nyasa angān darŭm aku di ka Macedonia ka darŭm aku pari so nŭ, siŭn angān bisa turung aku di pimanu ku ka Judea.

¹⁷Darŭm aku ngatur simŭnŭ, agi kah aku mun adi dŭh bisa dog sabah? Kambŭi aku an ndai kayuh, mbŭh kah aku ndai-i ngga atin sibut, buang sidia an nang “Sa-i, sa-i,” ngga “Abah, abah” di jam anŭ gŭh?

¹⁸Siragi Tapa minyu kayuh adi sawŭ, janji ku ngga angān dŭh-i “Sa-i” ngga “Abah.”

¹⁹ Amai Jesus Kristus, Anak Tapa, adi Silas, Timothy, ka adŭp ku ko nyuse di angān, dŭh-i sianŭ adi “Sa-i” ngga “Abah.” Sibandar-i, Ayŭh inŭh “Sa-i” tung Tapa;

²⁰amai Ayŭh inŭh “Sa-i” yŭn sopŭrŭg janji Tapa. Ngapŭi so Jesus Kristus “Amen” ta dog nang yŭn bragah Tapa.

²¹Adŭp Tapa inŭh adi ndai kieh samŭn angān da tagap darŭm udip ndi ngga Kristus; adŭp Tapa inŭh adi mbŭh mien ata,

²²adi ko na tandā adŭp-I di ata yŭn adŭp-I dapu, ka mbŭh ngisi atin ta ngga Roh Kudus da jadi jamen sopŭrŭg anŭ adi-I mbŭh sidia yŭn ta.

²³Tapa inŭh saksi ku; Ayŭh puan atin ku! Aku dŭh jadi di ka Corinth sabab aku dŭh an nyusah angān.

²⁴Kieh dŭh an mritah angān jeja ka pinyabah ngan. Kieh puan angān tagap darŭm pinyabah ngan. Pak kieh nyiraja ngga angān yŭn sanang adŭp ngan.