Read Biatah Bidayuh 2 CORINTH 12 Bible Online

2 CORINTH 12 - Biatah Bidayuh bible

2 CORINTH 12

¹Aku dŭh siŭn dŭh mingangŭn, sunggu-i mating kayuh dapŭd nŭŭh so mingangŭn. Pak madin aku an minyu pasar kayuh adi Tapa ko pinandŭng adi aku.

²Aku puan ndi naan daya Kristen, simŭng-pat sawa adi mbŭh ripas, dog paad ka shorga adi siabo bigatung (aku dŭh puan sawŭ ngga dŭh-i kayuh ati; bait-i ayŭh kiris kayuh keya ka di darŭm pŭmŭh. Kayuh ati, Tapa adŭ puan).

³Pari ku nang, aku puan daya anŭ dog paad ka Paradise (pak, dŭh aku puan sawŭ ngga dŭh-i kayuh ati; bait-i ayŭh kiris kayuh keya ka darŭm pŭmŭh. Kayuh ati, Tapa adŭ puan), ka diginŭ ayŭh dingah kayuh adi dŭh tungang dog nyabŭt ngga bang bang piminyu, buang-i adi dŭh manusia an nyabŭt.

⁵Jadi aku re mingangŭn pasar daya anŭ, dŭh pasar adŭp ku; adŭ-i aku re mingangŭn pasar kayuh adi kiren pinyiramah adŭp ku.

⁶Kambŭi aku an mingangŭn, aku dŭh budo, sabab aku kidaan kayuh adi sawŭ. Pak aku dŭh re mingangŭn, sabab aku dŭh raan daya nganju aku rabis so patut sitagar kayuh adi daya kiris aku ndai ka dingah aku nang.

⁷Pak isa aku dŭh jadi raru sambuh ngga bagŭ pinandŭng mbŭh ku kiris, aku mbŭh dog ndi masam andam pŭrŭng adi raru mandam, adi keya ka pinyisung Shetan adi pijera aku da aku dŭh jadi sambuh.

⁸Pitaruh kari aku bidua ka Tuhan pasar andam anŭ, mite Ayŭh kadi-i.

⁹Pak pinyinam-I inŭh: “Pinyirasi-mandis Ku inŭh kayuh adi kuu biguna, amai kuasa Ku agi bās kan kuu ramah.” Kana dŭ aku mingangŭn di pinyiramah adŭp ku, siŭn dapŭd kinyam pinyigrindung kuasa Kristus di tunduh adŭp ku.

¹⁰Munos asŭng ku ngga pinyiramah, ngga bakit so daya, ngga kraja-jera, ngga pinyikisiis, ka ngga pinyusah amai Kristus. Amai di tika aku ramah, di tika anŭ gŭh aku dapŭd pinyibake so Kristus.

¹¹Angān mbŭh bada aku mun daya budo. Angān inŭh adi patut nyibandar aku. Amai au-tarun bait kani aku ati, aku dŭh kurang kana so bara “pinyuruh” ngan anŭ adi angān nang raru kana.

¹²Bagŭ pingandai-nginga ka pingandai-saruh adi kiren aku ati pinyuruh, mbŭh dog ndai di ruang ngan ngga atin adi sukup sabar.

¹³Di ani meh angān kurang dog kingat so bara eklisia adi bŭkŭn, adŭ-i aku bŭn nyusah angān da batu adŭp ku ngga duit? Apun aku kambŭi aku agi ndai sarah di angān!

¹⁴Ati inŭh adi pitaruh saba aku mbŭh sidia an munan angān; dŭh aku an nyusah angān ngga pimite. Angān inŭh adi aku raan, dŭh duit ngan. Sibandar-i, anak dŭh nyiran pimas, pak pimas nyiran anak.

¹⁵Aku an pakai sopŭrŭg adi aku biyŭn, samŭn turang udas adŭp ku, ngga turung angān. Angān re kurang pinyirindu di aku kah sabab aku ruai rindu angān?

¹⁶Samah ata puan aku bŭn nyusah angān tian ti. Pak agi daya re nang aku pinipu, ka kudog angān ngga pinganang kadong.

¹⁷Agi kah aku bada bara pinyisung ku jiroh utung yŭn ku so angān, kan aku pait ngara ka yŭn ngan?

¹⁸Aku mite Titus di, samŭn ndi naan dinge dingan ami adi Kristen. Bisa kah angān nang Titus jiroh utung so angān? Ayŭh ngga aku agi samah pinŭtŭn darŭm kraja, buang kayuh ndai ami agi samah.

¹⁹Kadŭ-i angān pikir kieh tian ti suba an nyibandar adŭp ami di sirung jawin ngan. Dŭh! Kieh minyu nanyam ka pinyibada Kristus di sirung jawin Tapa, ka sopŭrŭg kayuh adi kieh ndai mbŭh taŭn ngga ami pijog angān.

²⁰Aku taru sibia-i kan aku mbŭh mandŭg te, aku dapŭd angān dŭh mun adi aku raan, ka angān dapŭd aku dŭh mun adi angān raan. Aku taru te aku kiris kaii, sina, baji, sibut, paki-pangu ka ngitong daya, uap-sambuh ka pito.

²¹Aku taru sibia-i kan aku mandŭg dinge Tapa ku pimangŭh aku di sirung jawin ngan, ka aku re muās bara daya adi ko dawŭ-i bidosa, pak gibayuh taran pimudip-i adi dŭh tatu anŭ, mun pinyiripong pŭrŭng ngga pingandai kais.