Read Biatah Bidayuh 2 CORINTH 13 Bible Online

2 CORINTH 13 - Biatah Bidayuh bible

2 CORINTH 13

¹ Ati inŭh adi pitaruh saba aku re munan angān. “Tiap pinganang ngga nyarah daya dŭh siŭn dŭh an dog natu duwŭh puan kah taruh naan saksi” sak adi nang Surat-kudus.

²Aku raan kidaan di angān adi ko dawŭ-i bidosa, samŭn ngara adi bŭkŭn; agi aku nyabŭt-i prajah di andu aku munan angān adi piduwŭh saba, pak aku an nang dinge madin darŭm aku jo so angān: darŭm aku mandŭg dinge, mating daya tungang mangān ukum.

³Angān re biyŭn bagŭ aran ngga puan Kristus sawŭ minyu so baba ku. Kan Ayŭh ngatur angān, Ayŭh dŭh ramah; Ayŭh kiren kuasa-I di ruang ngan kidŭ-i.

⁴Amai sunggu-i darŭm pinyiramah Ayŭh dog ukum kabŭs di atuh rigang, Ayŭh udip so kuasa Tapa. Darŭm udip ndi ngga Ayŭh kieh agi ramah gŭh; pak angān re kiris kieh udip so kuasa Tapa, nimun Kristus gŭh udip so kuasa Tapa.

⁵Nakit suba adŭp ngan ka tingga, nang kah udip darŭm pinyabah kah dŭh angān. Tatu angān puan Kristus Jesus agi rŭŭ darŭm angān, anŭ inŭh kambŭi angān dŭh arah darŭm pisuba anŭ.

⁶Aku harap angān puan kieh ko nakit dog suba ka mbŭh taŭn sawŭ pinyuruh adi sawŭ.

⁷Kieh bidua ka Tapa mite angān dŭh ndai sarah; dŭh ngga kieh nyikana adŭp ami, pak isa angān ndai anŭ adi batur, sunggu kieh agi mun daya adi arah.

⁸Amai mating inŭh kayuh bisa ami ndai ngga rawan kayuh adi sawŭ, adŭ-i ngga tunda-i.

⁹Sunggu kieh ramah, kieh gaŭn amai angān bake; ngapŭi kieh bidua siŭn angān jadi masang sukup kana.

¹⁰Anŭ inŭh sabab aku nuris surat ati darŭm aku jo so angān; isa kan aku mbŭh mandŭg aku dŭhsah paŭh karas ngga angān darŭm aku pakai kuasa adi Tuhan mbŭh nggen di aku; kuasa ngga pijog angān, dŭh-i ngga nyirubuh angān.

¹¹Ka madin meh, bara dingan ku, harap angān bua sanang! Gruwŭn aran pimudip adi sukup kana; tunda pinganang ku ati; udip darŭm ndi itong ngga dingan ngan; udip darŭm damai. Ka Tapa pinyirindu ngga damai re agi ngga angān.

¹²Tabi dingan ngan ngga tabi tandā damai. Sopŭrŭg daya digiti adi Tapa mbŭh mien pait tabi ka angān.

¹³Pinyirasi-mandis Tuhan Jesus Kristus ngga pinyirindu Tapa, ka ndi itong Roh Kudus, agi ngga sopŭrŭg ngan.