Read Biatah Bidayuh 2 CORINTH 4 Bible Online

2 CORINTH 4 - Biatah Bidayuh bible

2 CORINTH 4

¹Ngga pinyirasi-I Tapa mbŭh nggen di kieh kraja ati, ngapŭi kieh dŭh re jimŭ.

²Kieh sān ka bŭngŭn sopŭrŭg pingandai bisukan adi nggen mangŭh; kieh dŭh nipu daya, dŭh gŭh kieh nikok pinganang Tapa. Tapa puan kieh kidaan kayuh adi sawŭ; ngga simŭnŭ kieh bisa dog sabah daya.

³Kambŭi Agah kana adi kieh nyuse mbar dog mirati, ngara adi dŭh mirati-i taŭn mbŭh ngara adi manyap.

⁴Ngara dŭh sabah, sabab tapa adi arap di ong ati mbŭh kinarŭm pikir ngara. Ayŭh matŭn ngara so kiris jawa adi nyekar di tunduh ngara, jawa adi mandŭg so Agah Kana pasar bragah Kristus adi tigŭrŭ gayŭn Tapa.

⁵Amai dŭh-i kieh nyuse pasar adŭp ami; kieh nyuse Jesus Kristus adi adŭp-I Tuhan, ka adŭp ami ati inŭh urun ngan yŭn Jesus.

⁶ Tapa adi nang, “Jawa re nyekar darŭm karŭm!” inŭh babŭ Tapa anŭ adi bada jawa-I nyekar darŭm atin ami, isa ata bisa puan bragah Tapa adi nyekar di Jawin Kristus.

⁷Pak kieh adi biyŭn rata roh ati agi keya ka tipayan biasa, siŭn-i kiren kuasa adi siabo bās taŭn mbŭh tung Tapa, dŭh tung jami.

⁸Kieh awet dog pinyusah, pak dŭh kieh arah; kadang kadang dŭh puan ani re ami ndai pak kieh bŭn dŭh bijijŭ.

⁹Bagŭ pinganyu, pak bŭn kieh dŭh biyŭn dingan; kadang kadang dog kijera, pak dŭh kabŭs.

¹⁰Di tadŭ nga-i kieh taban di pŭrŭng ami pinyikabŭs Jesus, isa pimudip-I dog kiris gŭh darŭm pŭrŭng ami.

¹¹Sitŭkŭd kieh udip kieh siraru dŭm tadŭ re kabŭs amai Jesus, siŭn pimudip-I bisa dog kiris di pŭrŭng ami.

¹²Rati-i, kieh ari situra jawin ngga pinyikabŭs, pak angān dapŭd udip.

¹³ Surat-kudus nang, “Aku minyu sabab aku sabah.” Simŭnŭ gŭh kieh, minyu sabab kieh sabah.

¹⁴Kieh puan Tapa adi pakat Tuhan Jesus so kabŭs re pakat gŭh kieh samah ngga Jesus, ka taban kieh samŭn angān ka sirung jawin-I.

¹⁵Sopŭrŭg ati mbŭh sabab angān, isa daya makin bitambah puan munki masam mandis-i Tapa, ka re muji ka kibās Ayŭh.

¹⁶Sabab anŭ inŭh kieh bŭn re jimŭ. Sunggu pŭrŭng ami ati mbŭh makin madam, darŭm roh kieh dog pibauh barang andu.

¹⁷Ka pinyusah ami ati, adi siit buang adi dŭh tui kieh kinyam re taban bragah adi tan adu adu ka kieh, bās dŭ so pinyusah anŭ.

¹⁸Amai kieh dŭh na atin ami di kayuh adi tungang dog kiris, pak di kayuh adi dŭh tungang dog kiris. Kayuh adi tungang dog kiris dŭh-i tan tui, pak kayuh adi dŭh tungang dog kiris tan adu adu.