Read Biatah Bidayuh 2 CORINTH 6 Bible Online

2 CORINTH 6 - Biatah Bidayuh bible

2 CORINTH 6

¹Darŭm kraja ami samah ngga Tapa, meh, kieh mite angān dŭhnyah bada pinyirasi-mandis adi angān kambat so Tapa jadi au-tarun.

² Dingah kayuh adi Tapa nang: “Kan tika adi ngga Aku kiren pinyikana Ku di angān mandŭg, Aku dingah angān; kan andu adi ngga Aku nyiramat angān mandŭg, Aku turung angān.” Dingah! Madin inŭh jam adi ngga nŭŭh trima pinyirasi Tapa; madin inŭh andu adi ngga nŭŭh dog nyiramat!

³Kieh dŭh an bada daya kinarap kraja ami, jadi kieh suba dŭh bada daya sikak sikakong.

⁴Darŭm sopŭrŭg kayuh adi kieh ndai, kieh kiren adŭp ami urun Tapa darŭm nyijŭn ngga atin tŭtŭd bagŭ masam pito, jera, ka pinyusah.

⁵ Kieh mbŭh dog pukong, dog jer, dog tawa; kieh mbŭh nyiraja rabis so patut, ndŭg dŭh bŭŭs bait man.

⁶Ngga pimudip bisig ami, ngga pinyipuan, ngga atin sabar, ka ngga atin mandis kieh mbŭh kiren adŭp ami urun Tapa. Roh Kudus agi ngga kieh, ka pinyirindu ami taŭn sawŭ.

⁷Kieh piagah agah so Tapa, ka kuasa Tapa agi ngga kieh. Pinŭnggŭn inŭh sinyata ami, pakai ami rawan ka pakai ami tak adŭp ami.

⁸Kieh dog stabi ka dog pimangŭh; kieh dog ngamun ka dog muji. Daya nang kieh pingadong, pak kieh minyu kayuh adi sawŭ.

⁹Mun adi dŭh dog puan, pak sopŭrŭg daya puan kieh; mun adi kabŭs, pak babŭ udip. Sunggu dog ukum, kieh dŭh dog siŭ.

¹⁰Sunggu dog pinyusah, kieh siraru gaŭn; mun adi sirata, pak kieh bada bagŭ daya kaya; mun adi dŭh biyŭn kayuh, pak kieh biyŭn sopŭrŭg kayuh.

¹¹Tabi bara dingan di Corinth! Kieh pus kidaan kayuh di angān; kieh kuka atin ami yŭn ngan.

¹²Kieh dŭh kurang rindu di angān; adŭp ngan inŭh adi kurang rindu di kieh.

¹³Madin aku minyu ngga angān mun adi minyu ngga bara anak adŭp ku. Kuka meh atin ngan yŭn ami mun kieh mbŭh kuka atin ami yŭn ngan.

¹⁴Pijo adŭp ngan so daya adi dŭh sabah di Jesus; dŭh angān brimun. Kayuh adi batur ngga kayuh adi sarah dŭh bisa bigaur. Jawa ngga karŭm dŭh bisa samah rŭŭ.

¹⁵Simuki Kristus ngga Siarap re bisa situju? Di ani daya adi sabah re brimun ngga daya adi dŭh sabah?

¹⁶ Simuki yŭn pinyirŭŭ Tapa re bisa biyŭn gagit-i ngga tibudo? Amai ata inŭh yŭn pinyirŭŭ Tapa adi udip! Nimun adi adŭp Tapa ko nang, “Yŭn pinyirŭŭ Ku inŭh bara daya Ku ka Aku bigaur ngga ngara; Aku re jadi Tapa ngara, ka ngara re jadi daya Ku.”

¹⁷ Tuhan ko gŭh nang, “Angān dŭh siŭn dŭh bu ka nyibarai adŭp ngan so ngara. Dŭhnyah bigaur ngga kayuh adi kais, ka Aku re trima angān.

¹⁸ Aku re jadi Sama ngan, ka angān re jadi bara anak Ku, dari dayung, nang Tuhan adi Bisa-pŭrŭg.”