Read Biatah Bidayuh 2 CORINTH 7 Bible Online

2 CORINTH 7 - Biatah Bidayuh bible

2 CORINTH 7

¹Angān adi aku rindu, sopŭrŭg janji anŭ mbŭh dog ndai yŭn ta. Ngapŭi ata patut pibisig adŭp ta so sopŭrŭg kayuh adi kinais pŭrŭng ngga simangi, ka udip darŭm taru di Tapa, ka bada adŭp ta kudus.

²Kambat kieh darŭm atin ngan. Kieh bŭn ndai sarah di tadŭ daya; kieh bŭn pirusak daya, bait nipu daya.

³Kieh dŭh nang sakanŭ ngga nyarah angān; amai, sak adi ko ku nang dawŭ-i, udip bait kabŭs kieh, angān taŭn siraru di atin ami.

⁴Aku biyŭn puno pinyabah di angān ka mbŭh mingangŭn pasar angān! Darŭm sopŭrŭg pinyusah ami aku biyŭn sukup atin saduh. Raru gaŭn atin ku!

⁵ Ripas kieh mbŭh ndŭg Macedonia, kieh taŭn mbŭh dŭh adŭ tungang rŭŭ paya. Pito timbur di barang yŭn, bikaii ngga daya, ka taru mbŭh timbur darŭm atin ami.

⁶Pak Tapa, adi nyaduh daya adi darŭm pinyutok, mbŭh nyaduh kieh ngga pimandŭg Titus.

⁷Dŭh-i pimandŭg-i adŭ adi bada kieh gaŭn, pak pinganang-i pasar munki angān mbŭh ngatat ayŭh. Ayŭh agi kidaan di kieh nang angān raru an bidapŭd ngga aku, pasar atin nyesar ngan di kayuh adi mbŭh jadi, ka pasar munki angān taŭn sidia an turung aku; ngapŭi aku mbŭh rabis gaŭn madin.

⁸Amai susah bait kani angān da surat ku anŭ, aku dŭh nyesar nuris-i. Sibungas-i aku taŭn nyesar, pak dŭh madin. Aku puan surat ku anŭ bada angān susah nyitiro adŭ.

⁹Pak madin asŭng ku gaŭn; dŭh-i sabab aku ko kandam atin ngan, pak sabab atin mandam ngan anŭ mbŭh bada angān marik pimudip ngan pari ka Tapa. Atin mandam ngan anŭ taŭn-i so Tapa, ngapŭi dŭh-i kieh adi kandam atin ngan.

¹⁰Amai atin mandam ngan anŭ adi so Tapa ngubah atin ngan da nŭtŭn ka aran pinyiramat; anŭ mating arap-i! Pak kambŭi ong ati bada atin ngan mandam, ayŭh bisa taban pinyikabŭs.

¹¹Angān bisa tingga kayuh adi Tapa ndai ngga atin mandam ngan! Angān mbŭh batur batur raan kiren adŭp ngan dŭh sarah! Angān mbŭh bangok, mbŭh gŭgŭh, ka mbŭh gruwŭn an ngukum pingandai sarah! Angān mbŭh kiren adŭp ngan dŭh sarah di sopŭrŭg kayuh anŭ.

¹²Jadi, sunggu aku nuris surat anŭ, dŭh-i sabab sianŭ adi ndai sarah puan kah sianŭ adi yŭn daya ndai sarah. Aku nuris-i ngga kidaan, di sirung jawin Tapa, munki masam tŭtŭd-i angān di kieh.

¹³Anŭ inŭh sabab kieh kinyam adŭp ami dog ngatat. Dŭh dog ngatat adŭ, pak mbŭh raru gaŭn sabab kieh kiris munki masam gaŭn-i Titus. Ayŭh agi kidaan di kieh munki angān bada asŭng-i gaŭn!

¹⁴Dawŭ-i agi aku mingangŭn pasar angān di sirung jawin-i; munos inŭh asŭng ku madin, amai kayuh nang ku sawŭ. Kieh mbŭh siraru minyu kayuh adi sawŭ di angān, ka simŭnŭ gŭh kayuh adi kieh nang pasar angān mbŭh tatŭng sawŭ.

¹⁵Ka pinyirindu-i di angān dŭ dŭ bitambah darŭm-i ingat munki sopŭrŭg ngan mbŭh tunda pinyitayan-i, ka munki angān mbŭh kambat ayŭh ngga atin stabi ngga taru.

¹⁶Mbŭh raru sanang asŭng ku, aku batur batur tungang na atin ku di angān.