Read Biatah Bidayuh 2 CORINTH 8 Bible Online

2 CORINTH 8 - Biatah Bidayuh bible

2 CORINTH 8

¹ Bara dingan, kieh raan kidaan di angān pasar kayuh adi mbŭh dog ndai di eklisia di Macedonia so ka pinyirasi-mandis Tapa.

²Pinyusah adi dog ngara mbŭh bana suba ngara; pak sabab pinyigaŭn ngara adi raru bās ngara ngga atin adi dŭh sibut jugan pinganggen, sunggu ngara daya adi sirata.

³Sawŭ, ngara mbŭh jugan ngga situngang tungang ngara, ka mbŭh jugan rabis so adi tungang ngara jugan, so ka pinyiraan adŭp ngara.

⁴Ngara agi bandar bandar mite adŭp ngara sua biyŭn utung darŭm kraja adi turung bara daya adi Tapa mbŭh mien di Judea.

⁵Anŭ mbŭh rabis so adi kieh harap! Sibungas-i ngara nyerah adŭp ngara di Tuhan; komŭnŭ, ngga pinyiraan Tapa, ngara nyerah adŭp ngara ka kieh gŭh.

⁶Jadi kieh mite Titus, adi bada angān ndai kraja kana anŭ, pijuu ka turung angān ngamas-i.

⁷Angān mbŭh kaya darŭm sopŭrŭg adi angān biyŭn: darŭm pinyabah, darŭm piminyu, darŭm pinyipuan; darŭm gruwŭn an turung ka darŭm pinyirindu ngan di kieh.[4] Ngapŭi kieh raan angān dŭh bidagis darŭm pingandai kana ati.

⁸Aku nang sakanŭ dŭh-i ngga ku mritah angān. Pak darŭm kiren munki masam daya bŭkŭn graŭh an turung, aku suba an puan sawŭ kah dŭh pinyirindu ngan.

⁹Angān puan pinyirasi-mandis Tuhan ta Jesus Kristus; Ayŭh adi kaya, pak sabab angān Ayŭh bada adŭp-I sirata, siŭn angān bisa jadi kaya.

¹⁰Di kira ku, kana dŭ inŭh angān ngamas kayuh adi angān ko piguru sawa prajah. Angān inŭh adi diŭ an nggen, ka mbŭh nggen sabab angān raan.

¹¹Ndai meh, ka ngamas kraja ngan! Angān graŭh piguru-i simŭnŭ gŭh angān patut ngamas-i, buang ndai-i ngga ani ani adi angān biyŭn madin.

¹²Kambŭi angān graŭh an nggen, Tapa taŭn re trima pinganggen ngan anŭ nanyam tungang ngan nggen, dŭh nanyam adi dŭh angān biyŭn.

¹³Dŭh-i aku suba an nyusah angān sabab an turung daya bŭkŭn; pak amai angān biyŭn bagŭ di tika ati, taŭn-i patut angān turung ngara adi sutok. Isa kan angān sutok ka ngara biyŭn bagŭ, ngara re turung angān. Simŭnŭ inŭh pinurung ngan bisa jadi brinyam.

¹⁵ Sak adi nang Surat-kudus, “Ayŭh adi nguruk bagŭ dŭ pinguman dŭh re biyŭn rabis so patut, ka ayŭh adi nguruk nisŭ dŭ pinguman dŭh re biyŭn paŭh nisŭ.”

¹⁶Kieh nggen trima kaseh di Tapa amai Ayŭh mbŭh bada Titus graŭh mun kieh an turung angān!

¹⁷Dŭh ayŭh dingah pimite ami adŭ, pak mbŭh raru graŭh an turung ndŭg ka mbŭh natu adŭp-i an di ka yŭn ngan, so ka pinyiraan adŭp-i.

¹⁸Samah ngga ayŭh kieh pait dingan ami adi mbŭh raru traŭn dŭn-i di dupan sopŭrŭg eklisia amai kraja-i adi nyuse Agah Kana.

¹⁹Tambah gŭh dinge, ayŭh mbŭh dog mien ka dog tijuan bara eklisia da sua ngga kieh ndai kraja kana ati yŭn bragah Tuhan buang ngga kiren kieh sawŭ an turung.

²⁰Kieh an nakit ngga pinganggen anŭ, isa daya dŭh bidudu.

²¹ Pinŭtŭn ami inŭh ndai kayuh adi batur, dŭh di jawin Tapa adŭ, pak di sirung jawin sopŭrŭg daya.

²²Jadi kieh pait dingan ami da sua ngga ngara; mbŭh siraru kieh suba ayŭh ka mbŭh puan ayŭh taŭn graŭh an turung. Ka sabab madin ayŭh mbŭh biyŭn sukup atin-sabah di angān, ayŭh taŭn rabis an turung.

²³Mun Titus, ayŭh inŭh apid ku di kraja ku ngga turung angān; mun bara dingan adi bŭkŭn adi samah panu ngga ayŭh, ngara anŭ ngarun eklisia ka kraja pingandai ngara agi taban bragah ka Kristus.

²⁴Kiren pinyirindu ngan di ngara, isa sopŭrŭg eklisia kiris-i ka puan kieh dŭh kadong kan kieh mingangŭn pasar angān.