Read Biatah Bidayuh 2 CORINTH 9 Bible Online

2 CORINTH 9 - Biatah Bidayuh bible

2 CORINTH 9

¹Dŭhsah aku nuris ka angān pasar pinurung adi dog pait ka bara daya adi Tapa mbŭh mien di Judea.

²Aku puan angān taŭn raan turung, ka aku muko mingangŭn pasar angān di daya di Macedonia. “Bara adi sabah di Jesus di Achaia,” aku nang, “mbŭh sidia an turung so sawa prajah.” Atin graŭh ngan mbŭh ngatat ngara.

³Madin aku pait bara adi sabah anŭ, isa pinganang ami pasar angān di kayuh anŭ dŭh jadi au-tarun. Pak, sak adi nang ku, angān mbŭh sidia an nggen pinurung.

⁴Pak kambŭi agi kada daya so Macedonia mandŭg ngga aku ka dapŭd angān dŭh sidia, munki masam mangŭh meh kieh, amai kieh ko na puno pinyabah di angān. Adŭp ngan mangŭh gŭh!

⁵Jadi aku pikir mbŭh kana dŭ inŭh kieh bada bara adi sabah anŭ di ka yŭn ngan diŭ so aku, siŭn awar sidia pinganggen adi angān ko bijanji an nggen. Kan aku mandŭg, kayuh anŭ mbŭh sidia, dŭh sabab angān dŭh siŭn dŭh nggen pak sabab angān taŭn an nggen.

⁶Ingat, sianŭ adi purun nisŭ bine re ngatŭm nisŭ buwa; sianŭ adi purun bagŭ bine re ngatŭm bagŭ buwa.

⁷Barang naan angān patut nggen, nimun angān ko natu an nggen, dŭh ngga atin nyesar puan kah sitagar angān dŭh siŭn dŭh nggen; amai Tapa rindu daya adi nggen ngga sanang asŭng-i.

⁸Ka adŭp Tapa bisa nggen di angān rabis so adi angān biguna, isa angān bisa siraru biyŭn sopŭrŭg kayuh adi angān biguna, ka biyŭn rabis so sadang yŭn barang kraja kana.

⁹ Sak adi nang Surat-kudus, “Ayŭh nggen ngga siabo asŭng-i di daya sirata; mandis-i tan adu adu.”

¹⁰ Ka Tapa adi nggen bine di daya adi tukang purun ka pinguman yŭn man, re nggen gŭh di angān sopŭrŭg bine adi angān biguna ka bada-i timbu ka piruah bagŭ buwa yŭn ngatŭm so ka atin ngan adi dŭh sibut.

¹¹Ayŭh re bada angān jadi sukup kaya siŭn angān tungang siraru nggen ngga siabo asŭng ngan, ka simŭnŭ meh bagŭ re nggen trima kaseh di Tapa sabab pinganggen ngan adi ngara kambat so kieh.

¹²Amai pingandai ngan anŭ dŭh-i turung bara daya adi Tapa mbŭh mien ka adi sirata adŭ, pak pijadi atin trima kaseh di Tapa.

¹³Ka sabab pingandai ngan anŭ mbŭh kiren angān sawŭ bidigŭng tagap di Agah Kana Kristus adi angān sabah, bagŭ daya re nggen bragah ka Tapa. Angān mbŭh tunda-i darŭm angān an samah kayuh ngan ngga bara daya Tapa samŭn daya bŭkŭn.

¹⁴Ka ngga pinyirindu ngara re simayang yŭn ngan sabab pinyirasi-mandis adi bās Tapa mbŭh nggen di angān.

¹⁵Ata nggen trima kaseh di Tapa sabab pinganggen-I, adi rabis so tungang manusia kira.