Read Biatah Bidayuh GALATIA 2 Bible Online

GALATIA 2 - Biatah Bidayuh bible

GALATIA 2

¹ Simŭng-pat sawa ripas anŭ aku pari ka Jerusalem ayō Barnabas, taban Titus ani.

²Aku di sabab Tapa mbŭh pinandŭng di aku nang aku patut di. Darŭm tikuruk sadi ngga bara pinguru Kristen aku agi nakit kidaan di ngara Agah Kana adi aku nyuse di daya adi dŭh bangsa Jahudi. Aku dŭh an bada kraja ku dŭh mujur, bait-i adi madin puan kah adi mbŭh.

³Dingan ku Titus, sunggu ayŭh daya Greek, dŭh ayŭh dog takan da bisunat,

⁴sunggu agi daya raan bada ayŭh bisunat. Bara daya anŭ bada adŭp-i mun bara adi sabah di Jesus, mbŭh mŭrŭt ka darŭm tibaran ta keya ka pinyiong, an puan pasar pinyirupas adi ata biyŭn darŭm udip ndi ngga Kristus Jesus. Ngara raan piurun ata,

⁵pak ngga ami bada ajar Agah Kana adi sawŭ anŭ pagŭng yŭn ngan, kieh taŭn sikari kari dŭh nundok di ngara.

⁶ Ngara adi mbŭh dog nyirundeng jadi pinguru Kristen mating nggen di aku pikir-kira bauh. Aku nang sakanŭ, sabab aku dŭh piduri asi ngara; di batŭh Tapa sopŭrŭg daya brimun.

⁷Pak ngara mbŭh puan nang Tapa sawŭ mbŭh tijuan aku da nyuse Agah Kana di daya adi dŭh bangsa Jahudi, nimun Ayŭh ko tijuan Peter da nyuse Agah Kana di daya Jahudi.

⁸Amai so kuasa Tapa aku mbŭh jadi pinyuruh yŭn daya adi dŭh bangsa Jahudi, nimun Peter mbŭh jadi pinyuruh yŭn daya Jahudi.

⁹James, Peter, ka John, adi mbŭh dog nyirundeng jadi pinguru Kristen, mbŭh puan Tapa mbŭh nggen kraja anŭ di aku; jadi ngara bitabi ngga kieh duwŭh Barnabas, ngga nandā kieh agi samah darŭm ndi kraja. Kieh situju aku ngga Barnabas pijuu nyiraja di dupan daya adi dŭh bangsa Jahudi ka adŭp ngara di dupan daya Jahudi.

¹⁰Kaŭs ngara mite kieh ingat sinadan daya adi sirata so tibaran ngara, adi taŭn-i kayuh adi aku mbŭh[3] gruwŭn an ndai.

¹¹Pak kan Peter mandŭg ka Antioch, aku nyakar ayŭh di sirung jawin daya bagŭ, sabab kayuh adi-i ndai mbŭh granan sarah.

¹²Diŭ so bara daya adi dog pait James mandŭg kamanŭ, Peter agi man ngga bara daya adi dŭh bangsa Jahudi adi sabah di Jesus. Pak kan ngara anŭ mbŭh mandŭg, ayŭh ngundur ka dŭh an man ngga ngara, sabab ayŭh taru di tibaran adi raan daya adi dŭh bangsa Jahudi tambit adat sunat.

¹³Bara adi sabah di Jesus so tibaran Jahudi gŭh mbŭh jadi pinakut mun Peter; ka adŭp Barnabas gŭh mbŭh sua mun ngara.

¹⁴Kan aku kiris urah ngara dŭh brinyam ngga ajar Agah Kana adi sawŭ anŭ, aku nang di Peter di sirung jawin sopŭrŭg ngara, “Kuu daya Jahudi, pak kuu dŭh udip mun daya Jahudi; kuu mbŭh mun daya adi dŭh bangsa Jahudi. Simuki meh kuu re bisa suba takan daya adi dŭh bangsa Jahudi udip mun daya Jahudi?”

¹⁵Sawŭ inŭh kieh ati daya Jahudi so pinyibranak ami, ka dŭh “daya adi dŭh bangsa Jahudi adi bidosa,” sak adi nang daya.

¹⁶ Pak kieh puan daya dapŭd bamai ngga Tapa adŭ-i so ka pinyabah-i di Jesus Kristus, dŭh so pinyita Ukum-adat. Kieh mŭnŭ gŭh, mbŭh sabah di Kristus Jesus siŭn dapŭd bamai ngga Tapa so ka pinyabah ami di Kristus, ka dŭh so pinyita Ukum-adat. Amai mating daya dapŭd bamai ngga Tapa so pinyita Ukum-adat.

¹⁷Jadi kambŭi, darŭm kieh suba an bamai ngga Tapa so ka udip ndi ami ngga Kristus, kieh dog dapŭd bidosa mun daya adi dŭh bangsa Jahudi, agi kah sirati-i Kristus adi bada kieh bidosa? Manŭn dŭh!

¹⁸Kambŭi aku pari pijog Ukum-adat adi aku ko nyirubuh, aku kiren adŭp ku mbŭh daya adi miranggar Ukum-adat.

¹⁹Jadi jeja ka Ukum-adat, aku ati kabŭs, dog siŭ adŭp Ukum-adat siŭn aku bisa udip yŭn Tapa. Aku mbŭh dog ukum kabŭs ngga Kristus di atuh rigang,

²⁰isa-i dŭh tia aku adi udip, pak adŭp Kristus udip darŭm aku. Pimudip ku madin inŭh so ka pinyabah ku di Anak Tapa, adi rindu aku ka adi mbŭh kabŭs yŭn ku.

²¹Abah aku tirawan pinyirasi-mandis Tapa. Pak kambŭi daya bamai ngga Tapa so Ukum-adat, rati-i pinyikabŭs Kristus dŭh biguna!