Read Biatah Bidayuh GALATIA 3 Bible Online

GALATIA 3 - Biatah Bidayuh bible

GALATIA 3

¹Budo angān, daya Galatia! Asi nyibudo angān ka bada angān tiyur? Di ruwang batŭh adŭp ngan aku muko nakit kidaan pasar pinyikabŭs Jesus Kristus di atuh rigang!

²Kidaan di aku, agi kah angān kambat Roh Tapa so pinyita ukum-adat, puan kah so dingah Agah Kana ka sabah dieh?

³Mbŭh raru budo-i angān! Angān piguru ngga Roh Tapa; an kah angān ngamas-i ngga kuasa adŭp ngan?

⁴Agi kah sopŭrŭg kayuh adi angān ko so dŭh biyŭn rati? Tatu sopŭrŭg-i biyŭn rati!

⁵Agi kah Tapa nggen Roh Kudus di angān ka ndai pingandai-nginga di ruang ngan sabab angān sita ukum-adat, puan kah sabab angān sabah di Agah Kana adi angān mbŭh dingah?

⁶ Suba kira kayuh adi Abraham ko so; sak adi nang Surat-kudus, “Ayŭh sabah Tapa, ka sabab pinyabah-i Tapa mbŭh ngitong ayŭh tŭnggŭn.”

⁷ Angān patut rada meh, daya adi sawŭ sesang Abraham inŭh daya adi biyŭn pinyabah.

⁸ Surat-kudus ko ninjau nang Tapa re bada daya adi dŭh bangsa Jahudi bamai ngga adŭp-I so ka pinyabah. Jadi Surat-kudus kidaan Agah Kana di Abraham: “So kuu Tapa re nyiberkat sopŭrŭg manusia.”

⁹Abraham sabah ka mbŭh dog nyiberkat; jadi sopŭrŭg adi sabah dog nyiberkat mun ayŭh.

¹⁰ Daya adi bisangan di ukum-adat mbŭh udip di ribo pangu. Amai Surat-kudus agi nang, “Asi asi adi dŭh tunda sopŭrŭg kayuh adi dog nuris darŭm surat Ukum-adat agi udip di ribo pangu Tapa!”

¹¹ Madin, mbŭh granan mating katŭn daya dapŭd bamai ngga Tapa so ka Ukum-adat, sabab Surat-kudus nang, “Kaŭs daya adi bamai ngga Tapa so ka pinyabah re udip.”[4]

¹² Pak Ukum-adat mating gagit-i ngga pinyabah. Surat-kudus agi nang, “Asi asi adi sita ukum-adat re udip sabab Ukum-adat.”

¹³ Pak darŭm-I kambat pangu yŭn ta Kristus mbŭh nubos ata so pangu adi mandŭg so Ukum-adat; amai Surat-kudus nang, “Asi asi adi dog ukum kabŭs di atuh rigang inŭh di ribo pangu Tapa.”

¹⁴Kristus ndai simŭnŭ siŭn so Ayŭh berkat adi Tapa ko bijanji an nggen di Abraham bisa gŭh dog nggen di bara daya adi dŭh bangsa Jahudi. Ka ata meh, so ka pinyabah ta di Tapa, bisa kambat Roh adi Tapa ko bijanji an nggen.

¹⁵Bara dingan, aku an mbit suto danding so kayuh adi jadi barang andu: kan duwŭh naan daya situju di kayuh ka mbŭh na tandā-tangan ngara di surat janji anŭ, mating daya bisa kinating bait ngubah-i.

¹⁶ Jadi meh, Tapa mbŭh ndai janji-I di Abraham ka di sesang-i. Surat-kudus dŭh nang “bara sesang,” rati bagŭ daya, pak “sesang,” rati ndi naan adŭ, adŭp Kristus.

¹⁷ Kayuh adi nang ku inŭh Tapa ko ndai simanya-I ngga Abraham ka bijanji an ingat-i. Ukum-adat, adi dog nggen pat ratus taruh puru sawa ripas anŭ, dŭh bisa pirusak simanya anŭ bait kinating janji Tapa.

¹⁸ Amai kambŭi pinganggen Tapa bisangan di Ukum-adat, pinganggen anŭ dŭh bisa bisangan di janji-I. Sitagar janji-I Tapa mbŭh nggen pinganggen anŭ di Abraham.

¹⁹Ani meh, garang, pinŭtŭn Ukum-adat? Ayŭh dog nggen siŭn-i kiren ani anŭ pingandai sarah, ka-i taŭn babŭ agi ndŭg ka pimandŭg sesang Abraham, adi yŭn janji anŭ dog ndai. Ukum-adat dog taban bara malaikat ngga ndi naan daya adi jadi daya-asah.

²⁰Daya-asah dog biguna kambŭi-i yŭn duwŭh naan daya adŭ; ka Tapa inŭh ndi.[5]

²¹Agi kah kayuh ati sirati-i Ukum-adat rawan janji Tapa? Taŭn-i dŭh! Amai kambŭi manusia kambat ukum-adat adi taban udip, barang naan daya dapŭd bamai ngga Tapa so ka pinyita-i.

²²Pak Surat-kudus nang ndi ong ong mbŭh di ribo kuasa dosa; ka pinganggen anŭ adi dog janji bisangan di pinyabah di Jesus Kristus dog nggen di ngara adi sabah.

²³Pak diŭ so tipuh pinyabah mandŭg, Ukum-adat kurung sopŭrŭg ta keya ka dog jer ndŭg ka pinyabah adi mandŭg anŭ mbŭh dog pinandŭng.

²⁴Jadi meh Ukum-adat inŭh adi digŭng ata ndŭg ka Kristus mbŭh mandŭg, siŭn ata bisa bamai ngga Tapa so ka pinyabah.

²⁵Amai madin daya mbŭh udip ngga pinyabah di Kristus, Ukum-adat mbŭh dŭh tia nguasa ata.

²⁶So ka pinyabah inŭh sopŭrŭg ngan mbŭh bara anak Tapa darŭm angān mbŭh ndi ngga Kristus Jesus.

²⁷Angān mbŭh dog baptisa ka darŭm Kristus, ka madin mbŭh dog kibarui, anŭ inŭh ngga pimudip adŭp Kristus.

²⁸Mbŭh mating katŭn-i daya bangsa Jahudi ngga daya adi dŭh bangsa Jahudi, urun bait adi dŭh urun, dari bait dayung; sopŭrŭg ngan mbŭh ndi amai Kristus Jesus.

²⁹ Kambŭi angān mbŭh tung Kristus, angān mbŭh bara sesang Abraham ka re kambat kayuh adi Tapa ko bijanji an nggen.