Read Biatah Bidayuh GALATIA 4 Bible Online

GALATIA 4 - Biatah Bidayuh bible

GALATIA 4

¹Siragi anak adi re kambat buat-rata nyama-i gibabŭ sŭ, ayŭh agi keya ka urun, sunggu ayŭh adi taŭn dapu sopŭrŭg-i.

²Sitadŭn ayŭh gi-mara, agi daya adi tukang jaga ayŭh ka ngarun ayŭh di sopŭrŭg kayuh-i ndŭg ka tipuh adi sama-i mbŭh miratak.

³Simŭnŭ gŭh ata, mbŭh urun bara roh adi nguasa rangit ngga ong sibayuh ata mbŭh sukup tuuh darŭm pimudip roh.

⁴Pak kan tipuh-i mbŭh mandŭg, Tapa pait Anak adŭp-I. Ayŭh anŭ dog biranak so ndi naan dayung, ka udip di ribo Ukum-adat Jahudi,

⁵ yŭn nubos sinadan daya adi udip di ribo Ukum-adat, isa ata bisa jadi bara anak Tapa.

⁶Ngga kiren adŭp ngan mbŭh[6] bara anak-I, Tapa mbŭh pait Roh Anak-I ka darŭm atin ta, adi bagan, “Sama, Sama ku.”

⁷Jadi meh, angān mbŭh dŭh tia urun pak anak. Ka amai angān mbŭh anak-I, Tapa re nggen di angān sopŭrŭg kayuh adi-I mbŭh sidia yŭn bara anak-I.

⁸Dawŭ-i angān dŭh puan Tapa, ka mbŭh urun kuasa kuasa adi angān pikir tapa.

⁹Pak madin angān mbŭh puan Tapa, puan kah, kana dŭ nang, Tapa mbŭh puan angān; simuki meh angān bisa an pari ka roh roh anŭ, adi ramah buang dŭh biguna? Mani angān an jadi urun ngara dinge?

¹⁰Angān sita andu, sita buran, sita tipuh, sita sawa.

¹¹Aku gapang di angān! Manyah-i kraja ku yŭn ngan mbŭh jadi au-tarun.

¹²Bara dingan, aku mite angān mun aku, amai aku taŭn mun angān gŭh. Angān bŭn ndai sarah di tunduh ku.

¹³Angān ingat ani sabab aku nyuse Agah Kana di angān di sibungas-i; aku nyuse-i di angān sabab aku birandam.

¹⁴Pak sunggu andam ku mbŭh jadi pinyisuba di angān, angān mating ngamun puan kah tirawan aku. Tibarik-i angān kambat aku mun kambat malaikat so shorga. Angān kambat aku mun kambat Kristus Jesus.

¹⁵Angān ko raru gaŭn! Ani meh adi mbŭh jadi? Aku puan, kambŭi bisa, angān sanggup tuket ruwang batŭh adŭp ngan ka nggen-i di aku.

¹⁶Agi kah aku madin jadi pinganyu ngan darŭm aku kidaan kayuh adi sawŭ di angān?

¹⁷Ngara anŭ mbŭh raru an tarik angān da tura ka parad adŭp-i, pak pinŭtŭn ngara dŭh kana. Kayuh adi raan ngara inŭh nyibarai angān so aku, isa angān bidingan ngga adŭp-i.

¹⁸Mating sarah nŭŭh na abo abo atin nŭŭh di kayuh atas-i ngga pinŭtŭn adi kana. Anŭ taŭn sawŭ, ka dŭh-i di tipuh aku agi ngga angān adŭ.

¹⁹Bara anak ku adi aku rindu! Pari dinge aku, keya ka sindŭ di tika biranak, kinyam sarang andam re biranak anŭ yŭn ngan ndŭg ka tibiat Kristus mbŭh jadi darŭm angān.

²⁰Batang aku an bada adŭp ku agi ngga angān madin, isa aku dŭhsah minyu mun ati. Aku raru gapang di angān!

²¹Aku an siken angān adi raan bada adŭp ngan di ribo Ukum-adat: Dŭh kah angān dingah kayuh adi nang Ukum-adat?

²² Abraham biyŭn duwŭh anak dari, ndi so dayung urun, anŭ ndi dŭh so dayung urun.

²³Anak-i so dayung urun dog biranak so pinyiraan pŭrŭng, pak anak-i adi so dayung adi dŭh dayung urun dog biranak so janji Tapa.

²⁴Kayuh anŭ bisa nŭŭh ndu awing: duwŭh naan dayung anŭ mbŭh keya ka duwŭh simanya. Dayung anŭ ndi inŭh Hagar, adi urun, biranak bara urun. Ayŭh anŭ inŭh simanya adi dog ndai di Darŭd Sinai.

²⁵Hagar, inŭh Darŭd Sinai di Arabia, mbŭh[7] tandā yŭn kupo Jerusalem adi madin, jadi urun ngga sopŭrŭg daya-i.

²⁶Pak Jerusalem adi di shorga dŭh urun, ayŭh inŭh sindŭ ta.

²⁷ Amai Surat-kudus nang, “Sanang kuu dayung adi dŭh mira! Nyirais meh darŭm gaŭn kuu adi bŭn kinyam sarang andam re biranak! Amai dayung adi dog tagan re biyŭn bagŭ anak so dayung adi bŭn dog tagan banŭh-i.”

²⁸Madin angān, bara dingan ku, mbŭh bara anak Tapa sabab janji-I, nimun Isaac gŭh.

²⁹ Di tika anŭ anak adi dog biranak so ka pinyiraan pŭrŭng ngamun sianŭ adi dog biranak sabab Roh Tapa; babŭ-i mun anŭ madin.

³⁰ Pak ani nang Surat-kudus? Surat-kudus nang, “Bada bu dayung urun anŭ ngga anak dari-i; amai anak-i dŭh re samah dapu buat-rata sama ngga anak adi so dayung adi dŭh dayung urun.”

³¹Jadi meh, bara dingan ku, ata dŭh bara anak so dayung urun pak bara anak so dayung adi dŭh dayung urun.