Read Biatah Bidayuh GALATIA 5 Bible Online

GALATIA 5 - Biatah Bidayuh bible

GALATIA 5

¹Kristus mbŭh nggen di ata pinyirupas. Mijog tagap meh ka dŭhnyah tandah adŭp ngan jadi urun dinge.

²Dingah! Aku, Paul, kidaan di angān: kambŭi angān tandah adŭp ngan dog nyunat, rati-i angān mbŭh dŭh biguna di Kristus.

³Dinge aku nggen pinyibakan di daya adi kambat adat sunat nang ayŭh mbŭh dŭh siŭn dŭh an sita sopŭrŭg atur Ukum-adat.

⁴Sinadan angān adi mbŭh suba an bamai ngga Tapa so pinyita Ukum-adat, mbŭh kadi adŭp ngan so Kristus. Angān mbŭh di sapa pinyirasi-mandis Tapa.

⁵Mun kieh, kayuh adi kieh harap inŭh Tapa re bada kieh bamai ngga adŭp-I; anŭ kieh kajŭn ngga kuasa Roh Tapa adi turung so ka pinyabah ami.

⁶Amai kan ata mbŭh ndi ngga Kristus Jesus, bisunat bait dŭh ata anŭ mbŭh dŭh biguna tia; adi biguna inŭh pinyabah adi taban pinyirindu.

⁷Dawŭ-i angān mujur! Asi bada angān ko tunda ajar Tuhan? Munki daya anŭ mujuk angān?

⁸Anŭ dŭh pingandai Tapa, adi ko bagan angān.

⁹ Sak adi nang daya, “Ndi supek ragi mbŭh sadang ngga pikambang tibaduk.”

¹⁰Pak aku taŭn puan angān. Pimudip ta adi ndi ngga Kristus mbŭh natu di aku angān dŭh re tunda pikir-kira adi bŭkŭn, ka asi asi adi nyusah angān re dog ukum Tapa.

¹¹Pak mun aku ati, bara dingan ku, kambŭi aku ngajar nang adat sunat biguna, mani meh garang aku babŭ dog kisiis? Kambŭi anŭ sawŭ, ajar ku pasar pinyikabŭs Kristus di atuh rigang dŭh re taban pito.

¹²Aku harap ngara adi nyusah angān dŭh-i bisunat adŭ, pak nuroi adŭp-i!

¹³Mun angān, bara dingan ku, mbŭh dog bagan da jadi daya bebas. Pak dŭhnyah bada-i jadi aran yŭn pinyiripong pŭrŭng nguasa angān. Bada-i jadi aran yŭn ngan turung dingan ngan ngga pinyirindu.

¹⁴ Amai Ukum-adat mbŭh dog mungus darŭm ndi Pinyipesan ati: “Rindu dingan ngan nimun angān rindu adŭp ngan.”

¹⁵Pak kambŭi angān udip mun dāng adi mangah, kandam ka ngaso dingan ngan, jaga meh siŭn dŭhnyah angān rusak dupan adŭp ngan.

¹⁶Kayuh adi an ku nang inŭh sakati: bada Roh Kudus ngatur pimudip ngan, siŭn angān dŭh nurut pinyiripong tibiat pŭrŭng.

¹⁷ Amai kayuh adi tibiat pŭrŭng raan inŭh rawan kayuh adi Roh Kudus raan, ka kayuh adi Roh Kudus raan rawan kayuh adi tibiat pŭrŭng raan. Anŭ duwŭh taŭn-i mbŭh pinganyu, ka sirati-i angān dŭh tungang ndai kayuh adi angān raan.

¹⁸Kambŭi Roh Kudus nyiruton angān, angān dŭh di ribo Ukum-adat.

¹⁹Pingandai tibiat manusia samah ta puan. Ayŭh kiren adŭp-i di pingandai kais, di pimudip adi sembar, ka di pimudip adi dŭh tatu;

²⁰di nyambah tibudo ngga pingandai siher. Daya jadi pinganyu ngga dingan-i ka bikaii; ngara sina, baji ka tama. Ngara pape nimbur bagŭ kaum ka tibaran;

²¹ngara raru sina, pimabuk, ndai rubi adi sungak, ka bagŭ gŭh pingandai arap adi bŭkŭn adi ngara ndai. Aku bakan angān mun adi mbŭh: daya adi ndai pingandai arap anŭ dŭh re kinyam Pinyipritah Tapa.[8]

²²Pak-i daya adi dog nyiruton Roh Kudus agi mun ati: ngara biyŭn pinyirindu, pinyigaŭn, damai, atin sabar, atin mandis, pinyikana, atin tŭtŭd,

²³atin tŭkŭn, ka pandai jaga adŭp so pinyiripong adi sarah. Mating ukum-adat adi re bisa rawan sopŭrŭg anŭ.

²⁴Ka sinadan daya adi mbŭh tung Kristus Jesus mbŭh siŭ tibiat pŭrŭng ngara samŭn sopŭrŭg pinyiripong ngga pinyiraan-i.

²⁵Roh Kudus mbŭh nggen di ata udip bauh; Ayŭh dŭh siŭn dŭh an nguasa pimudip ta.

²⁶Ata dŭh siŭn miruap bait kinuas dingan puan kah sina di dingan.