Read Biatah Bidayuh GALATIA 6 Bible Online

GALATIA 6 - Biatah Bidayuh bible

GALATIA 6

¹Bara dingan ku, kambŭi agi daya dog nakap darŭm ndai sarah, angān adi udip dog nyiruton Roh Kudus patut nyiruton ayŭh da kana; pak ngajar ayŭh ngga aran adi duduh. Ka nakit jaga adŭp ngan sibia-i angān dog suba gŭh te.

²Turung dingan ngan adi dog pinyusah. Simŭnŭ, angān mbŭh sita ukum-adat Kristus.

³Kambŭi angān pikir adŭp ngan kana, darŭm sibandar-i angān dŭh, angān kadong adŭp ngan.

⁴Barang naan angān patut tingga adŭp ngan di urah-rakah ngan. Kambŭi kana, angān bisa mingangŭn di kayuh adi angān ko ndai, dŭh danding-i ngga pingandai daya bŭkŭn.

⁵Amai tiap naan ata dapu tanggong adŭp ta di sirung jawin Tapa.

⁶Kambŭi angān mbŭh trima ajar Kristus, angān patut kutung ngga gurū ngan sopŭrŭg kayuh kana adi angān biyŭn.

⁷Dŭhnyah angān budo; Tapa dŭh bisa dog kadong. Anŭ adi angān purun, anŭ gŭh re angān ngatŭm.

⁸Kambŭi angān purun nanyam ka pinyiraan manusia, angān re ngatŭm pinyikabŭs; kambŭi angān purun nanyam ka pinyiraan Roh Kudus, so Roh Kudus angān re dapŭd pingatŭm udip adi sawŭ adi tan adu adu.

⁹Ka dŭhnyah meh ata kawŭk ndai pingandai kana; amai kambŭi ata dŭh jimŭ, andu-i re mandŭg kan ata re kambat upah-i.

¹⁰Jadi meh, tiap kari ata biyŭn pluang, ata patut ndai kana di sopŭrŭg daya, ka rabis-i di ngara adi pinunda Tuhan.

¹¹Angān kiris turis turis adi baga aku pakai ngga nuris surat ka angān tong-i ngga tangan adŭp ku!

¹²Daya adi suba an takan angān da bisunat taŭn-i mbŭh daya adi raan mirawa buang mingangŭn pasar kayuh adi tungang dog kiris. Ngara ndai simŭnŭ ngga-i mangān adŭp-i dog kisiis sitagar rigang Kristus.

¹³Pak adŭp ngara adi bisunat dŭh gŭh sita Ukum-adat; ngara raan angān bisunat amai an mingangŭn pasar angān mbŭh tunda adat pŭrŭng.

¹⁴Ka aku ati, kaŭs aku an mingangŭn pasar rigang Tuhan ta Jesus Kristus; amai ngga pinyikabŭs Kristus di atuh rigang, ong ati mbŭh dŭh biyŭn rati di aku, ka aku gŭh mbŭh keya ka kabŭs di kayuh ong.

¹⁵Dŭh-i mani, bait bisunat puan kah dŭh bisunat; kayuh adi biguna inŭh ata jadi manusia adi bauh.

¹⁶Mun ngara adi tunda atur anŭ di pimudip ngara, isa-i damai ngga masi Tapa agi ngga ngara samŭn sopŭrŭg daya adi Tapa mbŭh mien!

¹⁷Sikasŭn-i, aku mite dŭhnyah daya tia nyusah aku, sabab arit di pŭrŭng ku ati agi tandā aku mbŭh urun Jesus.

¹⁸Isa-i pinyirasi-mandis Tuhan ta Jesus Kristus agi ngga sopŭrŭg ngan, adi bara dingan ku. Amen.