Read Biatah Bidayuh EPHESUS 2 Bible Online

EPHESUS 2 - Biatah Bidayuh bible

EPHESUS 2

¹ Dawŭ-i angān kabŭs darŭm roh sabab atin tangek ngga dosa ngan.

²Nganŭ angān kadŭg aran pimudip ong adi sarah; angān bituan di pinguasa roh roh adi arap di rangit ngga di ong, anŭ inŭh roh adi nguasa daya adi nyibireu pinganang Tapa.

³Sibandar-i sopŭrŭg ata mbŭh mun ngara, udip nunda ka tibiat ta manusia, ndai barang masam kayuh nanyam ka pinyiraan pŭrŭng ngga pikir-kira ta. Nunda tibiat ong ta ati, mun barang naan daya bŭkŭn gŭh, ata mbŭh taŭn re kinyam baji Tapa.

⁴Pak Tapa taŭn-I raru masi, ka pinyirindu-I di ata agi raru bās.

⁵Darŭm ata agi keya ka kabŭs sabab atin tangek ta, Ayŭh mbŭh kudip ata ngga Kristus. So ka pinyirasi-mandis Tapa inŭh angān mbŭh dog nyiramat.

⁶Darŭm ata udip ndi ngga Kristus Jesus, Tapa mbŭh pakat ata ngga Ayŭh da mritah ngga Ayŭh di shorga.

⁷Ayŭh ndai anŭ ngga-I kiren yŭn adu adu pinyirasi mandis-I adi raru bās darŭm pinyirindu-I adi-I kiren di ata darŭm Kristus Jesus.

⁸Amai so ka pinyirasi-mandis Tapa inŭh angān dog nyiramat sabab angān sabah di Jesus; dŭh so ka kraja pingandai adŭp ngan, pak mbŭh pinganggen adŭp Tapa, isa daya dŭh mingangŭn.

¹⁰Ata ati pingandai Tapa, ka darŭm ata udip ndi ngga Kristus Jesus, Tapa mbŭh napa ata yŭn pingandai kana, adi-I mbŭh diŭ sidia da ata ndai.

¹¹Dŭh kambŭt angān dŭh bangsa Jahudi, ka daya Jahudi kadŭn angān “daya adi dŭh bisunat.” Ngara nang adŭp-i daya adi bisunat (sirati-i kayuh adi daya ndai di pŭrŭng ngara). Ingat nŭh munki pimudip ngan dawŭ-i.

¹²Di tika anŭ angān jo so Tapa. Angān daya tami, dŭh so tibaran daya adi ko dog mien Tapa. Angān dŭh biyŭn utung di simanya anŭ, adi taŭn bisangan di janji Tapa ngga daya-I, ka darŭm angān rŭŭ di ong ati angān dŭh biyŭn pingarap buang dŭh biyŭn Tapa.

¹³Pak madin, darŭm udip ndi ngga Kristus, angān adi ko jo so Tapa, mbŭh sindŭk da pinyikabŭs Kristus adi sadis.

¹⁴Amai adŭp Kristus mbŭh taban damai ka ata darŭm-I bada daya bangsa Jahudi ngga daya adi dŭh bangsa Jahudi jadi ndi bangsa. Ngga pŭrŭng adŭp-I Ayŭh mbŭh nyirubuh sindung baat adi nyibarai ngara ka adi bada ngara jadi pinganyu.

¹⁵ Ayŭh mbŭh taran Ukum-adat Jahudi samŭn sopŭrŭg pinyipesan ngga atur atur-i, siŭn-I pijadi ndi bangsa adi bauh so so-duwŭh bangsa anŭ darŭm udip ndi ngga Ayŭh; ka darŭm ndai simŭnŭ pijadi damai.

¹⁶ Ngga pinyikabŭs-I di atuh rigang Kristus mbŭh bada ngara bidamai; ngga rigang anŭ Ayŭh bada duwŭh bangsa anŭ jadi ndi ka taban ngara pari ka Tapa.

¹⁷ Simŭnŭ inŭh meh Kristus mandŭg ka nyuse Agah Kana damai di sopŭrŭg, anŭ inŭh di angān adi dŭh bangsa Jahudi adi ko jo so Tapa, ka di daya bangsa Jahudi, adi ko sindŭk Tapa.

¹⁸Ka so Kristus inŭh sopŭrŭg ata adi bangsa Jahudi ngga adi dŭh bangsa Jahudi, mbŭh dapŭd mandŭg darŭm ndi Roh ka sirung jawin Sama.

¹⁹Jadi meh, angān adi dŭh bangsa Jahudi mbŭh dŭh tia daya tami puan kah daya saruh; angān madin mbŭh ndi ngga bara daya adi Tapa mbŭh mien buang mbŭh pinanak darŭm rawang Tapa.

²⁰Angān gŭh mbŭh dog pijog di tunduh pimŭnŭs adi dog na bara pinyuruh ka bara nabi,[4] ngga Kristus Jesus adi adŭp-I batuh pinagap.

²¹Ayŭh inŭh adi digŭng ndi ramin ramin anŭ, samŭn sikuh anjung-i ka bada-i jadi ramin Tapa adi kudus yŭn Tuhan.

²²Darŭm udip ndi ngga Ayŭh angān gŭh mbŭh dog pijog ngga sopŭrŭg daya bŭkŭn ka darŭm pinyirŭŭ Tapa so ka Roh Kudus-I.