Read Biatah Bidayuh EPHESUS 3 Bible Online

EPHESUS 3 - Biatah Bidayuh bible

EPHESUS 3

¹Sabab anŭ inŭh aku, Paul, adi mbŭh jadi pinyuruh Kristus bidua ka Tapa yŭn ngan adi dŭh bangsa Jahudi.

²Angān tatu muko dingah Tapa, darŭm pinyirasi mandis-I, mbŭh nggen di aku kraja ati yŭn kana adŭp ngan.

³Tapa mbŭh pinandŭng di aku atur pinyiraan-I, adi tian ti taŭn mbŭh rusia-I. (Aku muko nuris kayuh anŭ ngga purok,

⁴ ka kambŭi angān basa kayuh adi ko ku nuris, angān dapŭd birajar pasar kayuh adi aku mirati pasar rusia Kristus.)

⁵Jaman jah, rusia anŭ mating dog kidaan di manusia, pak madin Tapa, ngga Roh Kudus, mbŭh pinandŭng-i di bara pinyuruh ngga nabi kudus-I.

⁶Rusia anŭ inŭh, so ka Agah Kana daya adi dŭh bangsa Jahudi mbŭh sua dapu utung di berkat Tapa ngga bara daya Jahudi; ngara mbŭh sua darŭm ndi pŭrŭng anŭ ka sua dapu kayuh adi Tapa ko bijanji an nggen so Kristus Jesus.

⁷Aku mbŭh jadi urun Agah Kana sabab pinganggen bās Tapa, adi-I nggen di aku so ka pingandai kuasa-I.

⁸Aku agi siabo sŭ so sianŭ adi sŭ dupan bara daya adi Tapa mbŭh mien; pak Tapa mbŭh raru kana an bada aku taban ka daya adi dŭh bangsa Jahudi Agah Kana pasar berkat Kristus adi raru tŭrŭp-i,

⁹ka bada sopŭrŭg daya kiris munki Tapa re pijadi atur pinyiraan-I, adi tian ti taŭn mbŭh rusia-I. Tapa, adi Pinapa sopŭrŭg kayuh, sukan rusia-I so sibungas ong,

¹⁰siŭn ngga eklisia, di tika ati, sopŭrŭg adi mritah samŭn ngara adi bikuasa di rangit ngga di ong bisa puan pinyibijak Tapa darŭm barang masam gaya-i.

¹¹Tapa ndai simŭnŭ nanyam ka tujuan-I adi tan adu adu, adi-I pijadi so Kristus Jesus Tuhan ta.

¹²Darŭm udip ndi ngga Kristus buang so ka pinyabah ta di Ayŭh ata pus di ka sirung jawin Tapa ngga sukup atin-sabah.

¹³Aku mite angān dŭhnyah jimŭ sitagar aku mbŭh sangsara yŭn ngan; sopŭrŭg anŭ mbŭh yŭn kana adŭp ngan.

¹⁴Sabab anŭ meh aku sidikang di sirung jawin Sama,

¹⁵adi so barang rawang di shorga ngga di ong kambat dŭn batur-i.

¹⁶Aku mite Tapa so kaya bragah-I nyibake simangi ngan ngga Roh-I,

¹⁷ka aku simayang gŭh mite Kristus rŭŭ darŭm atin ngan so ka pinyabah ngan di Ayŭh. Aku simayang mite sopŭrŭg kraja pingandai ngan bisangan di pinyirindu,

¹⁸isa angān, samah ngga sopŭrŭg daya adi Tapa mbŭh mien, bisa batur batur mirati munki bayah ngga ambu-i, munki bigatung ngga tŭrŭp-i, pinyirindu Kristus.

¹⁹Sawŭ, isa-i angān puan pinyirindu-I adi rabis so tungang nŭŭh mirati, ka isa angān jadi brisi ngga tibiat Tapa ngga sipuno-i.

²⁰So kuasa-I adi nyiraja darŭm ata, Tapa tungang ndai bagŭ masam kayuh rabis so tungang ata mite puan kah kira:

²¹bragah ka Tapa darŭm eklisia ngga darŭm Kristus Jesus madin ngga siraru ndŭg situi tui! Amen.