Read Biatah Bidayuh EPHESUS 4 Bible Online

EPHESUS 4 - Biatah Bidayuh bible

EPHESUS 4

¹Aku adi mbŭh dog jer sabab aku bituan di Tuhan, mite angān udip nanyam ka atur aran pimudip adi Tapa mbŭh nggen di angān di andu Ayŭh bagan angān.

² Angān an siraru pirapat adŭp ngan, duduh ngga daya, ka sabar ngga daya. Turung dingan ngan ngga pinyirindu.

³Ngga sibisa bisa ngan, ngga damai adi ngabŭt angān, magŭng pimudip ngan adi udip darŭm ndi pekat adi Roh Kudus mbŭh nggen di angān.

⁴Agi ndi pŭrŭng ka agi ndi Roh, nimun agi ndi pingarap adi taŭn mbŭh sabab-i Tapa bagan angān.

⁵Agi ndi Tuhan, ndi pinyabah, ndi baptisa;

⁶Agi ndi Tapa adi Sama sopŭrŭg manusia, adi Tuhan sopŭrŭg, nyiraja so sopŭrŭg, ka rŭŭ darŭm sopŭrŭg daya.

⁷Niap naan ata mbŭh kambat pinyirasi-mandis adi brinyam ngga anŭ adi ko Kristus nggen.

⁸ Sak adi nang Surat-kudus, “Kan Ayŭh maad ka sambu, Ayŭh taban bara daya-takap ngga adŭp-I; Ayŭh nggen pinganggen di manusia.”

⁹Ani meh rati-i “Ayŭh maad ka sambu”? Rati-i, Ayŭh diŭ mūn ka rasan ong ati adi siabo tŭrŭp.[5]

¹⁰Jadi sianŭ adi mūn ka sagān agi sianŭ adi maad ka sambu ka yŭn adi siabo bigatung so sopŭrŭg rangit, ndŭg ka sopŭrŭg-i mbŭh brisi ngga adŭp-I.

¹¹Ayŭh inŭh adi “nggen pinganggen di manusia”; Ayŭh tijuan kada daya da jadi pinyuruh, adi bŭkŭn jadi nabi, adi bŭkŭn jadi pinyuse Agah Kana, adi bŭkŭn jadi pingingat eklisia ka gurū.

¹²Ayŭh ndai simŭnŭ ngga sidia sopŭrŭg daya adi Tapa mbŭh mien yŭn kraja pingandai Kristen, ngga pijog pŭrŭng Kristus.

¹³Jadi ata meh, re mandŭg tikuruk jadi ndi darŭm pinyabah ngga darŭm pinyipuan pasar Anak Tapa; ata re jadi daya adi sukup mirati, ndŭg ka mbŭh sukup brimun ngga Kristus.

¹⁴Ka ata dŭh re tia mun anak-anya, udah anyut kamati kamanŭ da sabak ajar daya pinipu, adi taban daya ka aran pimudip adi sarah ngga akar tipu adi ngara nimbu.

¹⁵Pak minyu kayuh adi sawŭ ngga atin adi puno ngga pinyirindu, ndŭg ka ata jadi sukup tuuh darŭm pikir-kira di tadŭ tadŭ kayuh ka jadi nimun Kristus adi ubak eklisia.

¹⁶ Di ribo kuasa-I sopŭrŭg utung pŭrŭng adi dŭh brimun jadi birasŭk, ka ndi pŭrŭng pŭrŭng ganan mbŭh dog tubu ngga tiap tiap bukuh adi ko dog sidia. Jadi kan ndi sakap pŭrŭng nyiraja nanyam patut, ndi pŭrŭng pŭrŭng ganan anŭ dŭ dŭ masang buang kambang sabab pinyirindu.

¹⁷Ngga adŭn Tuhan meh aku bakan angān: dŭhnyah tia udip mun daya adi dŭh puan Tapa, adi pikir kira-i au-tarun.

¹⁸Ngara dŭh mirati kayuh. Ngara dŭh biyŭn utung darŭm pimudip adi Tapa nggen, sabab atin budo ngara, buang baking.

¹⁹Ngara dŭh biyŭn atin mangŭh; ngara nurut barang masam pinyiripong pŭrŭng buang dŭh ngang ndai pingandai adi dŭh tatu.

²⁰Dŭh-i anŭ adi angān birajar pasar Kristus!

²¹Angān tatu ko dingah pasar Ayŭh, ka darŭm angān jadi pinunda-I angān mbŭh trima ajar adi sawŭ pasar Jesus.

²² Jadi taran meh pimudip ngan adi amba, adi bada angān mun adi mbŭh, anŭ inŭh rusak da pinyiraan ngga pingandai tipu-i.

²³Atin ngga pikir-kira ngan an dog ngubah da sukup bauh,

²⁴ ka adŭp ngan dŭh siŭn dŭh an kasŭk pimudip adi bauh, adi dog napa nunda ka gayŭn Tapa ka nandŭng adŭp-i darŭm pimudip adi sawŭ, anŭ inŭh adi tŭnggŭn buang kudus.

²⁵ Dŭhnyah tia kadong! Barang naan dŭh siŭn dŭh nang kayuh adi sawŭ di dingan adi samah sabah di Jesus, sabab sopŭrŭg ta mbŭh samah darŭm ndi pŭrŭng Kristus.

²⁶ Kambŭi angān baji, dŭhnyah bada baji ngan bada angān bidosa; ka dŭhnyah baji ndŭg batŭh andu simŭdŭp.

²⁷Jaga meh siŭn dŭhnyah nggen pluang di Siarap.

²⁸Daya adi pinaku, dŭhnyah-i tia naku pak nyiraja ngga nyiran adŭp-i pakai aran adi batur, siŭn-i dapŭd nggen di daya adi sirata.

²⁹Dŭhnyah pinganang adi pirusak ruah so baba ngan, pak pinganang adi biguna adi pijog buang adi nggen pinurung, isa kayuh adi angān nang taban pinyikana di ngara adi dingah.

³⁰Ka dŭhnyah bada Roh Kudus susah; amai Roh Kudus inŭh tandā angān mbŭh daya Tapa, adi jamen Andu re mandŭg adi ngga Tapa re nggen pinyirupas di angān.

³¹Dŭhnyah bidendam, gŭtŭh, puan kah baji. Dŭhnyah tia bikaii puan kah bakit daya. Dŭhnyah tia tiru di daya.

³² Pak, mandis ngga dingan ngan, ka apun dingan ngan nimun Tapa so Kristus mbŭh apun angān.