Read Biatah Bidayuh EPHESUS 6 Bible Online

EPHESUS 6 - Biatah Bidayuh bible

EPHESUS 6

¹ Anak-anya, nanyam ka atur adat Kristen,[8] angān patut dingah pinganang pimas ngan, amai anŭ inŭh kayuh adi batur.

² “Stabi di sindŭ sama ngan” inŭh sibungas Pinyipesan adi agi janji dog nambah dieh:

³“isa pimudip ngan sanang, buang udip tui di ong.”

⁴ Angān adi pimas, dŭhnyah ida ida ngga anak ngan ndŭg ka bada ngara baji. Pak nyiruton ngara ngga atur aran pimudip ka ajar Kristen.

⁵ Angān adi urun, nurut pinganang tuan ngan ngga atin taru; ndai kraja ngan ngga atin tŭnggŭn, mun adi bituan di Kristus.

⁶Nurut pinganang ngara dŭh di tika ngara nyibatŭh angān adŭ, amai an kana di batŭh ngara; pak ngga siabo asŭng ngan ndai pinyiraan Tapa, nimun urun Kristus.

⁷Ndai kraja ngan nimun urun ngga sanang asŭng, mun adi bituan di Tuhan, ka dŭh mun daya adi nyiraja yŭn manusia adŭ.

⁸Ingat nŭh, Tuhan re ngupah barang naan daya, bait-i urun bait-i dŭh urun, yŭn kraja kana-i.

⁹ Angān adi tuan, simŭnŭ gŭh patut ngga bara urun ngan, ka dŭh tia pitaru ngara. Ingat nŭh adŭp ngan ngga bara urun ngan mbŭh samah dog dapu ndi Tuan, anŭ inŭh Tuhan adi di shorga, adi dŭh mien daya.

¹⁰Sikasŭn-i, nagap adŭp ngan udip ndi ngga Tuhan ngga kuasa bās-I.

¹¹Kasŭk sopŭrŭg pimakai-basi adi Tapa mbŭh nggen di angān, isa angān tungang tak adŭp ngan so akar Siarap.

¹²Amai dŭh inŭh ata rawan manusia pak rawan sopŭrŭg kuasa adi arap di rangit, anŭ inŭh roh roh adi bikuasa adi mritah jaman adi karŭm ati.

¹³Jadi madin, kasŭk pimakai-basi Tapa, isa kan andu adi arap anŭ mandŭg, angān re tungang rawan serang pinganyu; ka kan ko birawan ndŭg pinŭbŭn-i, angān re babŭ tagap mijog.

¹⁴ Jadi sidia meh adŭp ngan, ka pakai ajar adi sawŭ pasar Tapa ndu abŭt kupong dog ngabŭt tagap di kupong ngan, ka pinŭnggŭn ndu basi pinapas sudo ngan,

¹⁵ ka atin adi sidia an piagah Agah Kana damai ndu kasut ngan.

¹⁶Angān an ari taban pinyabah ndu pinangin ngan; ngga pinangin anŭ angān dapŭd tak adŭp ngan so sopŭrŭg reja-panah apui Siarap.

¹⁷ Ka kambat pinyiramat ndu tupi basi ngan, ka pinganang Tapa ndu pedang adi Roh Kudus ko nggen di angān.

¹⁸Ndai sopŭrŭg anŭ ngga simayang, mite turung so Tapa. Simayang di tadŭ nga-i, ngga kuasa Roh Kudus. Sabab anŭ angān an ari sidia ka dŭhnyah arah. Siraru simayang yŭn sopŭrŭg daya adi Tapa mbŭh mien.

¹⁹Simayang gŭh yŭn aku, isa Tapa nggen di aku ajar adi patut kan aku minyu, isa aku pagan minyu ka kidaan di daya rusia Agah Kana.

²⁰Sitagar Agah Kana anŭ aku mbŭh jadi ndi masam pinyisung, sunggu aku madin darŭm jer. Simayang yŭn ku isa aku pagan, nanyam patut, minyu pasar Agah Kana anŭ.

²¹ Tychicus, dingan ta adi tŭtŭd nyiraja yŭn Tuhan ka adi ata rindu, re kidaan di angān sopŭrŭg kayuh pasar aku, isa angān puan munki aku madin.

²²Ngapŭi aku pait ayŭh ka yŭn ngan, isa ayŭh kidaan di angān munki kieh digiti buang-i ngatat angān.

²³Isa-i Tapa Sama ngga Tuhan Jesus Kristus nggen di sopŭrŭg daya Kristen damai, pinyirindu ka pinyabah.

²⁴Isa-i pinyirasi-mandis Tapa agi ngga sopŭrŭg daya adi rindu di Tuhan Jesus Kristus ngga pinyirindu adi tan adu adu.