Read Biatah Bidayuh PHILIPPI 1 Bible Online

PHILIPPI 1 - Biatah Bidayuh bible

PHILIPPI 1

¹So Paul ngga Timothy, adi urun Kristus Jesus, nuju sopŭrŭg daya adi Tapa mbŭh mien di Philippi adi mbŭh ndi ngga Kristus Jesus, samŭn bara nyamba eklisia ngga bara pinurung:

²Isa-i Tapa adi Sama ta ngga Tuhan Jesus Kristus nggen di angān pinyirasi-mandis ngga damai.

³Aku nggen trima kaseh di Tapa tiap kari aku bipikir pasar angān;

⁴ka tiap kari aku simayang yŭn sopŭrŭg ngan, aku simayang ngga atin gaŭn

⁵sabab gaya ngan adi turung aku darŭm kraja ku adi piagah Agah Kana so sibungas-i ndŭg madin.

⁶Ka aku puan Tapa, adi piguru kraja kana di angān, re pijuu-i ndŭg ka-i kamas di Andu Kristus Jesus mandŭg dinge.

⁷Angān siraru agi darŭm atin ku! Taŭn patut inŭh asŭng ku nyam anŭ di angān, amai angān mbŭh biturung ngga aku di kraja adi Tapa mbŭh nggen di aku. Angān mbŭh turung aku, di tika aku darŭm jer madin ka di tika aku dŭh darŭm jer dawŭ-i, darŭm aku nyibandar Agah Kana buang nyuse-i.

⁸Tapa puan pinganang ku sawŭ kan aku nang pinyirindu ku di angān agi mandŭg so atin adŭp Kristus Jesus.

⁹Aku simayang mite pinyirindu ngan makin bitambah, isa angān natŭng kayuh adi sawŭ ka biyŭn pinimbang adi batur di piningga ngan,

¹⁰isa angān tungang mien kayuh adi sukup kana. Ka di Andu Kristus mandŭg angān dŭh re dog dapŭd ngga takar kais dosa ka sarah.

¹¹Pimudip ngan re brisi ngga pingandai kana adi Jesus Kristus sadi adŭ bisa nggen, yŭn bragah ngga puji ka Tapa.

¹²Aku raan angān puan, bara dingan ku, kayuh adi mbŭh jadi di aku agi turung pimaju kraja pingandai Agah Kana.

¹³ Sabab anŭ, sopŭrŭg soldadu adi jaga istana digiti samŭn ngara adi bŭkŭn mbŭh puan aku dog jer sitagar aku urun Kristus.

¹⁴Ka sabab aku dog jer, batang an sopŭrŭg pinunda Jesus di kupo ati mbŭh biyŭn atin graŭh darŭm Tuhan, adi bada ngara piagah agah anŭ[1] dŭh ngga atin taru.

¹⁵Sawŭ agi kada ngara ngajar pasar Kristus ngga atin sina ka ngga atin adi an bikaii, pak adi bŭkŭn so ka atin adi batur.

¹⁶Ngara ndai simŭnŭ so pinyirindu, sabab ngara puan Tapa mbŭh tijuan aku da nyibandar Agah Kana anŭ.

¹⁷Ngara adi bŭkŭn piagah Kristus dŭh so atin tŭnggŭn-i, pak so pinŭtŭn atin sibut-i. Ngara pikir ngara re tungang ndai bagŭ pinyusah di aku sitadŭn aku darŭm jer.

¹⁸Dŭh mani! Asŭng ku babŭ gŭh sanang, atas Jesus dog nyuse, bait-i ngga pinŭtŭn adi arap puan kah ngga pinŭtŭn adi batur. Ka aku taŭn re babŭ sanang,

¹⁹sabab aku puan, ngga dua ka pinurung ngan adi mandŭg so Roh Jesus Kristus, aku re dog pirupas.

²⁰Kayuh adi ruai ku raan buang harap inŭh aku dŭh re ramah darŭm kraja ku, pak di barang tipuh-i, rabis-i madin, aku re biyŭn atin pagan, isa ngga pimudip ku ati aku bisa taban stabi ka Kristus, bait-i aku udip puan kah kabŭs.

²¹Amai ani meh udip? Di aku, anŭ inŭh Kristus. Kambŭi aku kabŭs, aku taŭn re dapŭd bagŭ utung.

²²Pak kambŭi aku babŭ udip aku bisa ndai rabis bagŭ pingandai biguna; dŭh aku puan aki ndi re ku mien.

²³Soduwŭh-i aku raan. Aku raru raan tingge pimudip ati ka rŭŭ samah ngga Kristus, adi taŭn kana dŭ;

²⁴pak sabab angān, mbŭh biguna dŭ inŭh aku babŭ udip.

²⁵Anŭ, aku mbŭh tatu puan, ka aku puan aku re babŭ agi ngga angān, turung angān mujur ka gaŭn darŭm pinyabah,

²⁶isa kan aku agi ngga angān dinge, angān re biyŭn rabis bagŭ sabab yŭn mingangŭn pasar aku darŭm angān udip ndi ngga Kristus Jesus.

²⁷Jadi, kayuh adi raru biguna inŭh aran pimudip ngan patut nanyam ka ajar Agah Kana pasar Kristus isa, tungang bait dŭh aku di tudu angān, aku bisa dingah angān mijog tagap ngga ndi pinŭtŭn, darŭm ndi pinyiraan samah birawan yŭn pinyabah Agah Kana anŭ.

²⁸Dŭhnyah taru pinganyu ngan; ari bada adŭp ngan pagan ngga kiren di ngara adŭp ngan re manang ka adŭp ngara re arah, sabab Tapa inŭh adi nggen pimanang di angān.

²⁹Amai angān mbŭh dog nggen aran ngga bituan di Kristus, dŭh-i so ka pinyabah ngan di Ayŭh adŭ, pak so ka sangsara ngan sitagar Ayŭh.

³⁰ Madin angān bisa sua ngga aku darŭm birawan ati. Birawan ati babŭ anŭ adi angān ko kiris dawŭ-i, ka nimun adi angān mbŭh dingah, aku babŭ biperang madin.