Read Biatah Bidayuh PHILIPPI 2 Bible Online

PHILIPPI 2 - Biatah Bidayuh bible

PHILIPPI 2

¹Pimudip ngan darŭm Kristus bada angān bake, ka pinyirindu-I nyaduh angān. Angān mbŭh udip ndi darŭm Roh Kudus,[2] ka angān mbŭh biyŭn atin mandis ngga atin masi di dingan ngan.

²Ngga bada aku bisa jadi sukup gaŭn, aku mite angān udip ngga ndi atin, darŭm ndi pinyirindu, ka darŭm ndi pikir ngga pinŭtŭn.

³Dŭhnyah ndai kayuh so atin sibut puan kah so atin miruap sambuh, pak pirapat adŭp ngan buang siraru nyirundeng daya bŭkŭn agi kana dŭ so adŭp ngan.

⁴Ka ari ingat pinyiraan daya bŭkŭn, dŭh-i pinyiraan adŭp ngan adŭ.

⁵Asŭng ngan patut brimun ngga asŭng Kristus Jesus:

⁶Ayŭh taŭn sawŭ Tapa, pak Ayŭh dŭh an suba bada adŭp-I brimun ngga Tapa.

⁷Pak so pinyiraan adŭp-I Ayŭh pasan sopŭrŭg adi-I biyŭn, ka jadi nimun urun. Ayŭh mandŭg darŭm gayŭn manusia ka udip mun manusia.

⁸Ayŭh pirapat adŭp-I buang panu aran pimudip adi nurut pinyiraan Tapa ndŭg ka pinyikabŭs, anŭ inŭh pinyikabŭs-I di atuh rigang.

⁹Sabab anŭ, Tapa pakat Ayŭh ka yŭn adi bigatung di sambu ka nggen di Ayŭh adŭn adi bās dŭ so dŭn adi bŭkŭn.

¹⁰ Ka sawŭ, yŭn stabi di adŭn Jesus sopŭrŭg adi udip di shorga ngga di ong, ka di ong adi di sagān,[3] re sidikang,

¹¹ka sopŭrŭg re piagah Jesus Kristus Tuhan, yŭn bragah Tapa Sama.

¹²Jadi meh, bara dingan ku adi aku rindu, nimun angān siraru tunda pinganang ku sitadŭn aku agi ngga angān, angān jung ka rabis patut tunda pinganang ku madin sitadŭn aku jo so angān. Ndai kraja ngan darŭm taru ka stabi ngga nyukup adŭp ngan yŭn dog nyiramat,

¹³sabab Tapa agi nyiraja di ruang ngan bada angān raan ka tungang tunda pinyiraan-I.

¹⁴Ndai sopŭrŭg kayuh dŭh ngga mingungut puan kah bikarit,

¹⁵ isa angān dŭh biyŭn sarah ka bisig nimun bara anak Tapa adi sukup kana, adi udip di ruang daya adi arap ka bidosa. Angān dŭh siŭn dŭh nyirinyak di ruang ngara mun bara bitang adi pijawa rangit,

¹⁶darŭm angān nyuse agah adi nggen udip adi sawŭ adi tan adu adu di ngara. Ka kambŭi angān ndai simŭnŭ, aku re biyŭn sabab yŭn mingangŭn pasar angān di Andu pimandŭg Kristus, amai-i re kiren susah-payah ku ngga kraja pingandai ku dŭh jadi au-tarun.

¹⁷Kadŭ aku re dog siŭ ka deya ku re dog ren mun pinganggen di tunduh sadis adi angān jugan ka Tapa ngga kiren angān mbŭh sawŭ sabah di Ayŭh. Kambŭi anŭ sawŭ, sanang asŭng ku isa angān sua gaŭn ngga aku.

¹⁸Simŭnŭ gŭh angān patut sanang asŭng ka sua gaŭn ngga aku.

¹⁹Kambŭi-i pinyiraan Tuhan, aku harap aku tungang pait Timothy ka angān ngga sirikas-i, isa agah pasar angān bisa nyanang asŭng ku.

²⁰Ayŭh sadi adŭ adi samah pikir kira-i ngga aku buang sawŭ mbit bat pasar angān.

²¹Sopŭrŭg daya bŭkŭn kaŭs-i ndai pinyiraan adŭp-i adŭ; dŭh ngara an ndai kayuh adi mbit bat di adŭn Jesus Kristus.

²²Ka adŭp ngan mbŭh puan Timothy taŭn daya adi kana, ka munki ayŭh ngga aku mbŭh nyiraja mun anak ngga sama darŭm kieh piagah Agah Kana.

²³Jadi aku harap aku pait ayŭh ka angān ngga sirikas-i kan aku mbŭh puan munki kayuh re di aku te.

²⁴Aku harap, dŭm dŭh tui, ngga pinurung Tuhan aku re tungang munan angān.

²⁵Aku agi pikir mbŭh patut gŭh aku pait ka angān dingan ta Epaphroditus, adi mbŭh samah nyiraja ngga aku ka birawan ngapid aku nyibandar Agah Kana anŭ, ka adi mbŭh jadi pinyisung so angān yŭn turung aku.

²⁶Ayŭh graŭh an kiris sopŭrŭg ngan ka mbŭh raru susah sabab angān agi dingah ayŭh birandam.

²⁷Taŭn sawŭ ayŭh agi birandam ka mbŭh dŭm tadŭ re kabŭs. Pak Tapa masi di ayŭh, ka dŭh di ayŭh adŭ pak di aku ani, isa pinyusah ku dŭh sera.

²⁸Anŭ meh sabab aku mbŭh raru graŭh an pait ayŭh ka angān, isa angān jadi gaŭn dinge kan angān kiris ayŭh, ka pinyusah adŭp ku gŭh meh bisa miyap.

²⁹Kambat ayŭh ngga atin gaŭn, nimun jurud darŭm Tuhan. Stabi di sopŭrŭg daya adi mun ayŭh,

³⁰amai ayŭh mbŭh ton apŭg asŭng-i ka mbŭh sindŭk re kabŭs ndai kraja Kristus, ramŭn an nggen di aku pinurung adi adŭp ngan dŭh tungang nggen.