Read Biatah Bidayuh PHILIPPI 3 Bible Online

PHILIPPI 3 - Biatah Bidayuh bible

PHILIPPI 3

¹Sikasŭn-i, bara dingan ku, gaŭn meh darŭm angān udip ndi ngga Tuhan. Dŭh mani aku pari nang kayuh adi aku ko nuris ka angān dawŭ-i, amai kayuh anŭ taŭn-i yŭn kana adŭp ngan.

²Jaga adŭp ngan so ngara adi ndai arap, so tibaran kasong, so tibaran adi takan daya da bisunat.

³Dŭh-i ngara pak ata, adi mbŭh kambat sunat adi sawŭ, amai ngga pinurung Roh-I ata nyambah Tapa ka gaŭn darŭm ata udip ndi ngga Kristus Jesus. Ata dŭh bisangan di adat pŭrŭng.

⁴Aku bisa gŭh, sibandar-i, bisangan di adat pŭrŭng. Ka kambŭi daya pikir adŭp-i bisa bisangan di adat pŭrŭng, aku rabis biyŭn bagŭ sabab yŭn ku ndai simŭnŭ.

⁵ Aku dog nyunat kan aku gi-ndi minggu umbur ku. Aku dog biranak daya Israel, so tibaran-asar Benjamin, tigŭrŭ daya Hebrew. Ka pasar bidigŭng di Ukum-adat Jahudi, adŭp ku taŭn ko jadi daya Pharisee,

⁶ ka mbŭh raru nundok dieh ndŭg ka aku kisiis eklisia. Ka pasar daya bisa jadi tŭnggŭn so pinyita pinyipesan Ukum-adat, aku taŭn dŭh biyŭn sarah.

⁷Pak sopŭrŭg kayuh anŭ adi aku ko nyirundeng biguna, madin aku nang dŭh biguna amai Kristus.

⁸Dŭh anŭ adŭ; aku nang sopŭrŭg kayuh dŭh biguna sabab anŭ adi rabis biguna, anŭ inŭh pinyipuan pasar Kristus Jesus Tuhan ku. Sabab Ayŭh aku mbŭh taran sopŭrŭg kayuh; aku nyirundeng sopŭrŭg-i sapok, ramŭn ku an dapŭd Kristus

⁹ka jadi ndi ngga Ayŭh. Aku dŭh tia biyŭn pinŭnggŭn adi dog dapŭd so pinyita Ukum-adat. Aku madin biyŭn pinŭnggŭn anŭ adi dog nggen so ka pinyabah di Kristus, pinŭnggŭn adi mandŭg so Tapa sabab pinyabah.

¹⁰Ndi adŭ kayuh adi raan ku, anŭ inŭh puan Kristus ka kinyam kuasa pinyimakat-I so kabŭs, ka sua kinyam jera birasa-I ka jadi mun Ayŭh darŭm pinyikabŭs-I,

¹¹darŭm aku harap adŭp ku re dog pakat pari udip dinge.

¹²Aku dŭh nang adŭp ku mbŭh dapŭd-i, puan kah nang adŭp ku sukup kana. Aku babŭ nyurong an dapŭd upah anŭ adi ko dog sidia Kristus Jesus.

¹³Bara dingan ku, sibandar-i aku dŭh[4] nyirundeng adŭp ku mbŭh manang ka dapŭd upah anŭ; kayuh adi aku ndai inŭh kambŭt kayuh di punok ku ka situngang tungang ku nyurong an dapŭd anŭ adi di jawin.

¹⁴Jadi aku bikaduh birumba an manang siŭn dapŭd upah anŭ, adi pinyibagan Tapa so ka Kristus Jesus nuju udip adi sawŭ adi tan adu adu.

¹⁵Sopŭrŭg ta adi mbŭh sukup mirati darŭm pimudip roh patut taban pikir-kira adi mun anŭ gŭh. Pak kambŭi agi so angān adi dŭh taban pikir-kira adi sakanŭ, adŭp Tapa re pijawa atin-i.

¹⁶Tadŭ mun-i, pak ja ata masang nunda ka atur adi ata ko tunda tian ti.

¹⁷ Bara dingan ku, tunda meh danding ku. Ka birajar so ngara adi mbŭh tunda danding ami anŭ.

¹⁸Aku ko siraru kidaan kayuh anŭ dawŭ-i, ka madin aku pari nang-i ngga randang batŭh: agi bagŭ daya adi mbŭh, sitagar pimudip-i, jadi pinganyu pinyikabŭs Jesus di atuh rigang.

¹⁹Pinŭbŭn pimudip daya adi mun anŭ taŭn-i di neraka, sabab tapa ngara inŭh pŭrŭng adŭp ngara. Ngara mingangŭn di kayuh adi ngara patut mangŭh ngarun, buang bipikir di kayuh ong adŭ.

²⁰Pak ata ati inŭh rayat shorga. Ka ngga atin graŭh ata kajŭn Pinyikudip ta, Tuhan Jesus Kristus, adi mandŭg so shorga.

²¹Ayŭh re nukar pŭrŭng ta ati adi ramah adi re kabŭs da mun pŭrŭng adŭp-I adi bragah, pakai kuasa anŭ adi-I pakai ngga nguasa sopŭrŭg kayuh.