Read Biatah Bidayuh PHILIPPI 4 Bible Online

PHILIPPI 4 - Biatah Bidayuh bible

PHILIPPI 4

¹Jadi meh, bara dingan ku adi aku rindu, aku raru jabŭng di angān! Aku mbŭh raru gaŭn buang mingangŭn di angān! Angān patut mijog tagap darŭm pimudip samah darŭm Tuhan.

²Euodia ngga Syntyche, aku mite angān duwŭh ndi atin darŭm Tuhan.

³Ka kuu gŭh, dingan ku adi tŭtŭd darŭm kraja, aku mite kuu turung duwŭh naan dayung anŭ; amai ngara mbŭh bandar nyiraja ngga aku darŭm nyuse Agah Kana, samah ngga Clement samŭn sopŭrŭg adi bŭkŭn di kraja ta. Dŭn ngara mbŭh agi darŭm surat di yŭn dŭn bara daya adi Tapa mbŭh mien dog nuris.

⁴Isa-i angān siraru gaŭn darŭm angān udip ndi ngga Tuhan. Aku nang dinge: gaŭn meh!

⁵Nakit buang duduh ngga sopŭrŭg daya. Tuhan mbŭh re rikas mandŭg.

⁶Dŭhnyah gapang pasar tadŭ kayuh, pak siraru mite di Tapa darŭm simayang kayuh adi angān biguna ngga atin trima kaseh.

⁷Ka damai Tapa, adi rabis so tungang manusia mirati, re jaga atin ngga pikir ngan da pagŭng darŭm angān udip ndi ngga Kristus Jesus.

⁸Sikasŭn-i, bara dingan ku, ngisi pikir ngan ngga kayuh adi kana ka ngga kayuh adi patut dog muji: kayuh adi sawŭ, kayuh adi kana, kayuh adi batur, kayuh adi bisig, kayuh adi ramus, ka kayuh adi bisa dog stabi.

⁹Ndai anŭ adi angān ko birajar ka kambat so aku, bait-i so piminyu ku, puan kah so aran pimudip ku. Ka Tapa adi nggen damai di ata re agi ngga angān.

¹⁰Darŭm pimudip ku adi ndi ngga Tuhan, aku raru gaŭn amai ripas mua tian-i, angān mbŭh pari biyŭn pluang ngga kiren adŭp ngan piduri aku. Dŭh sirati-i aku nang angān agi dŭh piduri aku; sibandar-i angān dŭh biyŭn aran ngga kiren adŭp ngan piduri aku.

¹¹Ka aku nang sakanŭ dŭh sabab aku kinyam adŭp ku dŭh dog piduri; sibandar-i aku mbŭh pikanyet adŭp ku munos di tadŭ mun kiang kayuh adi aku biyŭn.

¹²Aku mbŭh puan munki pimudip sirata ka munki pimudip adi biyŭn rabis so sadang. Aku mbŭh birajar rusia-i, isa di barang ka mun gaya pimudip ka di tadŭ nga-i, aku bisa jadi puas; bait-i di tika aku bisoh puan kah di tika aku sibŭrŭk, bait-i di tika aku biyŭn raru bagŭ puan kah di tika aku biyŭn raru nisŭ.

¹³Aku biyŭn pinyibake so kuasa adi Kristus mbŭh nggen di aku ngga nura sopŭrŭg kayuh.

¹⁴Pak mbŭh raru kana inŭh angān ko turung aku di pinyusah ku.

¹⁵ Angān daya Philippi mbŭh tatu puan nang di andu aku bu so Macedonia, di tipuh aku gi-muran nyuse Agah Kana, angān sadi adŭ eklisia adi turung aku; angān adŭ adi samah kinyam utung ngga rugi ku.

¹⁶ Rabis so ndi sidah kan aku biguna di pinurung di Thessalonica, angān agi pait pinurung ngan ka aku.

¹⁷Dŭh-i aku gruwŭn pinganggen; sibandar-i, aku raan kiris berkat so pingandai kana ngan dŭ dŭ bitambah yŭn guna adŭp ngan.

¹⁸ Aku ngaku agi trima sopŭrŭg kayuh adi angān nggen, adi mbŭh rabis so sadang! Aku mbŭh trima sopŭrŭg pinganggen ngan so tangan Epaphroditus, ka madin aku mbŭh biyŭn sopŭrŭg-i adi aku biguna. Pinganggen ngan anŭ mbŭh keya ka pinganggen adi buuh ramak adi dog jugan ka Tapa, sadis adi tibirang buang pimunos asŭng-I.

¹⁹Tapa ku ngga kaya bās-I re nggen di angān kayuh adi angān biguna, so Kristus Jesus.

²⁰Bragah ka Tapa adi Sama ta ndŭg situi tui! Amen.

²¹Tabi ka barang naan daya adi Tapa mbŭh mien adi mbŭh jadi tung Kristus Jesus. Bara dingan ku adi agi digiti samah ngga aku pait tabi ka angān.

²²Sopŭrŭg daya digiti adi Tapa mbŭh mien pait tabi, rabis-i ngara adi so istana Caesar.

²³Isa-i pinyirasi-mandis Tuhan Jesus Kristus agi ngga sopŭrŭg ngan.