Read Biatah Bidayuh COLOSSAE 1 Bible Online

COLOSSAE 1 - Biatah Bidayuh bible

COLOSSAE 1

¹So Paul, adi pinyuruh Kristus Jesus so pinyiraan Tapa, samŭn so dingan ta Timothy,

²nuju bara daya adi Tapa mbŭh mien di Colossae, adi bara dingan ami adi tŭtŭd samah ngga kieh darŭm udip ndi ngga Kristus: Isa-i Tapa adi Sama ta nggen di angān pinyirasi-mandis ngga damai.

³Kieh ari nggen trima kaseh di Tapa, adi Sama Tuhan ta Jesus Kristus, kan kieh simayang yŭn ngan,

⁴sabab kieh mbŭh dingah pinyabah ngan di Kristus Jesus ka pasar pinyirindu ngan di sopŭrŭg daya adi Tapa mbŭh mien.

⁵Kan agah adi sawŭ, anŭ inŭh Agah Kana, dog taban ka angān di sibungas-i, angān dingah pasar pingarap adi-i taban. Jadi pinyabah ngga pinyirindu ngan inŭh bisangan di kayuh adi angān harap, adi mbŭh pagŭng dog nyikŭn yŭn ngan di shorga.

⁶Agah Kana anŭ babŭ taban berkat buang mbŭh kambang ka barang yŭn di ong, nimun-i mbŭh kambang di dupan angān piguru so andu angān muran dingah pasar pinyirasi-mandis Tapa ka puan ani sibandar-i.

⁷ Angān mbŭh dingah pasar pinyirasi-mandis Tapa so Epaphras, adi samah urun Kristus mun kieh; ayŭh adi kieh rindu, ndai kraja Kristus ngga atin tŭtŭd ngga ngarun kieh.[1]

⁸Ayŭh muko kidaan di kieh pasar pinyirindu adi Roh Kudus mbŭh nggen di angān.

⁹Sabab anŭ meh, kieh mbŭh siraru simayang yŭn ngan, so andu kieh dingah pasar angān. Kieh mite Tapa ngisi angān ngga pinyipuan pasar pinyiraan-I, ngga sopŭrŭg pinyibijak ngga pinyimirati adi Roh-I nggen.

¹⁰Amai simŭnŭ inŭh meh, angān re bisa udip nanyam ka pinyiraan Tuhan, siraru ndai kayuh adi pimunos asŭng-I. Angān re buān buwa darŭm sopŭrŭg pingandai kana, buang bitambah darŭm pinyipuan ngan pasar Tapa.

¹¹Isa-i angān dog nyibake ngga sopŭrŭg pinyibake adi mandŭg so bragah kuasa-I, isa angān tungang nyijŭn sopŭrŭg kayuh ngga atin sabar. Ka ngga atin gaŭn nggen trima kaseh di[2] Sama, adi mbŭh bada angān tibirang kambat tung jangān utung adi-I mbŭh sidia yŭn daya-I darŭm pinyipritah jawa.

¹³Ayŭh nyiramat ata so kuasa karŭm ka taban ata darŭm siramat ka darŭm pinyipritah Anak-I adi-I rindu;

¹⁴ so ka Anak-I ata dog pirupas, anŭ inŭh, dosa ta dog apun.

¹⁵Kristus inŭh raŭn gayŭn Tapa, pak Ayŭh tungang dog kiris, dŭh mun Tapa adi dŭh tungang dog kiris. Ayŭh inŭh Anak pinuai adi nunduh sopŭrŭg kayuh adi ko dog napa.

¹⁶Ngga Ayŭh Tapa napa sopŭrŭg kayuh di shorga ngga di ong, sopŭrŭg adi tatŭng ngga adi dŭh tatŭng, samŭn roh roh adi bikuasa ngga adi mritah. Tapa napa sopŭrŭg kayuh ngga Ayŭh ka yŭn Ayŭh.

¹⁷Kristus mbŭh agi diŭ so sopŭrŭg kayuh bŭkŭn jadi, ka sabab Ayŭh sopŭrŭg kayuh mbŭh biyŭn yŭn-i nanyam patut.

¹⁸ Ayŭh inŭh ubak yŭn pŭrŭng-I, eklisia; Ayŭh inŭh adi so pŭrŭng dapŭd udip. Ayŭh anŭ Anak pinuai Tapa, adi ko dog pakat so kabŭs, siŭn Ayŭh sadi adŭ bisa dapŭd numbor ndi darŭm sopŭrŭg kayuh.

¹⁹Amai so pinyiraan adŭp Tapa inŭh Anak agi brimun ngga Tapa.

²⁰ So ka anak meh, Tapa mbŭh natu an taban sopŭrŭg kayuh, bait di ong puan kah di shorga, pari ka adŭp-I. Tapa ndai damai so ka pinyikabŭs Anak-I di atuh rigang ka taban pari ka adŭp-I sopŭrŭg kayuh, di ong ngga di shorga.

²¹Dawŭ-i angān jo so Tapa buang mbŭh pinganyu-I sabab pingandai ngga pikir-kira ngan arap.

²²Pak madin, ngga pinyikabŭs pŭrŭng Anak-I, Tapa mbŭh ndai angān da jadi dingan-I, siŭn-I taban angān, kudus, bisig, ka mating takar sarah, ka sirung jawin-I.

²³Angān dŭh siŭn dŭh an adu adu sabah di Agah Kana anŭ ka jadi tagap darŭm pinyabah ngan. Dŭhnyah pasan pingarap ngan anŭ adi angān ko kambat darŭm angān dingah Agah Kana anŭ. Yŭn Agah Kana anŭ inŭh aku, Paul, mbŭh jadi urun. Ka Agah Kana anŭ mbŭh dog nyuse di ndi ong ong.

²⁴Madin aku gaŭn sabab jera-birasa ku yŭn ngan, sabab ngga jera-birasa pŭrŭng ku aku turung nyukup jera-birasa Kristus ngga ngarun pŭrŭng-I, eklisia.

²⁵Ka aku ati mbŭh dog bada Tapa jadi urun eklisia, adi nggen di aku kraja adi patut ku ndai yŭn kana ngan. Kraja anŭ inŭh piagah sopŭrŭg agah Tapa,

²⁶rusia adi-I sukan so jah, so barang turap manusia pak madin mbŭh dog pinandŭng di bara daya-I.

²⁷Tapa ndai simŭnŭ isa daya-I puan rusia-I, rusia adi bās ka bragah adi-I mbŭh sidia yŭn sopŭrŭg manusia. Ka rusia anŭ inŭh adŭp Kristus agi darŭm angān; sirati-i angān re sua dapŭd utung darŭm bragah Tapa.

²⁸Jadi kieh nyuse Kristus di barang naan daya. Ngga situngang tungang darŭm sopŭrŭg pinyibijak kieh bakan ka ngajar ngara siŭn tungang taban ngara ka sirung jawin Tapa nimun daya adi mbŭh sukup mirati darŭm udip ndi ngga Kristus.

²⁹Ngga bada sopŭrŭg-i jadi aku mbŭh bandar bandar nyiraja pakai kuasa adi dog nggen Kristus, ka kuasa anŭ tatŭng darŭm kraja pingandai ku.