Read Biatah Bidayuh COLOSSAE 2 Bible Online

COLOSSAE 2 - Biatah Bidayuh bible

COLOSSAE 2

¹Aku raan angān puan simuki aku bandar nyiraja yŭn ngan ka yŭn daya di Laodicea samŭn ngara adi bŭkŭn adi bŭn bidapŭd ngga aku.

²Aku ndai simŭnŭ ngga ngatat ngara ka isa-i ngara jadi ndi darŭm pinyirindu. Simŭnŭ gŭh angān ngga ngara bisa batur batur puan ka mirati buang natŭng rusia Tapa, adi taŭn mbŭh adŭp Kristus.[3]

³Ayŭh inŭh kusi adi kuka sopŭrŭg pinyipuan ka pinyibijak Tapa adi taŭn-i mbŭh rata adi dog sukan.

⁴Aku kidaan di angān, dŭhnyah tandah daya nyibudo angān ngga pinganang adi sak adi yŭh.

⁵Amai sunggu aku mating ngga angān darŭm pŭrŭng, aku agi ngga angān darŭm roh, ka aku gaŭn kan aku kiris angān ndi atin buang tagap darŭm pinyabah di Kristus.

⁶Amai angān mbŭh kambat Kristus Jesus jadi Tuhan ngan, angān patut udip ndi ngga Ayŭh.

⁷Bada uat ngan tŭrŭp darŭm Ayŭh, ndai pimudip ngan da bisangan di Ayŭh, ka jadi rabis bake darŭm pinyabah ngan, nimun adi ko angān birajar. Ka brisi meh ngga atin trima kaseh.

⁸Dŭhnyah bada daya piurun angān ngga pinyibijak manusia adi dŭh biguna adi bisa kinanyap angān. Ajar anŭ dŭh-i mandŭg so Kristus, pak ajar manusia adi mūn so sesang ndi ndŭg sesang andi, buang-i ajar adi mandŭg so roh roh adi nguasa rangit ngga ong.

⁹Adŭp Kristus inŭh Tapa, darŭm pimudip manusia-I,

¹⁰ka angān mbŭh dog nggen ngga sipuno-i udip adi sawŭ darŭm angān udip ndi ngga Ayŭh. Ayŭh mbŭh di tunduh sopŭrŭg roh adi bikuasa ngga adi mritah.

¹¹Darŭm udip ndi ngga Kristus angān mbŭh bisunat, dŭh-i sunat adi pingandai manusia, pak sunat adi pingandai Kristus adi pirupas ata so kuasa pŭrŭng adi bidosa.

¹² Amai kan angān dog baptisa, angān dog kubur ngga Kristus, ka darŭm baptisa angān gŭh dog pakat ngga Kristus so ka pinyabah ngan di kuasa kraja pingandai Tapa, adi pakat Ayŭh so kabŭs.

¹³ Angān ko dawŭ-i kabŭs darŭm roh sitagar dosa ngan ka sabab angān adi dŭh bangsa Jahudi dŭh biyŭn Ukum-adat. Pak Tapa mbŭh kudip angān samah ngga Kristus. Tapa mbŭh apun sopŭrŭg dosa ta;

¹⁴ Ayŭh mbŭh kinating ukum adi mandŭg so dŭh sita Ukum-adat ngga atur atur-i adi mbŭh ngabŭt buang nanuh ata, ka mbŭh masak-i di atuh rigang.

¹⁵Ka di atuh rigang anŭ Kristus pirupas adŭp-I so roh roh adi bikuasa ngga adi mritah;[4] Ayŭh mbŭh, keya ka di andu daya manang biperang, ndai ngara da mun daya-takap adi arah biperang dog taban baris panu di sirung jawin daya bagŭ.

¹⁶ Jadi isa-i dŭhnyah daya ndai atur pasar kayuh adi angān man puan kah kayuh adi angān nok, puan kah pasar andu bās adat, puan kah pasar Gawai Anak Buran, puan kah pasar andu Sabbath.

¹⁷Sopŭrŭg anŭ mbŭh keya ka singangi kayuh adi re; pak adi batur taŭn-i mbŭh adŭp Kristus.

¹⁸Dŭhnyah tandah adŭp ngan dog nyarah tadŭ daya adi nang adŭp-i bās dŭ so angān sabab-i mbŭh kiris kayuh saruh, ka adi ngajar pasar atin tŭkŭn adi dŭh batur ka pasar nyambah malaikat. Amai ngga mating sabab-i, daya adi mun anŭ mbŭh sambuh da aran pikir-kira manusia,

¹⁹ buang mbŭh dŭh tia bidigen di Kristus, adi ubak pŭrŭng-I, eklisia. Di ribo pingatur Kristus ndi pŭrŭng anŭ mbŭh dog sita ka dog tubu pakai bukuh bukuh turang ka isin-i, siŭn-i masang kambang nanyam ka pinyiraan Tapa.

²⁰Angān mbŭh kabŭs ngga Kristus ka mbŭh dog pirupas so roh roh adi nguasa rangit ngga ong. Mani meh garang angān udip mun daya adi tung ong ati? Mani angān tunda atur, mun

²¹“Dŭhnyah tama ati,” “Dŭhnyah kija ajeh,” “Dŭhnyah tama ajeh ndi”?

²²Sopŭrŭg anŭ inŭh kayuh adi bisa jadi dŭh biguna pasu-i mbŭh dog pakai; kayuh anŭ batur-i atur ngga ajar manusia adŭ.

²³Sawŭ inŭh atur adi mun anŭ mun adi bisangan di pinyibijak darŭm-i takan daya da nyambah malaikat, da biyŭn atin tŭkŭn adi dŭh batur, ka da kijera pŭrŭng; pak dŭh sawŭ biyŭn guna ngga ngarah pinyiripong pŭrŭng.