Read Biatah Bidayuh COLOSSAE 3 Bible Online

COLOSSAE 3 - Biatah Bidayuh bible

COLOSSAE 3

¹ Angān mbŭh dog pakat udip bauh ngga Kristus, jadi na meh atin ngan di kayuh adi di shorga, di yŭn Kristus agi guru di takta-I tura ka tauh Tapa.

²Bada pikir ngan di kayuh adi di shorga, dŭh di kayuh adi di ong.

³Angān mbŭh kabŭs, ka pimudip ngan inŭh dog sukan ngga Kristus darŭm Tapa.

⁴Pimudip ngan adi sawŭ inŭh Kristus ka kan Ayŭh pinandŭng adŭp-I, angān re nandŭng ngga Ayŭh ka sua dapu bragah-I!

⁵Angān patut siŭ pinyiraan ong adi nguasa angān, mun pingandai kais, pimudip adi dŭh tatu, pinyiripong ngga pinyiraan adi sarah, ka tama (amai tama inŭh nyambah tibudo).

⁶Sabab sopŭrŭg kayuh anŭ baji Tapa re nyatŭk sinadan daya adi dŭh an dingah pinganang-I.[5]

⁷Angān gŭh ko udip mun anŭ dawŭ-i, dog nguasa pinyiraan ong.

⁸Pak madin angān dŭh siŭn dŭh an taran sopŭrŭg ati: atin baji, pinyiripong ngga pinyiraan adi sarah, ka atin tiru. Dŭhnyah nang kayuh arap pasar daya, puan kah piruah pinganang adi dŭh patut nŭŭh nang.

⁹ Dŭhnyah kadong dingan ngan, amai angān mbŭh taran pimudip amba samŭn sopŭrŭg pingandai-i

¹⁰ ka mbŭh jadi daya bauh adi Tapa taŭn ari pibauh darŭm gayŭn adŭp-I adi pinapa-i. Ngga simŭnŭ inŭh angān bisa puan Tapa ngga sipuno-i.

¹¹Ka darŭm-i mun anŭ, re mating katŭn daya bangsa Greek ngga daya bangsa Jahudi, bisunat ngga adi dŭh bisunat, bangsa tami, bangsa daya adi babŭ amba aran pimudip-i, daya urun bait adi dŭh urun, pak Kristus mbŭh sopŭrŭg-i ka mbŭh agi darŭm sopŭrŭg.

¹² Angān mbŭh bara daya adi Tapa dapu; Ayŭh rindu angān ka mbŭh mien angān da jadi daya adi-I dapu. Jadi meh angān dŭh siŭn dŭh kasŭk di adŭp ngan atin masi, atin mandis, atin tŭkŭn, atin duduh, ka atin sabar.

¹³Sabar ngga dingan ngan ka apun dingan ngan kan angān agi dŭh sanang asŭng di dingan ngan. Angān dŭh siŭn dŭh an apun dingan ngan nimun Tuhan mbŭh apun angān.

¹⁴Ka di sopŭrŭg pingandai kana anŭ angān an nambah pinyirindu, adi ngabŭt sopŭrŭg kayuh da birasŭk jadi ndi.

¹⁵Damai adi Kristus nggen inŭh ngga turung angān ndai pikir-kira ngan adi patut; amai nuju damai anŭ inŭh Tapa mbŭh bagan angān da tikuruk darŭm ndi pŭrŭng. Angān patut nggen trima kaseh.

¹⁶ Isa-i ajar Kristus darŭm sopŭrŭg pinyikana-i ngisi atin ngan. Ngajar ka pitayan dingan ngga sopŭrŭg pinyibijak. Nang ragu mazmur, nang nyanyi, ka ragu kudus; biragu ka Tapa ngga atin trima kaseh.

¹⁷Sopŭrŭg kayuh adi angān ndai bait nang, patut dog ndai ngga adŭn Tuhan Jesus, darŭm angān nggen trima kaseh di Tapa Sama so Ayŭh.

¹⁸ Angān bara dayung adi mbŭh banan, nundok di banŭh ngan, amai simŭnŭ inŭh angān patut darŭm angān jadi daya Kristen.

¹⁹ Angān bara dari adi mbŭh sawan, rindu sawŭn ngan ka dŭhnyah kasar ngga ngara.

²⁰ Angān adi bara anak, darŭm sopŭrŭg kayuh stabi di pimas ngan, amai simŭnŭ inŭh angān pimunos asŭng Tapa.

²¹ Angān adi mbŭh jadi pimas, dŭhnyah kinuas anak ngan, te asŭng ngara jimŭ rai-i.

²² Angān adi urun, nurut pinganang tuan ngan darŭm sopŭrŭg kayuh, dŭh-i di tika ngara ngatin angān sabab angān an dog nganju adŭ; pak ndai kraja ngan ngga atin tŭnggŭn amai atin stabi ngan di Tuhan.

²³Ani ani adi angān ndai, ndai-i ngga siabo atin ngan, mun angān nyiraja yŭn Tuhan ka dŭh yŭn manusia.

²⁴Ingat nŭh, Tuhan re ngupah angān ngga kayuh adi-I mbŭh sidia yŭn daya adi-I dapu. Amai Kristus inŭh Tuhan adi yŭn ngan sawŭ bituan.

²⁵ Ka sopŭrŭg daya adi ndai sarah re dog ukum nanyam ka sarah-i, sabab Tapa dŭh mien kan-I ngukum daya.