Read Biatah Bidayuh COLOSSAE 4 Bible Online

COLOSSAE 4 - Biatah Bidayuh bible

COLOSSAE 4

¹ Angān adi tuan, dŭhnyah ida ida ngga urun ngan, amai adŭp ngan biyŭn gŭh Tuan di shorga.

²Bijijŭ darŭm simayang, ka bijaga darŭm angān bidua nggen trima kaseh di Tapa.

³Ka dŭh gŭh kambŭt simayang yŭn kieh, isa Tapa nggen di kieh pluang ngga nyuse agah-I pasar rusia Kristus. Sabab anŭ inŭh aku madin darŭm jer.

⁴Simayang meh, siŭn aku bisa bada ajar ku tarang, amai anŭ inŭh kayuh adi patut ku ndai.

⁵ Angān an bijak darŭm urah-rakah ngan darŭm angān bigaur ngga daya adi dŭh sabah di Jesus; nakit pakai pluang adi angān biyŭn.

⁶Piminyu pinganang ngan patut mandis buang adi suka daya dingah, ka angān patut nggen pinyinam adi batur di daya.

⁷ Tychicus dingan adi ata rindu, re kidaan di angān agah pasar aku. Ayŭh daya adi raru tŭtŭd darŭm kraja buang mbŭh nyiraja yŭn Tuhan samah ngga kieh.

⁸Ngapŭi aku pait ayŭh ka yŭn ngan, siŭn-i pigaŭn angān ngga pinganang-i pasar munki kieh digiti.

⁹ Onesimus, dingan adi tŭtŭd ka adi kieh rindu, so tibaran ngan, re sua di ngga ayŭh. Ngara duwŭh re kidaan di angān sopŭrŭg kayuh adi jadi digiti.

¹⁰ Aristarchus, adi sua ngga aku darŭm jer, pait tabi ka angān; simŭnŭ gŭh Mark, bitungar Barnabas. (Angān muko trima pinganang da kambat Mark kambŭi ayŭh mandŭg ka angān.)

¹¹Joshua, adi dog kadŭn Justus, pait tabi gŭh. Kaŭs-i ngara taruh adŭ adi daya Jahudi adi nyiraja ngga aku yŭn Pinyipritah Tapa;[6] ngara agi bandar turung aku.

¹² Tabi so Epaphras, urun Kristus Jesus, adi so tibaran ngan gŭh. Ayŭh siraru simayang yŭn ngan, mite Tapa nagap angān darŭm pinyabah ka bada angān sukup mirati darŭm aran pimudip Kristen, buang tŭtŭd ngga pinyiraan Tapa.

¹³Adŭp aku bisa nggen taksi nang ayŭh agi sawŭ bandar nyiraja yŭn ngan ka yŭn daya di Laodicea ngga di Hierapolis.

¹⁴ Luke, doktor adi ata rindu, ngga Demas pait tabi ka angān.

¹⁵Nggen tabi yŭn ami di bara adi sabah di Jesus di Laodicea ka di Nympha samŭn bara daya eklisia adi siraru tikuruk simayang di ramin-i.

¹⁶Ripas angān ko basa surat ku ati, angān an basa-i gŭh yŭn eklisia di Laodicea. Di jam anŭ gŭh angān patut basa surat so ngara adi sabah di Jesus di Laodicea.

¹⁷ Ka kidaan di Archippus, “Dŭhnyah dŭh ngamas kraja adi Tuhan mbŭh nggen di kuu.”

¹⁸Ngga tangan adŭp ku aku nuris ati: Tabi so Paul. Dŭhnyah kambŭt aku adi babŭ darŭm jer! Isa-i pinyirasi-mandis Tapa agi ngga angān.